Индустриските производствени цени во еврозоната во јуни се намалиле за 0,3 отсто во однос на мај, додека на ниво на Европската Унија падот изнесувал 0,2 отсто, покажуваат првичните процени на Евростат.

Сепак, во споредба со јуни минатата година, цените останале значително повисоки. Во еврозоната тие пораснале за 4,6 отсто, а во целата ЕУ за 4,7 отсто.

На месечно ниво, најголемо влијание врз падот имал енергетскиот сектор. Производствените цени на енергијата се намалиле за 1,5 отсто во еврозоната и за 1,4 отсто во ЕУ.

Кога ќе се исклучи енергијата, индустриските цени се зголемиле за 0,2 отсто во двете подрачја, што покажува дека поевтинувањето не било присутно во сите индустриски категории.

Во еврозоната, цените на суровините, материјалите и полупроизводите пораснале за 0,3 отсто, додека капиталните и трајните потрошувачки добра поскапеле за по 0,2 отсто. Цените на нетрајните потрошувачки добра останале непроменети.

И покрај месечниот пад, цените на енергијата во ЕУ во јуни биле за 10 отсто повисоки во споредба со истиот месец минатата година. Во еврозоната годишниот раст изнесувал 8,8 отсто.

На годишно ниво, најголем раст на производствените цени бил регистриран во Бугарија, од 18,2 отсто. Следувале Романија со 14,3 отсто и Ирска со 11,4 отсто. Луксембург бил единствената земја во која цените биле пониски од пред една година, и тоа за 3,2 отсто.

Индексот на производствените цени ги следи промените на продажните цени на производите на домашниот пазар при излезот од производството. Тој не ги опфаќа увозните производи и не претставува индекс на потрошувачките цени што директно ги плаќаат граѓаните.

Македонски Телеком го продолжи нагорниот тренд на раст и на инвестиции во иновации и инфраструктура во првата половина од 2026 година, потврдувајќи го своето лидерство и преку Ookla®признанија за најдобрата мрежа и национално признание за одржлив развој.

Вкупните капитални инвестиции (CAPEX) на крајот на првата половина на 2026 изнесуваат 895 милиони денари. Оперативната добивка пред камати, оданочување и амортизација (EBITDA) е зголемена за 7,3 проценти споредено со истиот период минатата година, а нето добивката за 9,5 проценти. Зголемени се и приходите од продажбата за 5,1 проценти.

Рекордни 6 награди за најдобрата мрежа

Македонски Телеком повторно го освои престижното Ookla® Speedtest Awards™ признание, потврдувајќи го своето лидерство со најдобрата мрежа во Македонија и во првата половина на 2026 година. Според најновите мерења, компанијата има најдобра мобилна и фиксна мрежа на пазарот и е добитник на наградите за најдобра мобилна мрежа, најбрза мобилна мрежа, најдобро мобилно гејминг искуство, најдобро мобилно видео искуство, како и за најдобра фиксна мрежа и најбрза фиксна мрежа.

Денес, 5G мрежата покрива 97,8% од населението со гигабитни брзини во речиси сите градови во државата. Со оптичката инфраструктура покриваме 386 илјади пристапи до оптика, што е речиси двојно повеќе во споредба со сите останати оператори на пазарот заедно и за 9 проценти повеќе споредено со истиот период од претходната година.

Раст на бројот на корисници во сите сегменти

Нашата посветеност да обезбедиме супериорно корисничко искуство донесе  зголемување на бројот на корисници и лидерство во сите сегменти.

Бројот на корисници на широкопојасен интернет е зголемен за 3 проценти и изнесува 227,9 илјади, а вкупниот број на интернет пристапи порасна за 2,6 проценти. Во мобилните комуникации, базата на корисници е зголемена за 1,7 проценти и изнесува 1,291 милиони.

Во фиксната телефонија останавме на водечката позиција со 240 илјади корисници. На ТВ пазарот имаме лидерска позиција со удел од 38,6 проценти, со раст од 5,6 проценти или 173 илјади корисници на крајот на првата половина на 2026 година.

Со нашата дигитална програма за наградување и поволности за корисниците – Magenta Moments, достигнавме 448 000 корисници. Според TRI*M индексот за мерење на задоволството на корисниците, ние сме број 1 телекомуникациски бренд во Македонија.

Зголемување на заработката по акција и на дивидендата

Успешните резултати доведоа и до повисока заработка по акција, како и дивиденда за акционерите. Просечната цена по акција на крајот на првата половина на 2026 година бележи раст од 5,8% споредено со крајот на 2025 година. Бруто износот на дивидендата по акција е зголемен за 4,7% во споредба со минатата година.

Национално признание за одржлив развој

Во вториот квартал на 2026 година добивме национално признание за одржлив развој за иницијативата „Нет без хејт“ – младинско движење на Фондацијата Телеком за Македонија и УНИЦЕФ коешто придонесува за создавање побезбеден, похуман и поинклузивен дигитален простор без кибернасилство и говор на омраза.

Продолжуваме да работиме на еднакво дигитално општество и на намалување на штетните влијанија врз животната средина.

ПР објава

Регулаторната комисија за енергетика донесе одлука за намалување на просечните малопродажни цени на нафтените деривати за 1,24 проценти во однос на претходната одлука.

Од 00:01 часот на 5 август, бензините ЕУРОСУПЕР БС-95 и ЕУРОСУПЕР БС-98 поевтинуваат за два денари за литар. Новата максимална цена на ЕУРОСУПЕР БС-95 ќе изнесува 91 денар за литар, додека ЕУРОСУПЕР БС-98 ќе се продава по најмногу 93 денари за литар.

Цената на ЕУРОДИЗЕЛ се зголемува за еден денар и ќе изнесува 99,50 денари за литар. Екстра лесното масло за домаќинство поскапува за 0,50 денари и ќе чини 98,50 денари за литар.

Мазутот М-1 НС поевтинува за 1,680 денари за килограм, со што неговата максимална цена ќе изнесува 46,419 денари за килограм.

Од РКЕ посочуваат дека во пресметката е применета намалена акциза од два денари за литар кај бензините и од четири денари за литар кај дизелот. Утврдените цени се максимални, а трговците можат да ги продаваат горивата и по пониски цени.