„Дигитализацијата на плаќањата бележи постојан напредок во изминатиот период, поддржан од активната улога на Народната банка во унапредувањето на платежната инфраструктура, како и од инвестициите на банките во современи технолошки решенија“, ова го истакна директорката на Дирекцијата за платни системи Биљана Доновска Гечева, во интервју за емисијата „Бизнис објектив“.

Таа нагласува дека Законот за платежни услуги и платни системи овозможи влез и на нови даватели на платежни услуги и придонесе за поголема конкуренција и иновации на пазарот. Исто така, посочи дека со намалувањето на провизиите за користење на дигиталните канали за плаќање од страна на банките, како одговор на активностите на Народната банка за ревидирање на надоместоците, уште повеќе се поттикнува користењето на електронските услуги од страна на граѓаните во 2025 година.

„Безбедноста на плаќањата е системски приоритет на Народната банка и таа не само што ја следи примената на регулативната рамка, туку и постојано се усогласува со европските стандарди за безбедност при плаќањата“, истакна Доновска Гечева.

Доновска-Гечева ја нагласи проактивната улога на Народната банка во модернизацијата на платниот систем, како дел од идните активности, вклучително и учеството во регионалната иницијатива на земјите од Западен Балкан за воведување инстант плаќања засновани на ТИПС, современото европско решение за инстант плаќања коишто се извршуваат 24 часа секој ден во годината, како и поддршката за развивање целосно дигитални услуги од страна на новите даватели на платежни услуги.

Со овие активности, Народната банка и натаму придонесува кон развивање модерен, ефикасен и сигурен платен систем, ориентиран кон потребите на граѓаните и економијата.

Халкбанк АД Скопје нуди дигитално решение за бизнисите – „Халк Моби ПОС“, апликација што овозможува Android уредите да функционираат како преносливи ПОС терминали за бесконтактни плаќања.

Станува збор за иновативна алатка која, преку вградената NFC технологија, го претвора мобилниот телефон или таблет во сигурна платформа за брзи и безбедни трансакции. Апликацијата е компатибилна со сите Android уреди со NFC и поддржува плаќања со Mastercard и Visa картички, како и со други бесконтактни уреди – мобилни телефони, паметни часовници, прстени и слично.

Начинот на плаќање е ист како кај класичен ПОС терминал, но сите трансакции се изведуваат бесконтактно, што го прави процесот побрз и поедноставен за корисниците.

Од банката посочуваат дека апликацијата е сертифицирана според меѓународните PCI DSS стандарди, што обезбедува високо ниво на заштита на податоците и сигурност при секоја трансакција.

„Халк Моби ПОС“ нуди и низа практични предности за бизнисите: целосна мобилност без потреба од физички терминал, електронско испраќање на слип-извештаи со што се намалува употребата на хартија, брза и едноставна инсталација, како и можност за лесен преглед и управување со трансакциите од далечина.

За користење на услугата, потребно е да се склучи договор со банката, да се обезбеди Android уред со NFC функционалност и интернет конекција. По одобрувањето, корисникот добива податоци за активација, по што апликацијата може да се преземе од Google Play и веднаш да се користи за процесирање на плаќања.

Со ова решение, од Халкбанк АД Скопје очекуваат да внесат нова димензија на мобилното плаќање, нудејќи им на бизнисите едноставен, брз и доверлив начин за наплата.

Халкбанк АД Скопје ја информира јавноста дека на 27 април 2026 година се регистрирани обиди за неовластено собирање на лични и финансиски податоци преку лажна онлајн анкета, која се дистрибуира во име на банката.

Станува збор за злонамерна кампања во која од корисниците се бара да внесат податоци за своите платежни картички и лични информации, со цел нивна злоупотреба. Анкетата не е поврзана со Халкбанк и претставува обид за измама.

Банката апелира до јавноста да не кликнува на вакви содржини, да не внесува лични или финансиски податоци и да биде особено внимателна при вакви пораки и линкови.

Халкбанк АД Скопје истакнува дека никогаш нема да побара од своите клиенти лични податоци или информации за платежните картички преку анкети или неофицијални канали. Сите комуникации од страна на банката се одвиваат исклучиво преку официјални и безбедни канали.

Доколку клиентите веќе ги имаат внесено своите податоци, потребно е веднаш да се обратат во Контакт центарот на банката на телефон 02 3296 330, кој е достапен 24/7 или преку [email protected], со цел навремено преземање на соодветни мерки.