Седма година по ред на Македонска берза успешно се одржа „Инвеститорски ден“ на којшто сите домашни физички лица имаа можност да тргуваат со акции на сите пазарни сегменти без да ги платат провизиите кон Берзата, Централниот депозитар на хартии од вредност и овластените пазарни учесници (банки и брокерски куќи), во износ на остварен промет до 10.000 евра.

На вчерашниот „Инвеститорски ден“ на Берзата се склучија вкупно 335 нормални трансакции, што претставува најголем број склучени трансакции во еден ден во 2026 година. Споредбено, просечниот број на склучени трансакации со акции во 2026 година изнесува 66 трансакции.  Дополнително, во БЕСТ системот на Берзата се внесени вкупно 497 налози за тргувањe, што претставува повторно најголем број на внесени налози во берзанскиот систем за тргување во текот на оваа година.

Вкупниот промет од тргување во БЕСТ системот со акции на „Инвеститорскиот ден“ на Берзата надмина 670 илјади евра, односно изнесува околу 41 милиони денари.  

Иницијативата „Инвеститорскиот ден“ ја прифатија и во неа активно се вклучија сите единаесет членки на Берзата (Еурохаус, Илирика Инвестментс, Иново Брокер, Инвестброкер, Комерцијална банка, НЛБ Банка, Стопанска банка Скопје, ТТК Банка, Фершпед брокер, Шпаркасе Банка Скопје и Халк Банка Скопје) и Централниот депозитар за хартии од вредност, а истата доби поддршка и од Комисијата за хартии од вредност.

Берзанските индекси на Волстрит во понеделникот забележаа пад, предводен од акциите на производителите на чипови, откако повеќе директори на технолошки компании повикаа на забавување на развојот на вештачката интелигенција поради ризиците од нејзина злоупотреба.

Индексот Dow Jones се намали за 0,29 отсто, на 52.421 поен, S&P 500 падна за 0,48 отсто, на 7.619 поени, додека Nasdaq загуби 0,56 отсто и заврши на 26.186 поени.

Најголем притисок претрпе технолошкиот сектор. Предупредувањата за можните ризици од брзиот развој на вештачката интелигенција ги загрижија инвеститорите, особено имајќи предвид дека технолошките компании вложија милијарди долари во оваа област. Токму инвестициите во ВИ во изминатиот период беа еден од главните двигатели на растот на технолошките акции и на берзанските индекси.

Акциите на Nvidia паднаа за 3,4 отсто, додека Broadcom, AMD и Micron Technology загубија меѓу четири и пет отсто. Индексот PHLX, кој го следи секторот на полупроводници, потона за речиси шест отсто. И покрај овој пад, индексот и натаму бележи раст од околу 57 отсто од почетокот на годината.

Инвеститорите се претпазливи и во пресрет на седницата на американската централна банка во среда, кога се очекува одлука за каматните стапки.

До неодамна пазарите очекуваа Федералните резерви да ги задржат каматните стапки непроменети, но очекувањата се променија по податоците кои покажаа раст на инфлацијата во САД, пред сè поради повисоките цени на нафтата. Според пазарните проценки што ги пренесува Хина, веројатноста ФЕД да ги зголеми каматите за 0,25 процентни поени изнесува речиси 90 отсто.

Негативното расположение се пренесе и на азиските берзи. Индексот MSCI за азиско-пацифичкиот регион во вторникот наутро беше во минус од 0,2 отсто.

Акциите во Индија, Шангај, Хонг Конг, Австралија и Јужна Кореја паднаа меѓу 0,1 и 0,9 отсто, додека јапонскиот пазар забележа благ раст.

Македонската берза ја заврши неделата од 7 до 11 септември со намалена активност и вкупен промет од 34,6 милиони денари, односно околу 564 илјади евра. Во споредба со претходната недела, прометот е намален за 32,25 проценти.

Во текот на неделата биле реализирани 176 трансакции, што е за 25 помалку од претходниот период, а биле истргувани вкупно 7.140 акции и обврзница.

Најголем промет оствариле акциите на Комерцијална банка Скопје со 18,4 милиони денари. Следуваат Алкалоид Скопје со 6,5 милиони денари и Македонски Телеком Скопје со 2,3 милиони денари. Акциите на Макпетрол оствариле промет од 1,17 милиони денари, а на НЛБ Банка 1,13 милиони денари.

Во текот на неделата раст на вредноста забележале две акции. Најголем раст имале акциите на НЛБ Банка од 1,03 проценти, додека акциите на Макпетрол пораснале за 0,85 проценти.

Од друга страна, најголем пад забележале акциите на Комерцијална банка, чија вредност се намалила за 1,21 процент. Акциите на Алкалоид паднале за 0,87 проценти, на Македонски Телеком за 0,8 проценти, а на Реплек за 0,69 проценти.

Според бројот на истргувани акции, најактивен бил Македонски Телеком со 4.765 акции, по што следуваат Комерцијална банка со 719 и Гранит со 678 истргувани акции.

Податоците покажуваат поумерена берзанска активност во текот на неделата, со значително понизок промет во однос на претходниот период и релативно ограничени ценовни движења кај најтргуваните акции.