Купувањето евтини производи од платформи како Temu, Shein и AliExpress наскоро би можело значително да поскапи, откако Eвропската Комисија најави нови правила за мали пратки што пристигнуваат од земји надвор од Европската Унија, пред сè од Кина.

Според планот, од 1 јули 2026 година би се вовела посебна такса за пратки со вредност под 150 евра, кои досега често пристигнуваа без дополнителни трошоци. Предвидена е паушална такса од три евра по пакет, а можно е да има и дополнителни давачки во зависност од видот на производот.

Податоците на Европската комисија покажуваат дека во ЕУ секојдневно пристигнуваат околу 12 милиони мали пакети, при што дури 91 процент доаѓаат од Кина.

Главната причина за новите мерки е засилување на контролата врз евтините производи кои, според Брисел, често не ги исполнуваат безбедносните стандарди на ЕУ, особено кога станува збор за козметика, електроника и производи за деца.

Новите правила би можеле да создадат и дополнителни трошоци за купувачите кои не се задоволни од нарачаната стока. Иако враќањето на пратките ќе остане можно, царинските давачки и дополнителните трошоци најверојатно нема да бидат рефундирани.

Најпогодени би биле токму кинеските платформи кои последниве години доживеаја огромна популарност во Европа благодарение на ниските цени и бесплатната достава.

Во меѓувреме, големите логистички компании како DHL, FedEx и UPS предупредуваат дека новите правила може да предизвикаат доцнења и дополнително оптоварување на царинските системи низ Европа.

Iute Group објави дека успешно пласирала дополнителни 140 милиони евра од својата постојна обврзница, со што вкупниот износ на издадени обврзници достигна 300 милиони евра.

Компанијата, која работи на пазарите во Југоисточна Европа, соопшти дека новото приватно пласирање е дел од нејзината стратегија за понатамошен раст и зајакнување на финансиската позиција.

Iute Group е финтек компанија со седиште во Естонија, која нуди потрошувачки кредити, платежни услуги и банкарски решенија на пазарите во регионот на Југоисточна Европа.

Со зголемувањето на обемот на обврзницата на 300 милиони евра, компанијата дополнително го проширува пристапот до капитал за поддршка на своите активности и идни инвестиции.

Советот на Европската Унија донесе одлука привремено да ги укине царините за увоз на азотни ѓубрива што се користат во земјоделското производство, како и за суровините за производство на ѓубрива, со цел да се намалат трошоците во производството на храна и кај производителите на ѓубрива.

Според Европската Комисија, се проценува дека поради укинувањето на царинските давачки увозните трошоци ќе се намалат за околу 60 милиони евра.

Дополнителна придобивка од мерката е продолжување на намалувањето на зависноста од ѓубрива што доаѓаат од Русија и Белорусија, како и диверзификација на трговијата со овие производи.

„Оваа одлука им овозможува на европските земјоделци подобар пристап до достапно и сигурно снабдување со ѓубрива. Тоа е добра вест и за земјоделскиот сектор и за потрошувачите. Во исто време го забрзуваме намалувањето на зависноста од Русија и Белорусија и градиме поотпорни синџири на снабдување и партнерства во други делови од светот“, изјави министерот за финансии на Кипар, Макис Керавнос.

Неговата земја до крајот на јуни претседава со ЕУ.

Во пракса, привременото укинување на царините ќе важи само за производи кои сè уште не се увезуваат во ЕУ по преференцијален режим без царини. За да се балансираат интересите на сите учесници на пазарот, мерката е ограничена на количина еднаква на увозот по преференцијален режим во 2024 година, плус дополнителни 20 проценти од увозот од Русија и Белорусија во истата година.

Укинувањето на царините нема да важи за ѓубривата увезени од Русија и Белорусија.

Иако мерката е предвидено да важи една година од објавувањето во Службениот весник на ЕУ, Брисел ќе ја следи состојбата на пазарот на ѓубрива и, доколку биде потребно, ќе предложи измени во спроведувањето или продолжување на рокот на важност.

Во 2024 година, ЕУ увезла два милиони тони амонијак и 5,9 милиони тони уреа за производство на азотни ѓубрива. Дополнително биле увезени 6,7 милиони тони азотни ѓубрива и мешавини што содржат азот.

Иако значителен дел од овие производи доаѓаат од земји кои веќе имаат преференцијален царински третман, големи количини и натаму се увезуваат од држави за кои важи стандардниот царински режим, при што царинските стапки моментално се движат меѓу 5,5 и 6,5 проценти.