Едно секојдневно плаќање со Visa картичка му донесе незаборавно доживување на клиент на Комерцијална банка. Банката ја додели главната награда од наградната игра „Плаќај со Visa – Disneyland® Paris те чека!“, а среќниот добитник е Игор Наумоски.

Наумоски заедно со своето семејство ќе отпатува во Disneyland Paris, каде ќе има можност да ужива во магијата на еден од најпознатите забавни паркови во светот.

„Навистина сме пресреќни и благодарни за ова изненадување. Искрено, никогаш не помислив дека едно секојдневно плаќање може да ни донесе ваква можност. Оваа награда за нашето семејство значи многу – заедничко време, нови спомени и едно искуство што долго ќе го паметиме“, изјави Наумоски по примањето на наградата.

На свеченото врачување, д-р Никола Џамбазовски, главен директор за продажба и развој и член на Управниот одбор на Комерцијална банка, му честиташе на добитникот и истакна дека Visa Signature картичката нуди бројни поволности и привилегии за корисниците.

Од Комерцијална банка велат дека и понатаму ќе продолжат да создаваат вредност и нови можности за своите клиенти преку вакви наградни игри и промотивни активности.

Халкбанк АД Скопје започна нова промотивна кампања со која на корисниците им нуди ваучер во вредност од 1.000 денари за гориво од Makpetrol при отворање онлајн сметка.

Од банката информираат дека процесот на отворање сметка се одвива целосно дигитално, брзо и едноставно, без потреба од посета на филијала.

Заинтересираните граѓани можат да ја отворат својата сметка преку онлајн платформата на Халкбанк, по што ќе можат да го искористат промотивниот ваучер за гориво.

Кампањата е дел од напорите на банката за унапредување на дигиталните услуги и олеснување на пристапот до банкарски производи за клиентите.

Дигиталното евро, за кое сè почесто се дискутира во Европа, е замислено како нова форма на јавни пари што ќе им овозможи на граѓаните дополнителна опција за плаќање во дигиталното опкружување, без да ја замени готовината или постојниот банкарски систем.

Според објаснувањата на Европска централна банка, дигиталното евро нема да биде криптовалута, туку дигитална верзија на парите издадени од централната банка, наменета за секојдневни трансакции, онлајн купувања и дигитални плаќања.

Еден од клучните принципи во развојот на проектот е заштитата на приватноста. Од ЕЦБ велат дека личните податоци поврзани со плаќањата ќе бидат достапни само за корисникот и неговата банка или овластен давател на платежни услуги. Во офлајн режим, степенот на доверливост би бил уште повисок, а сите податоци би останале во Европа и би биле заштитени согласно европските стандарди за заштита на податоци.

Граѓаните би ја задржале целосната контрола врз своите средства, а сами би одлучувале кога, како и каде ќе го користат дигиталното евро. Од ЕЦБ нагласуваат дека оваа форма на пари е наменета за секојдневни плаќања и не го менува начинот на кој граѓаните располагаат со своите финансии.

Корисниците нема да отвораат сметки директно во централната банка. Наместо тоа, дигиталното евро ќе се користи преку постојните банки и други овластени платежни институции, кои ќе останат главна контакт точка за клиентите и ќе обезбедуваат поддршка и услуги поврзани со плаќањата.

Воедно, ЕЦБ потенцира дека готовината ќе остане достапна и ќе продолжи да се користи. Дигиталното евро е замислено како дополнување, а не како замена за банкнотите и монетите.

Банката исто така нагласува дека дигиталното евро не треба да се меша со криптоимотот. За разлика од криптовалутите, тоа би било целосно регулирано, би се темелело на сигурна европска инфраструктура и би претставувало јавни пари зад кои стои централната банка.

Сепак, воведувањето на дигиталното евро сè уште не е конечна одлука. За негово официјално воведување потребно е усвојување на соодветна законска рамка од страна на Европски парламент и Совет на Европската Унија.

Од ЕЦБ посочуваат дека во развојот на проектот активно учествуваат граѓани, потрошувачки организации, трговци и даватели на платежни услуги, а нивните мислења ќе продолжат да влијаат врз конечниот изглед на системот.

Основните плаќања со дигитално евро би биле бесплатни за граѓаните, додека за компаниите новиот систем би можел да донесе пониски трансакциски трошоци, поголема конкуренција и поттик за иновации на европскиот пазар на плаќања.

Според европските институции, главната цел на дигиталното евро е да им понуди на граѓаните дополнителен избор во дигиталната економија, со зачувување на приватноста, улогата на банките и достапноста на готовината.