Во новите простории на Семос Едукација, лоцирани на Кејот на реката Вардар, денес свечено започна AI Fest 2025, најголемиот фестивал посветен на вештачката интелигенција во регионот. Овој уникатен настан кој ќе трае 50 дена, сé до 5 јуни, и ќе вклучи бројни активности и обуки за усвојување на вештини поврзани со вештачката интелигенција. 

Почетокот на AI Fest 2025, кој се одржа на 8 април 2025 година, го одбележаа:

• 60 бесплатни вебинари на 18 различни теми, насочени кон бизнис корисници, ИТ професионалци и AI ентузијасти;

• Обид за поставување на GUINNESS WORLD RECORDS™ за најголем број корисници вклучени во AI онлајн сесии во период од 24 часа;

• Панел-дискусии, практични обуки, испити и многубројни интерактивни активности за различни целни групи.

Фестивалот се одржува како дел од Националната иницијатива за развој на AI вештини, глобален проект креиран од Microsoft во соработка со партнери низ светот, меѓу кои и Семос Едукација како официјален партнер за Македонија и регионот.

Иницијативата беше поддржана од Министерството за дигитална трансформација и партнерите Support and SolutionsCenter, Стопанска банка, Телеком, Триглав Осигурување и други компании и институции, кои ја препознаа важноста на развојот на AI капацитети во земјата.

Министерот за дигитална трансформација, Стефан Андоновски, кој присуствуваше на отворањето, изјави:
„Сепак, дигиталната трансформација не е само за институции или компании. Таа почнува со секој поединец. Во новата дигитална ера, дигиталната писменост е новата писменост. Затоа вложуваме во програми за преквалификација, дигитална едукација за ранливи групи, и посебно во создавање на AI вештини кај младите”.

Семос Едукација уште еднаш покажа зошто е водечки образовен центар во областа на информатичките технологии во Македонија. Со организацијата на AI Fest 2025, компанијата ги постави темелите за понатамошен развој на вештини и компетенции поврзани со вештачката интелигенција – критични за иднината на индивидуалците, компаниите и целото општество.

Валентина Тасева, сопственик и директор на Семос Едукација, изјави:
” Националната иницијатива за развој на AI вештини претставува стратешки чекор напред, со кој обезбедуваме секој граѓанин, од студент до искусен професионалец, да има пристап до квалитетна едукација и практични знаења во областа на вештачката интелигенција. Македонија мора да биде препознаена ширум светот! За следната генерација, за младите, единствениот пат кон модерно и развиено општество е преку технологија — а вештачката интелигенција е најветувачката можност во моментов.”

Повеќе информации за настанот и реализираните активности може да се најдат на официјалните веб-страници: https://ainsi.mk и https://semosedu.mk/semos-ai-courses

Управата за јавни приходи (УЈП) продолжува со спроведување на дигиталната трансформација, во тесна соработка со Светска банка. Во рамките на оваа стратешка соработка, одржан е координативен состанок меѓу тимот на УЈП и експертите од Светска банка, со цел следење на напредокот и усогласување на идните чекори во процесот на дигитализација.

Дигиталната реформа на УЈП е дел од поширока иницијатива за модернизација на јавните институции и подобрување на квалитетот на услугите кон граѓаните и деловната заедница. Реформата се спроведува со финансиска поддршка од Светска банка, преку заемски и грант-средства, кои се насочени кон реализација на конкретни, технолошки и организациски подобрувања.

На координативниот состанок беа разгледани неколку клучни прашања:

• Терминско усогласување на јавните набавки – со цел навремена и ефикасна реализација на проектните активности;

• Координација за експертска поддршка и обуки – што ќе овозможи зголемување на капацитетите на вработените и подобро управување со процесите;

• Прилагодување на приоритетите – во согласност со динамиката на реализација и потребите на корисниците.

Во рамки на дигитализацијата, во моментов се спроведуваат неколку клучни проекти:

• Развој на складиште на податоци (Data Warehouse) за подобрено управување и анализа на фискалните информации;

• Имплементација на алатки за деловна интелигенција (Business Intelligence), кои ќе овозможат попрецизни извештаи и поддршка при одлучување;

• Модернизација на даночните услуги и Контакт центарот, што директно ќе придонесе кон подобро корисничко искуство.

Соработката со Светска банка се одвива со високо ниво на професионалност и взаемна посветеност, а очекувањата се дека овие проекти значително ќе ја зголемат ефикасноста, транспарентноста и довербата во УЈП. Оваа иницијатива претставува значаен чекор кон создавање на дигитално одговорна, модерна и граѓански ориентирана администрација.

Под водство на нивниот ментор, наставничката Соња Јорданоска, Марин Христоски и Алексеј Мицкоски обезбедија победа на годинешниот национален натпревар за Европскиот квиз за пари, организиран од Македонската банкарска асоцијација (МБА) со поддршка од Народната банка и Комисијата за хартии од вредност. Учениците со менторката, придружувани од одговорното лице на одделението за едукација при МБА – Јована Лозановска, со гордост ќе ја претставуваат Република Северна Македонија на европското финале во Брисел, Белгија, на 23 мај.

Второто место на националниот натпревар го освоија Ана Грбиќ и Мила Игњатовска од СЕПУГС Васил Антевски-Дрен од Скопје под менторство на професорката Билјана Ниновска, а третопласирани беа Катја Ивановска и Никифор Кискоски од ООУ Љубен Лапе Аеродром, Скопје, предводени од менторката Андријана Савеска.

Овогодинешниот национален натпревар забележа импресивно учество, со 518 пријавени тимови од 91 училиште во државата, а под менторство на 104 професори/наставници. За квизот на македонски јазик беа пријавени вкупно 480 тимови, додека пак за квизот на албански јазик се пријавија 38 тимови.

Во вториот круг, чиј домаќин беше седиштето на МБА, се натпреваруваа најдобрите 4 тимови од првиот, на крајот одредувајќи го најдобриот тим.