Европската централна банка (ЕЦБ) се соочува со нов притисок за зголемување на каматните стапки во септември, откако инфлацијата во еврозоната повторно се оддалечи од целното ниво од 2%.

Инфлацијата во јули достигна 2,9%, наспроти 2,8% во јуни, а дополнителен ризик претставува растот на цените на енергенсите. Цените на енергенсите на годишно ниво се зголемија за околу 10%, што го зголемува ризикот од дополнителен инфлациски притисок врз економијата.

Членката на Извршниот одбор на ЕЦБ, Изабел Шнабел, оцени дека монетарната политика треба дополнително да се заостри за инфлацијата на среден рок повторно да се приближи до целта.

На пазарите веќе се зголемуваат очекувањата дека ЕЦБ би можела да ја зголеми депозитната каматна стапка од 2,25% на 2,50% на септемврискиот состанок. Централната банка во јуни ги зголеми каматите за 0,25 процентни поени, додека во јули ги остави непроменети.

Што значи тоа за граѓаните и бизнисот?

Ново зголемување на каматите би значело поскапо финансирање, особено доколку повисоките трошоци постепено се пренесат во банкарскиот сектор. Тоа би можело да создаде дополнителен притисок врз каматите на станбените, потрошувачките и корпоративните кредити.

Конечната одлука на ЕЦБ ќе зависи од податоците за инфлацијата, економската активност и движењето на енергетските цени што ќе бидат достапни пред септемврискиот состанок.

Сите пензионери кои се клиенти на АЛТА банка АД Битола денеска, 27 август 2026 година, предвреме ќе ја добијат пензијата за месец август, информираат од Банката.

Средствата ќе бидат исплатени на трансакциските сметки на пензионерите и веднаш ќе бидат достапни за користење.

Корисниците ќе можат да располагаат со средствата преку банкоматите, како и во експозитурите на АЛТА банка.

Вицегувернерката Ана Митреска учествуваше на Тринаесеттата биенална конференција на Комитетот на Ирвинг Фишер за статистика на централните банки (IFC), којашто се одржа во Базел, во организација на Банката за меѓународни порамнувања (БИС). Годинашното издание на Конференцијата беше под наслов „Пополнување на информациските празнини во централното банкарство: ефикасно искористување на податоците и иновативните алатки“.

Во рамките на настанот, Митреска ја водеше сесијата под наслов „Нови и експериментални податоци“, во која беа презентирани истражувања за употребата на иновативните податоци за оцена на климатските ризици, како и на алатките на вештачката интелигенција за утврдување на недостатоците во статистиките за климатските промени и одржливоста.

На Конференцијата учествуваше и претставничката на Народната банка Даница Уневска Андонова, која го презентира трудот под насловен „Прогнозирање на македонскиот БДП со економски показател изведен преку „Чет џи-пи-ти“: докази од машинското учење“, изработен со коавторите Магдалена Петровска, Неџати Куртиши и Елена Божиновска Стојчевска. Трудот беше претставен на сесијата „Иновации за подобра статистика“, а во него се покажува како можат да се користат алатките на вештачката интелигенција за добивање показател за економските услови од квалитативните одговори од анкетите за очекувањата за растот на БДП и на инфлацијата и за негово вклучување во моделите на машинското учење, заради побрзо и поточно проценување на економската активност во земјава.

Овогодинешната конференција беше посветена на теми што се од директен интерес за пошироката јавност, како што се: користењето на вештачката интелигенција за побрзо следење на инфлацијата и економската активност; новите начини за процена на ризиците од климатските промени за финансискиот систем; подобрувањето на достапноста и квалитетот на економските податоци што им служат на граѓаните и на носителите на политиките и искористувањето податоци од платежните системи за подобро разбирање на потрошувачката на домаќинствата.

Учеството на претставниците на Народната банка на овој значаен меѓународен настан покажува дека статистичката практика во земјава е во чекор со најновите светски трендови во примената на податоците и вештачката интелигенција во централното банкарство.