Nvidia сè посилно ја користи својата финансиска моќ за да го прошири влијанието во индустријата за вештачка интелигенција, а вредноста на нејзините сопственички инвестиции за само една година пораснала повеќе од десет пати и достигнала 99 милијарди долари.

Според податоците на компанијата, заклучно со 26 јули вредноста на инвестициите изнесувала 99 милијарди долари, во споредба со околу седум милијарди долари една година претходно и 2,2 милијарди долари пред две години. Само во текот на 2026 година Nvidia презела обврски за инвестиции во вредност од повеќе од 40 милијарди долари.

Компанијата инвестира во широк спектар фирми поврзани со вештачката интелигенција, од водечки лаборатории за развој на AI-модели, преку облачни провајдери, до компании што развиваат инфраструктура, мрежни технологии и софтвер. Меѓу нив се OpenAI, CoreWeave и Nebius.

Од Nvidia велат дека инвестициите треба да создадат нови можности за раст, да го зајакнат нејзиниот екосистем и дополнително да ја подобрат конкурентската позиција на компанијата.

Во февруари Nvidia објави инвестиција од 30 милијарди долари во OpenAI, како дел од финансиска рунда вредна 110 милијарди долари. Финансиската директорка Колет Крес изјавила дека компанијата досега инвестирала „речиси 50 милијарди долари“ во водечките лаборатории за вештачка интелигенција.

Nvidia вложува и во таканаречените „неооблак“ компании, кои купуваат нејзини графички процесори и потоа го изнајмуваат пристапот до нив. Во јануари компанијата инвестираше две милијарди долари во CoreWeave, додека Nebius во март обезбеди инвестиција од ист износ.

Покрај тоа, од март Nvidia презела обврски за најмалку 6,5 милијарди долари инвестиции во компании што развиваат фотоника и оптички технологии. Lumentum, Coherent и Marvell добиле по две милијарди долари.

Значително пораснала и вредноста на некои претходни инвестиции на Nvidia. Уделот во Intel, за кој компанијата платила пет милијарди долари, сега се проценува на околу 30 милијарди долари, додека нејзиниот удел во SpaceX во јуни бил вреден околу 21 милијарда долари.

Паралелно со инвестициската експанзија, расте и основниот бизнис на Nvidia. Акциите на компанијата се зголемиле за околу 33 отсто во изминатите 12 месеци, додека приходите во вториот фискален квартал пораснале за 106 отсто, на 96,2 милијарди долари.

Аналитичарите оценуваат дека преку директно финансирање на AI-компании и инфраструктурни партнери, Nvidia не само што создава нови пазари за своите графички процесори, туку и ја зацврстува позицијата во индустријата во период кога глобалната побарувачка за чипови за вештачка интелигенција продолжува забрзано да расте.

Извор: CNBC