Компанијата за вештачка интелигенција Anthropic објави дека обезбедила приватно финансирање во вредност од 65 милијарди долари, со што нејзината проценета вредност достигна 965 милијарди долари и ја направи највредниот стартап во светот во областа на вештачката интелигенција.

Петгодишната компанија, позната по својот четбот Claude, сега го надминува својот главен конкурент OpenAI и според пазарната вредност и според пријавените приходи. Од Anthropic наведуваат дека остваруваат годишни приходи од 47 милијарди долари преку продажба на својата технологија на компании и корисници кои го користат Claude за програмирање и извршување различни деловни и лични задачи.

Anthropic е основана во 2021 година од поранешни раководители на OpenAI, а аналитичарите очекуваат компанијата во иднина да излезе на берза, заедно со OpenAI и компанијата SpaceX на Илон Маск. Сепак, сите три компании и натаму трошат повеќе средства отколку што заработуваат, што повторно ги отвора прашањата за можен балон на пазарот на вештачка интелигенција.

Новата рунда финансирање ја предводеле инвестициските компании Altimeter Capital, Dragoneer Investment Group, Greenoaks Capital и Sequoia Capital.

„Ова финансирање ќе ни помогне да одговориме на историски високата побарувачка што ја бележиме во моментов, да останеме во самиот врв на истражувањата и да го донесеме Claude на уште повеќе места каде што се одвива бизнисот“, изјави финансискиот директор на Anthropic, Кришна Рао.

Компанијата истовремено го претстави и својот најнов модел за вештачка интелигенција Claude Opus 4.8, за кој тврди дека е уште поефикасен во програмирањето и професионалните задачи од претходните верзии.

Брзиот раст на Anthropic и сè поголемата популарност на Claude создадоа дополнителен притисок врз OpenAI, кој се обидува да го задржи чекорот со конкуренцијата и покрај фактот што ChatGPT беше производот што ја поттикна глобалната експанзија на комерцијалната вештачка интелигенција.

Во меѓувреме, Anthropic најави дека ќе го информира Одборот за финансиска стабилност (FSB) за потенцијални сајбер-ранливости во глобалниот финансиски систем откриени од неговиот нов модел Mythos. Овој модел, претставен во април, е развиен за откривање долгогодишни безбедносни пропусти во интернет-прелистувачи, инфраструктура и софтвер.

Компанијата неодамна беше и во спор со Пентагон, откако одби да ги ублажи ограничувањата за користење на моделот Claude во автономно оружје и системи за масовен надзор. Американското Министерство за одбрана потоа ја стави компанијата на црна листа како „ризик во синџирот на снабдување“, но таа одлука беше блокирана од федерален судија во Калифорнија, кој оцени дека на тој начин биле нарушени уставните права на компанијата.