Комерцијална банка АД Скопје во периодот од 1 јануари до 31 март 2026 година оствари позитивен финансиски резултат од 1,46 милијарди денари, што претставува раст од 2,8% во однос на истиот период минатата година, кога добивката изнесуваше 1,42 милијарди денари. Воедно, планираната бруто-добивка за првиот квартал е реализирана со 115,4%.

Резултатите се остварени во услови на зголемена неизвесност во глобалното економско окружување, поврзана со геополитичките тензии на Блискиот Исток и растот на цените на енергенсите, што создава дополнителни ризици за инфлацијата и економските изгледи.

Приходи и оперативно работење

Вкупните приходи од работењето достигнаа 2,15 милијарди денари, што претставува раст од 6,4% на годишно ниво. Добивката пред исправка на вредност, како индикатор за оперативната ефикасност на Банката, е зголемена за 7,5% во однос на истиот период минатата година.

Нето-приходите од камати, кои претставуваат клучна компонента на приходите, бележат раст од 2,1%, при што зголемување е забележано кај приходите од државниот сектор поради поголемите вложувања во државни хартии од вредност, како и кај кредитирањето на домаќинствата и компаниите. Во исто време, расходите по основ на камата се зголемени за 10,8%, главно поради растот на орочените депозити. Нето каматната маржа е намалена од 3,65% на 3,45%.

Нето-приходите од провизии и надоместоци изнесуваат 384,8 милиони денари, што претставува раст од 14,9%, како резултат на зголемениот обем на активности со клиентите. Приходите од курсни разлики достигнаа 97,5 милиони денари, што е намалување од 13,9% на годишно ниво.

Останатите приходи од работењето изнесуваат 158,9 милиони денари, со значително зголемување од 82,1%, главно поради капитални добивки од продажба на преземен имот по основ на ненаплатени побарувања.

Оперативните расходи достигнаа 573,1 милион денари, што претставува умерено зголемување од 3,6%, главно поради повисоки трошоци за вработени и амортизација.

Во првиот квартал од 2026 година, Банката издвои 125,9 милиони денари за исправка на вредност на финансиските средства, што е значително повеќе во однос на истиот период минатата година, како резултат на промена на ризичната категорија кај одредени корпоративни клиенти.

Според предвидувањата на најрелевантите светски и домашни институции, 2026 година требаше да рефлектира период на закрепнување и подобрување на сите економски и финансиски перформанси, но почетокот на 2026 година беше обележан со зголемени геополитички тензии на Блискиот Исток, кои доведоа до раст на цените на енергенсите и повторно засилување на инфлаторните притисоци.

Најновиот конфликт кој започна во февруари 2026 помеѓу САД и Израел од една страна и Иран од друга, ги измести наведените очекувања. Иако иницијално се очекуваше овој конфликт да трае релативно краток временски период, реалноста покажува поинаква слика. За разлика од сите претходни причини за финансиска криза и влијание на геополитички контекст, овој конфликт се проценува дека ќе има одложено или задоцнето влијание, со оглед на фактот дека во главен фокус се цените на енергенсите, чиј ефект се пренесува во цените на сите производи и услуги, инфлацијата и генерално ги афектира синџирите на снабдување.

Најновите макроекономски показатели укажуваат на генерално стабилна економска состојба во земјата, во голема мера усогласена со проекциите за 2025 година, и покрај присутните флуктуации во надворешното окружување. Реалниот бруто-домашен производ оствари годишен раст од 3,5% заклучно со крајот на минатата година, што укажува на продолжување на умерената економска експанзија, главно поддржана од домашната побарувачка и стабилните услови на пазарот на труд. Стапката на невработеност се задржа на 11,5%, без значајни отстапувања во однос на претходната година.

Инфлацијата во почетокот на 2026 година бележеше нестабилни движења – од 2,9% во февруари се зголеми на 4,9% во март, главно под влијание на растечките цени на енергенсите и надворешните економски фактори. Како мала и отворена економија со значајна увозна зависност од енергенси, земјата е особено чувствителна на вакви ценовни шокови.

И покрај неизвесностите во глобалното економско окружување, Стопанска банка АД – Скопје во првиот квартал од 2026 година продолжи со стабилно работење и солидна профитабилност. Добивката пред оданочување во анализираниот период изнесува 799.419 илјади денари, и во однос на истиот период од минатата година е пониска за 18%, првенствено како резултат на регулаторните и пазарните услови, односно глобално намалените каматни стапки и провизии од платниот промет и меѓународните трансакции.

Биланс на успех

Нето-приходите од камати изнесуваат 1,26 милијарди денари, што е за 14% помалку во однос на истиот период лани. Намалувањето е резултат на трендот на опаѓање на каматните стапки и промените во референтните каматни индикатори. Најголемо учество во каматните приходи имаат кредитните активности, додека повисоките салда на депозити придонесоа за зголемени каматни расходи.

Нето-приходите од провизии и надоместоци изнесуваат 221,7 милиони денари и се повисоки за 13%, главно поради намалување на расходите за провизии кон добавувачите на услуги.

Приходите од курсни разлики изнесуваат 50,5 милиони денари, што е намалување од 14% на годишно ниво, пред сè поради пониските маргини и намалената понуда на девизи од страна на компаниите.

Банката продолжи со внимателна контрола на оперативните трошоци. Трошоците за вработени изнесуваат 346,6 милиони денари, додека останатите расходи од дејноста достигнаа 280,2 милиони денари, при што умереното зголемување е резултат на инфлаторните движења.

За покривање на потенцијалните кредитни ризици, Банката издвои 140,2 милиони денари за исправка на вредност на финансиските средства и резервации за вонбилансна изложеност.

Биланс на состојба

Вкупната актива на Банката на крајот на првиот квартал од 2026 година изнесува 157,5 милијарди денари и е на слично ниво како и на крајот на 2025 година.

Кредитите и побарувањата од клиенти достигнаа 110,9 милијарди денари, што претставува раст од 2% во однос на крајот на минатата година. Кредитите кон банки изнесуваат 387 милиони денари, со зголемување од 3%.

Вложувањата во хартии од вредност достигнуваат 19,7 милијарди денари, што претставува благо намалување од 2 % на годишно ниво.

Вкупните депозити на клиенти изнесуваат 120,2 милијарди денари и остануваат на стабилно ниво, додека капиталот и резервите достигнаа 29,3 милијарди денари, што претставува раст од 2%.

Недвижностите и опремата изнесуваат 1,19 милијарди денари, што е зголемување од 7 % во однос на крајот на минатата година, додека обврските по кредити изнесуваат 4,21 милијарди денари, со минимално зголемување од 1%.

Комерцијална банка АД Скопје започнува со исплата на пензиите за април од четврток, 30 април.

Пензионерите кои користат дебитна картичка можат да располагаат со средствата истиот ден, овозможувајќи им безбедно и удобно плаќање безготовински во продавници, онлајн или подигање пари од банкомат.

За оние кои повеќе сакаат да ја подигнат пензијата во филијала или експозитура, исплатата ќе биде достапна од 30 април и во секој работен ден после тоа.

Мапата со локациите на филијалите и експозитурите на Комерцијална банка е достапна на следниот линк: https://www.kb.mk/lokacii-kb.nspx?type=branch