Управа за јавни приходи информира дека за 2025 година се изготвени вкупно 862.896 однапред пополнети годишни даночни пријави (ДЛД-ГДП), во законскиот рок до 30 април 2026 година.

Институцијата соопшти дека граѓаните ќе добијат известување преку профилот на системот „МојДДВ“ или на електронската пошта што ја имаат регистрирано.

Секое физичко лице кое остварило приход во 2025 година има обврска да ја провери, потврди или коригира пријавата најдоцна до 31 мај 2026 година. Увидот во податоците се врши преку платформата „е-Даночни услуги“, додека лицата кои сè уште не се регистрирани треба да го сторат тоа во најкраток можен рок.

Од УЈП појаснуваат дека по истекот на рокот, непотврдените пријави ќе се сметаат за конечни, а коригираните ќе бидат предмет на одобрување од службено лице.

Воедно, граѓаните кои имаат повеќе платен данок имаат можност да побараат поврат преку самата пријава.

Од институцијата апелираат навремено да се проверат внесените податоци, бидејќи тие се користат и при издавање уверенија и за остварување права пред други институции.

Фискалната политика во наредниот период ќе се соочи со предизвик да го усогласи намалувањето на буџетскиот дефицит со потребата од економски раст, оцени министерката за финансии Гордана Димитриеска Кочоска.

Говорејќи на стручната расправа „Ефикасноста на јавните финансии и улогата на фискалните правила во Северна Македонија“, организирана од Фискален совет во Македонска академија на науките и уметностите, таа нагласи дека за стабилна економска политика се неопходни внимателно управување, силни институции и доследно почитување на фискалните правила.

Во пресрет на новата Фискална стратегија за периодот 2027–2031 година, министерката истакна дека документот има за цел да обезбеди стабилен и предвидлив фискален курс, без да се нарушат економската активност и социјалната сигурност.

Според проекциите, буџетскиот дефицит постепено ќе се намалува – од 3,5 проценти од БДП во 2027 година, на 3 проценти во 2028 година, а потоа на 2,8 проценти во 2029 година, ниво кое ќе се задржи до 2031 година.

Димитриеска Кочоска посочи дека Владата ќе спроведува мерки и на приходната и на расходната страна, со фокус на подобрување на наплатата, намалување на сивата економија и рационализација на трошоците. Паралелно, ќе се работи на поголема транспарентност, подобра контрола на јавните набавки и приоритизација на капиталните инвестиции.

Таа нагласи дека фискалните правила се клучен инструмент за одржување стабилност и доверба во економијата, а улогата на Фискалниот совет е значајна за следење на ризиците и зајакнување на фискалната дисциплина.

Во рамки на расправата беа отворени и теми поврзани со ефикасноста на јавната потрошувачка, одржливоста на јавниот долг и влијанието на фискалните правила врз економските резултати.

Најбогатиот човек во светот, Илон Маск, смета дека штедењето за пензија наскоро ќе стане бесмислено, бидејќи со развојот на вештачката интелигенција ќе настане општо изобилство.

Извршниот директор на Tesla и SpaceX важи за голем оптимист кога станува збор за вештачката интелигенција. Според него, луѓето не треба да се оптоваруваат со создавање заштеди за далечната иднина, што е спротивно на советите на многу финансиски експерти.

„Не грижете се за оставање пари на страна за пензија за 10 или 20 години. Тоа нема да биде важно“, изјави Маск во подкастот Moonshots with Peter Diamandis.

Неговиот контроверзен став произлегува од визијата за свет трансформиран од брзиот напредок на вештачката интелигенција, роботиката и енергетиката. Маск очекува дека до 2030 година вештачката интелигенција ќе ја надмине интелигенцијата на сите луѓе заедно, а бројот на хуманоидни роботи ќе го надмине бројот на луѓе на Земјата. Според него, AI ќе ги замени луѓето во традиционалните професии, особено во канцелариските и интелектуалните занимања.

„Сè освен физичкото обликување на атомите, вештачката интелигенција веројатно веќе може да го извршува – половина или повеќе од половина од работните места. Таквиот напредок може да доведе до огромно зголемување на продуктивноста, далеку над она што луѓето можат да го замислат како изобилство“, оцени Маск.

Според неговите зборови, наместо универзален основен доход, иднината би можела да донесе систем во кој „секој може да има што и да посака“. Во такви околности, платата, штедењето и животниот стандард нема да имаат исто значење како денес.

Тој истакна дека во следните пет години, благодарение на вештачката интелигенција, дури и луѓето без заштеди би можеле да имаат здравствена грижа подобра од сегашната. Исто така, можно е да исчезнат ограничувањата во достапноста на производи, услуги и образование.

Ставовите на Маск се надоврзуваат на неговите претходни проценки дека во наредните 10 до 20 години вештачката интелигенција и хуманоидните роботи ќе извршуваат поголем дел од работата, поради што верува дека парите би можеле да станат небитни.

Во таков свет, работата би станала прашање на личен избор и слободно време, слично како денешното занимавање со спорт или играње видео-игри.

„Ако сакате да работите, тоа е исто како кога можете да отидете во продавница и да купите зеленчук или да го одгледувате во сопствената градина. Потешко е да го одгледувате сами, но некои луѓе го прават тоа затоа што уживаат во тоа“, изјави Маск на Американско-саудискиот инвестициски форум.

Сепак, тој предупредува и на можните негативни последици од општество во кое луѓето нема да мора да заработуваат за живот. Како што посочи, таквата реалност може да доведе до длабока криза на смислата, пренесува Fortune.

Извор: Bankar.me