Управата за јавни приходи информира дека на 16 април истекле законските рокови за плаќање на обврските по годишните даночни биланси за 2025 година и апелира до сите обврзници кои сè уште не извршиле уплата, тоа да го сторат во најкус можен рок.

Од институцијата посочуваат дека доцнењето со плаќањето носи дополнителни трошоци по основ на камати, како и ризик од присилна наплата, блокирање на банкарски сметки и други законски мерки.

Според податоците на УЈП, од вкупно 19.550 поднесени биланси за данок на добивка, данок на вкупен приход и персонален данок кај вршителите на дејност, кај 10.252 веќе е евидентирана уплата.

Во меѓувреме, УЈП започна со испраќање персонализирани известувања до компаниите и физичките лица со неизмирени обврски.

Од институцијата апелираат за навремено подмирување на долговите со цел да се избегнат дополнителни давачки, како еднократни такси и банкарски трошоци кои го зголемуваат вкупниот долг и можат да влијаат врз тековното работење.

Како што потсетуваат, обврските можат да се подмират и преку уплата од трето лице, со пребивање со даночни побарувања или преку плаќање на рати, согласно законските услови.

На кампусот на Универзитетот на Југоисточна Европа во Тетово, во саботата (18 април), се одржа националниот натпревар на Економската олимпијада, на кој учествуваа најдобрите средношколци од земјава во областа на економијата.

До финалето стигнаа ученици кои претходно се натпреваруваа во седум регионални центри – Скопје, Тетово, Куманово, Штип, Прилеп, Струга и Гостивар. Националната фаза претставуваше завршница на повеќемесечни подготовки и селекција.

Покрај учениците, на настанот присуствуваа наставници, претставници на институции и компании, при што беше нагласено значењето на економската писменост и критичкото размислување кај младите.

Во регионалната фаза, најдобрите тројца ученици во секој регион беа наградени со технички уреди – лаптоп за прво место, таблет за второ и паметен часовник за трето место.

На национално ниво, првите 10 ученици добија ваучери во вредност од 200 евра, обезбедени од приватниот сектор. Дополнително, најдобрите петмина ќе учествуваат на подготвителен камп и ќе имаат можност да ја претставуваат државата на Меѓународната економска олимпијада во Грција.

Во рамки на натпреварот беа доделени и стипендии за студии на Факултетот за бизнис и економија при Универзитетот на Југоисточна Европа – целосна стипендија за првото место, 70 проценти за второто и 50 проценти за третото место.

Награди добија и менторите, односно координаторите во седумте региони, кои беа наградени со по 200 долари, додека најдобриот координатор на национално ниво доби патување за двајца во Истанбул.

Економската олимпијада во земјава ја организира Институтот Либерална Алтернатива, со поддршка од Economic Fundamentals Initiatives, во партнерство со Универзитетот на Југоисточна Европа и други партнери и спонзори.

Во индустријата за вештачка интелигенција се појавија информации за нов напреден модел развиен од компанијата „Anthropic“, кој, според интерни проценки, не е јавно објавен поради потенцијални безбедносни ризици.

Министрите за финансии, гувернерите на централните банки и водечките експерти од финансискиот сектор изразија сериозна загриженост поради новиот напреден и исклучително моќен модел на вештачка интелигенција, за кој стравуваат дека би можел да ја загрози безбедноста на глобалните финансиски системи.

Станува збор за модел познат како „Claude Mythos Preview“, за кој се наведува дека има напредни способности за анализа на софтверски системи и откривање на сериозни безбедносни пропусти, вклучително и таканаречените „zero-day“ ранливости.

Според достапните информации, моделот во тест-фази идентификувал повеќе критични слабости во оперативни системи и интернет прелистувачи, а неговите можности опфаќаат и симулација на потенцијални начини на нивна злоупотреба во контролирани услови.

Ова, според експертите, отвора сериозни прашања за иднината на сајбер-безбедноста, бидејќи ваквите системи истовремено можат да се користат и за заштита и за потенцијални напади во дигиталниот простор.

Поради ризиците, „Anthropic“ одлучила моделот да остане во ограничена внатрешна употреба, со пристап само за одредени партнери и големи технолошки компании, меѓу кои се „Amazon“, „Google“ и „Microsoft“.

Канадскиот министер за финансии Франсоа-Филип Шампањ предупреди дека ваквите технологии отвораат ризици поврзани со „непознати непознаници“ и повика на итно зајакнување на глобалните заштитни механизми.

Иако дел од експертите повикуваат на претпазливост, случајот повторно ја отвора дебатата дали вештачката интелигенција ќе биде најсилна алатка за сајбер-заштита или потенцијално најопасна алатка за дигитални напади.