Италијанскиот регулатор за конкуренција покрена истрага против Booking.com поради сомнежи дека начинот на рангирање и промоција на сместувачките капацитети може да ги доведе потрошувачите во заблуда и да генерира повисоки приходи од провизии.

Истрагата ја води AGCM, која се фокусира на т.н. програми „приоритетни партнери“ и „приоритетни партнери плус“. Преку нив, издавачите на сместување добиваат поголема видливост на платформата – повисоки позиции во резултатите од пребарување, визуелно истакнување и ознаки што сугерираат подобар квалитет и поволна вредност.

Сепак, според првичните наоди, постои сомнеж дека критериумите за вклучување во овие програми повеќе зависат од висината на провизијата што ја плаќаат изнајмувачите, отколку од реалниот квалитет на понудата.

Од регулаторот предупредуваат дека ваквата практика може да ги наведе корисниците да заклучат дека одредени сместувања се подобар избор, иако тоа не мора да биде така.

Ризик за потрошувачите

Според AGCM, ваквиот начин на претставување може да доведе до тоа корисниците да резервираат поскап сместувачки објект, уверени дека добиваат најдобра вредност за парите. Со тоа се нарушува транспарентноста на пазарот и се влијае врз финансиските одлуки на потрошувачите.

Во рамки на истрагата, италијанската финансиска полиција извршила претрес во просториите на Booking.com во Италија.

Големо пазарно влијание

Податоците на здружението на потрошувачи Codacons покажуваат дека околу 70 проценти од хотелските резервации во Италија се прават преку онлајн платформи, додека Booking.com учествува со околу 42 проценти од пазарот.

„Корисниците имаат право на целосна транспарентност, бидејќи начинот на прикажување на понудите директно влијае врз нивните финансиски одлуки“, посочуваат од Codacons.

Засилен притисок во Европа

Оваа истрага доаѓа во време кога Booking.com се соочува со зголемен регулаторен притисок низ Европа, вклучително и колективни тужби од хотели и високи парични казни. Меѓу нив е и неодамнешната одлука во Шпанија, каде на компанијата ѝ беше изречена казна од 413 милиони евра.

Цените на авионското гориво нагло пораснаа по почетокот на војната со Иран, што директно ќе се одрази врз цената на авионските билети, покажуваат податоците на S&P Global Platts.

По трошоците за работна сила, горивото е најголемата ставка во буџетот на авиокомпаниите. Дополнително, за разлика од европските превозници, голем дел од американските авиокомпании не се заштитуваат од ценовни шокови преку финансиски инструменти, што ги прави поранливи на нагли поскапувања.

Според анализата, цените на авионското гориво во северозападна Европа пораснале за околу 120 отсто од крајот на февруари, додека во САД растот изнесува околу 82 проценти. Во исто време, цената на суровата нафта од типот Брент се зголемила за околу 50 проценти и надминала 100 долари за барел.

Овој јаз меѓу цената на суровата нафта и преработеното авионско гориво, создава сериозен притисок врз авиокомпаниите.

Како одговор на растечките трошоци, авиопревозниците веќе започнаа со зголемување на цените. „Јунајтед ерлајнс“ ги зголеми таксите за багаж за 10 долари, откако „ЏетБлу“ го направи истото неколку дена претходно. Раководството на компаниите најавува дека ќе се обидат целосно да го префрлат зголемувањето на трошоците врз патниците.

Податоците на Дојче банк покажуваат дека просечната цена на домашен лет во САД е околу 50 проценти повисока во споредба со минатата година, доколку билетот се купи три недели однапред.

Во Европа, пак, авиокомпаниите генерално се подобро заштитени од вакви шокови. Ирската нискобуџетна компанија „Рајанер“ веќе обезбедила околу 80 проценти од своето гориво по пониски цени до следната пролет. Сепак, дел од превозниците се соочуваат со сериозни предизвици.

Групацијата „Луфтханза“ разгледува укинување на нерентабилни линии и порано повлекување на постари авиони поради нестабилната геополитичка ситуација. „Скандинавски ерлајнс“ најави откажување на околу 1.000 летови овој месец поради остриот раст на цените на горивото.

И покрај тоа, побарувачката за патувања останува висока, што им овозможува на авиокомпаниите да ги зголемуваат цените без значително намалување на бројот на патници.

Пред повеќе од една година, на македонскиот пазар се појави нов играч со јасна визија: да докаже дека наплатата на побарувања може да биде истовремено ефикасна, професионална и етичка. Денес, Националната агенција за наплата (НАН), горда членка на Flex Group, со гордост ги слави резултатите одбележани со петкратен раст на сите полиња.

Раст заснован на доверба: Како НАН за 18 месеци петкратно ги зголеми своите оперативни капацитети

Кога НАН започна со работа пред повеќе од една година, тимот броеше само петмина ентузијасти кои управуваа со портфолио од 5.000 предмети. Денес, сликата е драстично поинаква. Со портфолио кое надминува 20 милиони евра и база од над 25.000 активни предмети, агенцијата не само што го зголеми својот капацитет за пет пати, туку постави и нови стандарди во индустријата.

Она што ја прави оваа приказна интересна е токму трансформацијата на моделот на наплата. Наместо агресивен пристап, НАН се позиционираше како „медијатор“ помеѓу доверителите и должниците.

Стратегија на доверба: Зошто банките го избраа НАН?

Растот на бизнисот во овој специфичен сектор зависи исклучиво од репутацијата. Фактот што водечките банки и финансиски институции во земјата ја доверуваат својата ликвидност во рацете на оваа агенција, зборува за висок степен на професионализам.

„Нашиот успех не е само во бројките, туку во начинот на кој стигнавме до нив. Успехот на нашите клиенти го третираме како наше единствено мерило. Воведовме ефикасна поддршка и одговорен пристап кои се ретки во овој сегмент, и токму тоа беше препознаено од пазарот“, вели Сања Јовановска, менаџер за продажба во НАН, објаснувајќи ја стратегијата зад овој брз раст.

Човечкиот фактор во дигиталната ера

Иако наплатата се потпира на софистицирани алгоритми и софтверски решенија, срцето на НАН е нејзиниот центар за комуникација. Тимот кој започна со 5 лица, денес е составен од 25 посветени професионалци.

Катерина Цаневска, менаџер за телефонска наплата, го објаснува овој феномен низ призмата на тимот: „Зголемувањето на тимот е директен одговор на зголемениот обем на работа, но и на нашата желба за квалитет. Во телефонската наплата не бараме само дисциплина, туку и емпатија. Нашата цел е да најдеме решение за должниците, да им помогнеме да го расчистат својот долг и повторно да се вклучат во економскиот живот со чист образ. Токму човечкиот пристап е она што го прави нашиот тим посебен.“

Што носи иднината?

Со зацврстена позиција во рамките на Flex Group, НАН најавува понатамошна дигитализација и проширување на услугите. Во првата година докажаа дека може да растат брзо; во втората година, нивниот фокус е уште посилно да ја докажат тезата дека наплатата со достоинство е единствениот одржлив модел на македонскиот пазар.