Халкбанк ја промовира својата услуга „Онлајн депозит“, која им овозможува на клиентите дигитално, брзо и едноставно да ги орочат своите средства без посета на филијала.

Во понудата се достапни повеќе рокови на орочување со фиксни каматни стапки во денари и евра. За депозит со рок од 13 месеци банката нуди каматна стапка од 3,2 проценти во денари и 2,4 проценти во евра. За орочување на 25 месеци каматата изнесува 3,4 проценти во денари и 2,6 проценти во евра.

Највисока каматна стапка е предвидена за депозитите со рок од 36 месеци, при што клиентите можат да остварат принос од 3,5 проценти за штедење во денари и 2,7 проценти за штедење во евра.

Од Халкбанк посочуваат дека услугата е наменета за корисници кои сакаат своите заштеди да ги управуваат онлајн, со едноставна процедура и однапред познати услови за орочување.

Филијалата на Халкбанк во Тафталиџе се претвори во сцена за уникатно музичко доживување. Во духот на светските Tiny Desk и Secret Experience концепти, клиентите и посетителите имаа можност да уживаат во ексклузивен pop-up концерт на популарниот музички артист, Young Dadi и неговиот бенд.

Наместо со вообичаено банкарско секојдневие, филијалата вчера беше исполнета со музика, енергија и опуштена атмосфера, а клиентите и вработените за момент ги ставија своите обврски на пауза и уживаа во хитовите на Young Dadi.

Со ова искуство, Халкбанк уште еднаш ја потврди својата определба банката да биде повеќе од простор со шалтери, документи и трансакции. Таа може да биде и место за уникатно доживување, спонтана дружба, споделена доверба и вистински човечки поврзувања.

„Нашата идеја е да ја смениме перцепцијата на луѓето за униформираниот изглед и строго корпоративниот стил на банкарските филијали. Да покажеме дека Халкбанк, покрај квалитетни и поволни услуги, на своите клиенти може да им понуди и едно поинакво искуство кое не е директно поврзано со банкарското портфолио. Нема подобар начин за тоа од внесување на креативноста, уметноста и урбаната култура во брзото секојдневие на луѓето“, вели Маја Наумовска Савеска, директорка на корпоративни и маркетинг комуникации во Халкбанк.

Pop-up настапот на Young Dadi е само дел од серијата настани кои Халкбанк ги организираше во своите филијали. Претходно, во повеќе филијали низ Македонија беа поставени изложби на уметнички дела, се организираа летни инсталации, настани за пензионери и креативни работилници за деца.

„Важни се луѓето“ и „Важна е културата“ не се само пораки на банката, туку начин на кој таа ја гради секојдневната комуникација, од односот меѓу вработените и клиентите, до соработката и поддршката на креативната сцена, културата и музиката.

Настапот на Young Dadi во Халкбанк донесе токму таква енергија и емоција. Блиска, автентична и неочекувана, покажувајќи дека некогаш најубавите моменти се случуваат токму таму каде што најмалку ги очекуваме.

Гувернерот на Народната банка д-р Трајко Славески, во рамките на Годишното собрание на Европската банка за обнова и развој (ЕБОР), коешто се одржува во Рига, оствари работна средба со директорот на ЕБОР за Југоисточна Европа, Гжегож Желињски. На средбата присуствуваше и Фатих Туркменоглу, постојан претставник на ЕБОР во нашата земја.

Во текот на разговорите беше истакната досегашната соработка меѓу Народната банка и ЕБОР преку поддршката на одржливиот економски развој на земјата, при што посебно внимание им беше посветено на активностите насочени кон унапредување на финансиската вклученост и подобрување на пристапот до финансии за различни категории корисници, вклучително и жените претприемачи.

„Народната банка активно работи на унапредување на финансиската едукација и вклученост, како и на поддршка на женското претприемаштво преку Кодексот за финансирање жени претприемачи. Во наредниот период, активностите ќе бидат насочени кон проширување на коалицијата и подобрување на податоците“, истакна Славески.

Исто така, на средбата, беше разговарано и за подготвителните активности на Народната банка за ефикасно спроведување на Законот за решавање банки, којшто ќе почне да се применува во втората половина од оваа година. Во таа смисла, беше истакната подготвеноста на ЕБОР за обезбедување поддршка за Народната банка и за банкарскиот систем за ефикасна операционализација на овој закон, особено во однос на новите барања на банките за исполнување на т. н. минимална стапка на сопствени средства и дозволени обврски.

Гувернерот Славески ја истакна и поддршката што ЕБОР ја обезбедува за финансирањето обновливи извори на енергија во земјава, како придонес за јакнењето на енергетската сигурност во земјава.

На средбата беше потврдена заедничката подготвеност за понатамошно продлабочување на институционалната соработка меѓу Народната банка и ЕБОР, особено во областите на дигиталната трансформација на финансискиот сектор, одржливото финансирање и зајакнувањето на отпорноста и стабилноста на финансискиот систем.