Агенцијата за супервизија на осигурувањето на редовна седница одржана на 11.11.2024 година го одобри именувањето на Бобан Томески за извршен член на одборот на директори на „Кроација осигурување – ЖИВОТ“ АД Скопје. Согласноста е донесена откако одборот на директори на „Кроација осигурување – Живот“ АД Скопје го именува Бобан Томески за извршен член на одборот на директори на „Кроација осигурување – Живот“ АД Скопје на 1 ноември 2024 година и му го довери мандатот со почеток од 1 декември 2024 година.

Бобан Томески со повеќе од една деценија искуство на клучни позиции во осигурителниот сектор ја презема функцијата од Маја Станковска-Костова, која ја водеше компанијата изминативе пет години.

„Управувањето со Кроациа осигурување – Живот, друштво кое е лидер на пазарот за осигурување и најстара осигурителна компанија за животно осигурување во Македонија, е голема привилегија, но и одговорност за водечката личност. Во текот на петгодишниот мандат, Маја Станковска Костова даде значаен придонес за развојот на Друштвото, за подобрување на услугите кон клиентите, креирање прилагодени понуди на производи како и зголемување на профитабилноста. Ѝ благодариме за досегашниот ангажман и за сето она што го постигна, и ѝ посакуваме успешна кариера надвор од компанијата. На Бобан Томески му посакуваме многу успех на новата функцијата – извршен член на Одборот на директори и во водењето на друштвото кон нови деловни достигнувања“ – изјави Марио Батарило, претседател на Одборот на директори на Кроациа осигурување – ЖИВОТ АД Скопје.

Генералниот директор на Халк Осигурување, г-н Ило Ристовски, учествуваше како панелист на Симпозиумот за интернационални студенти организиран од Универзитетот Гоце Делчев во Штип и Факултетот за туризам и бизнис логистика.

На темата „Предизвиците во новиот свет на дигиталната ера – мултидисциплинарен пристап“, Ристовски ги сподели своите визии и искуства во однос на дигитализацијата во осигурителната индустрија. Тој нагласи дека процесот на дигитализација носи значајни предности, како што се подобрена достапност на услугите и зголемена ефикасност, но исто така отвора нови предизвици и потенцијални ризици, како што се зголемени безбедносни ризици и потреба за континуирано обновување на технолошките вештини.

„Во Халк Осигурување, веруваме дека дигитализацијата не само што ќе го трансформира нашето работење, туку и ќе има големо влијание на идните професионалци. Поддршката на младите и нивната едукација е клучна за создавање дигитално свесни и одговорни лидери на иднината“, изјави Ило Ристовски.

Симпозиумот беше одлична прилика за студентите да се запознаат со актуелните трендови во индустријата и да добијат насоки за тоа како да се прилагодат на брзо менувачкиот дигитален свет.

Во конкуренција на пет труда стручната комисија го награди истражувачкиот  труд на Кристијан Кожески, асистент на катедра на Економскиот факултет при УКИМ во Скопје.

Трудот разбработува важни сегменти за влијанијата што врз цените на полисите за осигурување имот ги имаат БДП, долгорочните кредити, цените на недвижностите и бројот на издадени дозволи за градење. Оваа награда во вредност од 80.000 денари АСО ја доделува традиционално 14 години по ред, по повод денот на осигурувањето – 1 ноември на кој годинава АСО одбележува и јубилеј 15 години од основањето.

Агенцијата за супервизија на осигурувањето (АСО) додели награда за најдобар истражувачки труд на млад научник на тема од областа на управување со ризици во осигурувањето. Во конкуренција на пет труда од областа на управување со ризици и осигурување стручната комисија годинава наградата ја додели на Кристијан Кожески асистент на катедра на Економскиот факултет при УКИМ во Скопје.

Плакетата за најдобар истражувачки труд на Кожески му ја додели д-р Крсте Шајноски, претседател на Советот на експерти при АСО. За авторот на прворангираниот труд АСО додели награда од 80.000 денари. Оваа награда за стимулација на работата на млади научници истражувачи од областа на управување со ризици во осигурувањето годинава се доделува по 14 пат.

Во своето истражување Кожески утврдува дека макроекономските и финансиските фактори играат значајна улога во одредувањето на премиите за осигурување на имот во Македонија. При тоа трудот насловен „Комплексната интеракција на макроекономските и финансиските детерминанти со премиите за осигурување на имот во Македонија: Динамична краткорочна и долгорочна анализа“ разработува како економскиот раст, цените на недвижнините и дозволите за градба имаат позитивен и значаен ефект, додека долгорочните кредити имаат неочекувано негативно влијание. Авторот исто така укажува на тоа дека овие наоди имаат важни импликации за осигурителните компании и креаторите на економски политики.

Целта на конкурсот што традиционално се распишува е за да послужи како стимулација за развојот на научната мисла и изработка на трудови од областа на управување со ризици и осигурување во Македонија, како и афирмација на млади и стручни кадри.