Извршниот одбор на Народната банка донесе одлука стапката на противцикличниот заштитен слој на капиталот за изложеностите на банките во земјава да остане на истото ниво од 2%. Одлуката е донесена врз основа на редовната квартална оцена на системските ризици, според податоците заклучно со првиот квартал од 2026 година. Оваа стапка ќе важи од третото тримесечје на 2027 година и се оценува дека таа е соодветна на тековните макрофинансиски услови и на состојбите во банкарскиот систем.

На кредитниот пазар и натаму има солидна кредитна активност, но банкарскиот систем е добро капитализиран и ликвиден, со задржана стабилност и отпорност на шокови. Тоа е видливо и преку ниската стапка на нефункционални кредити, којашто и натаму опаѓа, и преку солидната профитабилност.

Одлуката за задржување на истата стапка на противцикличниот заштитен слој на капиталот е поддржана и од построгите макропрудентни мерки за квалитетот на кредитната побарувачка. Тие се во примена од крајот на претходната година, а во првото тримесечје од 2026 година се забележуваат првичните влијанија преку подобрата структура на новите кредити од аспект на кредитните стандарди применети од страна на банките. Ваквата поставеност на макропрудентните мерки би придонесла за ограничување на системските ризици во следниот период и за натамошно задржување на стабилноста и отпорноста на банкарскиот сектор. Народната банка ќе продолжи со внимателно следење на системските ризици и редовно, на квартална основа, ќе ја преоценува висината на стапката.

Повеќе од 130 вработени во НЛБ Банка, вклучувајќи ги и членовите на Управниот одбор, учествуваа во еколошка акција за чистење на Водно, со цел придонес кон зачувување на животната средина и подобрување на јавните простори.

Акцијата се одржа под мотото „За почисто Водно“, а волонтерите собираа отпад од зелените површини и рекреативните патеки на планината, која претставува едно од најпосетуваните природни подрачја во Скопје.

Од Банката информираат дека преку различни еколошки иницијативи досега биле реализирани повеќе од 400 волонтерски часови. Според нив, ваквите активности се дел од заложбите за заштита на природата, подигнување на еколошката свест и унапредување на квалитетот на живот во заедницата.

Посебен акцент на настанот било учеството на деца, со што дополнително се промовира важноста од развивање одговорен однос кон животната средина уште од најрана возраст.

Од НЛБ Банка посочуваат дека ќе продолжат да поддржуваат и организираат проекти кои придонесуваат за одржлив развој, зачувување на природните ресурси и јакнење на еколошката култура.

Меѓу активностите реализирани во изминатиот период се и акцијата „За почиста Виница“, во која се вклучиле вработените од експозитурите во источниот регион, како и донацијата на садници од лаванда за Холандскиот парк во Охрид.

Еколошките и општествено одговорни проекти се дел од стратегијата на НЛБ Групацијата и се реализираат во сите земји каде што таа работи.

Народната банка одлучи да ја зголеми основната каматна стапка за 0,25 процентни поени, односно од 4 на 4,25 отсто, со цел да одговори на засилените инфлациски ризици и неизвесностите поврзани со глобалните економски случувања.

Одлуката била донесена на редовната седница на Извршниот одбор за поставеноста на монетарната политика, при што биле земени предвид најновите податоци за домашната економија, состојбите на девизниот пазар и меѓународното окружување.

Во Народната банка посочуваат дека и покрај стабилизацијата на побарувачката на девизи во последниот период, економските последици од геополитичките тензии и натаму се присутни. Дополнително, инфлацијата иако забавува, останува на релативно високо ниво, што бара претпазлив пристап во водењето на монетарната политика.

Според последните податоци, годишната стапка на инфлација во мај се намали на 4,8 отсто, во споредба со 5,7 проценти во април. Сепак, централната банка предупредува дека растот на цените на енергенсите и понатаму претставува ризик кој може да се прелее и врз останатите сегменти на економијата.

На крајот на мај девизните резерви достигнале 5,21 милијарди евра и остануваат во сигурната зона, додека девизниот пазар функционирал стабилно без потреба од интервенции на централната банка.

Домашната економија, според оценките на Народната банка, и понатаму покажува отпорност. Во првиот квартал од годинава бруто-домашниот производ пораснал за 3,1 отсто, што е во согласност со претходните проекции. Истовремено, кредитната активност продолжува да расте со посилно темпо од очекуваното, што дополнително влијае врз домашната побарувачка.

Од Народната банка нагласуваат дека ќе продолжат внимателно да ги следат движењата во домашната и светската економија и дека остануваат посветени на одржување на стабилноста на девизниот курс на денарот во однос на еврото и на зачувување на ценовната и финансиската стабилност.