Централна кооперативна банка АД Скопје ја промени адресата на своето седиште, информираше банката преку Македонската берза.

Новото седиште на банката се наоѓа на улица „Столтенбергова“ број 2 во Скопје.

Промената е направена по претходна согласност од Извршниот одбор на Народната банка, дадена со решение од 24 јули 2026 година, а измената на Статутот и новата адреса се запишани во Централниот регистар на 1 септември 2026 година.

Од Централна кооперативна банка нагласуваат дека нема други промени во работењето на институцијата. Матичниот број, сметката и даночниот број остануваат непроменети.

Во иднина банката во правниот промет со трети лица ќе ја користи новата адреса на седиштето.

Информацијата е објавена денеска, 3 септември, како ценовно чувствителна информација согласно Правилата за котација.

Комерцијална банка АД Скопје обезбеди нова кредитна линија во износ од четири милиони евра од Европската банка за обнова и развој (ЕБОР), наменета за поддршка на инвестиции во енергетска ефикасност во домаќинствата, станбените згради и јавниот сектор.

Кредитната линија е дел од програмата Western Balkans Green Economy Financing Facility III (WB GEFF III), преку која ќе се финансираат проекти за подобрување на енергетската ефикасност и користење зелени технологии.

Средствата ќе може да се користат за инвестиции во термичка изолација, енергетски ефикасни прозорци и врати, современи системи за греење и ладење, топлински пумпи, фотоволтаични системи и други технологии кои придонесуваат за намалување на потрошувачката на енергија.

Кредитите ќе бидат достапни со максимален износ до 50.000 евра и рок на отплата до 20 години. По успешното реализирање на проектот, предвидена е и можност за грант во висина до 20 проценти од вредноста на инвестицијата.

Договорот за новата кредитна линија го потпишаа Билјана Максимовска-Поповиќ, главен директор за корпоративно банкарство и член на Управниот одбор на Комерцијална банка, и Фатих Туркменоглу, претставник на ЕБОР за Северна Македонија.

„Како една од водечките банки во земјата, Комерцијална банка продолжува активно да ги поддржува инвестициите што носат долгорочни придобивки за клиентите, економијата и за животната средина. Преку оваа кредитна линија, повторно ќе придонесеме за подобрување на енергетската ефикасност, за намалување на емисиите на штетни гасови и за зголемување на отпорноста на енергетските предизвици“, изјави Максимовска-Поповиќ.

Ова е петта кредитна линија што Комерцијална банка ја реализира во рамките на програмата GEFF, преку која банката ја продолжува поддршката на инвестициите во енергетска ефикасност, обновливи извори на енергија и одржлив економски развој.

Програмата се спроведува со поддршка од Европската Унија преку Заедничкиот европски фонд за Западен Балкан и Рамката за инвестиции во Западен Балкан, додека дополнителната техничка соработка е поддржана од Фондот за соработка Јапонија-ЕБОР.

Вработените од експозитурата на НЛБ во Охрид беа дел од 30. Републички пензионерски спортски натпревари, кои се одржаа во комплексот „Билјанини извори“ во Охрид, во годината кога се одбележуваат 80 години пензионерско организирање во Македонија.

НЛБ со пензионерската заедница гради долгогодишна соработка, која опфаќа активности поврзани со финансиска едукација, поголема финансиска сигурност, спорт и дружење.

Од НЛБ посочуваат дека учеството на спортските натпревари е уште една можност за поддршка на активниот живот и создавање позитивни моменти за пензионерите.

„Активниот живот не завршува со пензионирањето. Напротив, токму тогаш можат да започнат нови навики, пријателства и нови причини за движење“, порачаа од Банката.

Со своето учество на јубилејниот настан, НЛБ даде придонес кон традицијата која повеќе децении ги обединува пензионерите од целата земја преку спорт, дружење и активен начин на живот.

Од Банката упатија честитки за 30. Републички пензионерски спортски натпревари и порака до пензионерите за уште многу години исполнети со спорт, дружење и активен живот.