Во текот на минатата недела сопственик смениле 6.363 акции преку 17 нетрговски трансфери, покажуваат податоците на Централниот депозитар за хартии од вредност. Станува збор за преноси што не се реализираат преку берзанско тргување, туку врз основа на подароци, наследувања и други законски дозволени основи.

Речиси сите пренесени хартии од вредност се обични акции, издадени од 14 компании котирани на Македонската берза. Најголем број акции, вкупно 1.940, биле процесуирани во петокот.

Во текот на неделата биле реализирани три преноси со акции на Комерцијална банка, со вкупно 347 обични акции. Во понеделник биле пренесени 163, во вторник 20, а во среда уште 164 акции. Акцијата на Комерцијална банка ја завршила неделата со просечна цена од 26.325,87 денари.

Кај Макпетрол биле евидентирани два нетрговски трансфери, од кои 10 акции во вторник и 4 акции во четврток. Просечната вредност на оваа акција изнесувала 112.500 денари.

Најголемиот поединечен нетрговски пренос бил кај Макстил, каде што сопственик смениле 1.429 акции. Според последното берзанско тргување од 25 јуни, просечната цена на акцијата изнесувала 122 денари.

Втор најголем трансфер бил забележан кај Оилко КДА, со 1.330 обични акции. Во изминатите 52 недели имало едно берзанско тргување со акциите на ова командитно друштво, при што просечната цена изнесувала 6.000 денари.

Преку нетрговски трансфер биле пренесени и 1.284 обични акции на Гранит, чија просечна вредност изнесувала 1.506,69 денари, како и 1.130 акции на Македонски Телеком, со просечна цена од 499,91 денар за акција.

Во статистиката се евидентирани и трансфери на 318 обични акции на Алкалоид, 197 акции на РЖ Услуги и 100 акции на Реплек. Пренос имало и кај 69 акции на Уготур, 64 акции на РЖ Интер-Трансшпед, 26 акции на РЖ Техничка контрола и 23 акции на РЖ Економика.

Единствените приоритетни акции што минатата седмица го смениле сопственикот преку нетрговски трансфер се 32 акции на Стопанска банка Скопје.

Халкбанк АД Скопје продолжува да ја збогатува својата понуда на инвестициски услуги, овозможувајќи им на клиентите директен пристап до Истанбулската берза – една од најдинамичните и најбрзорастечки берзи во светот.

Со оваа нова можност, клиентите на Банката добиваат пристап до пазар кој претставува мост меѓу Европа и Азија и кој нуди широк спектар на инвестициски можности, од акции на водечки компании и удели во ЕТФ фондови, до други финансиски инструменти достапни на турскиот пазар на капитал.

Истанбулската берза, официјално позната како Borsa Istanbul (BIST), денес е дом на повеќе од 650 компании од различни индустрии, од банкарство, енергетика и автомобилска индустрија, до воздухопловство, технологија и телекомуникации. Со значителна пазарна капитализација која се мери во стотици милијарди долари и висока ликвидност, таа се вбројува меѓу најатрактивните пазари во развој за инвеститорите ширум светот.

Преку новата услуга на Халкбанк, македонските инвеститори добиваат можност да инвестираат во акции на некои од најпознатите турски и регионални компании.

Дополнителна предност за инвеститорите е можноста за диверзификација на нивните вложувања преку изложеност на различни сектори и компании со значително регионално и меѓународно присуство. Воедно, Истанбулската берза нуди пристап до компании кои бележат континуиран раст и развој, што создава дополнителен потенцијал за остварување принос на долг рок.

„Како банка која постојано ги следи потребите на клиентите и трендовите на финансиските пазари, наша цел е да обезбедиме современи инвестициски решенија и нови можности за раст на капиталот. Пристапот до Истанбулската берза претставува значајно проширување на нашата понуда и дополнителна можност за клиентите кои сакаат да ги диверзифицираат своите инвестиции и да станат дел од успешни компании кои го движат економскиот развој на регионот”, велат од Халкбанк.

За македонските инвеститори, турскиот пазар има и дополнителна предност. Турција е еден од најзначајните економски партнери на земјава, а голем број турски компании и брендови се веќе добро познати на домашниот пазар. Ова создава поголема доверба и придонесува инвеститорите полесно ги препознаат можностите и потенцијалот на компаниите во кои вложуваат.

Тргувањето се одвива преку целосно оптимизиран систем, со професионална поддршка од тимот на Халкбанк, ниски трансакциски трошоци и максимална транспарентност.

Повеќе информации за можностите за инвестирање и условите за тргување заинтересираните клиенти можат да добијат од тимот за брокерски услуги на Халкбанк
или на е-mail: [email protected].

Намалувањето на тензиите на Блискиот Исток веднаш се одрази врз глобалните финансиски пазари. Инвеститорите позитивно ја примија најавата за мировен договор меѓу САД и Иран, што доведе до значителен пад на цените на нафтата, слабеење на американскиот долар и раст на берзанските индекси ширум светот.

Фјучерсите на суровата нафта Брент се намалија за повеќе од 4% и се тргуваа по цена од 83,82 долари за барел, додека доларот ослабе поради намалувањето на геополитичките ризици и ублажените инфлаторни очекувања.

Пазарните аналитичари оценуваат дека инвеститорите очекуваат стабилизирање на снабдувањето со енергенси и намалување на ризиците од нарушување на клучните транспортни рути, особено во регионот на Ормутскиот теснец.

„Ќе треба време за да се види колку брзо теснецот навистина ќе се отвори повторно и колку време ќе биде потребно протокот на нафта да се врати во нормала. Секако ќе бидат потребни месеци, а не недели“, изјави Ник Твидејл, главен пазарен стратег во ATFX Global.

И покрај позитивните реакции на пазарите, аналитичарите предупредуваат дека инвеститорите и натаму внимателно ќе го следат развојот на настаните, бидејќи долгорочната стабилност ќе зависи од конкретната имплементација на договорот и нормализирањето на глобалните енергетски текови.