Европските авиокомпании се соочуваат со нови финансиски притисоци поради војната меѓу Соединетите Американски Држави и Иран, која предизвика раст на цените на горивата и дополнително ги оптовари превозниците што сè уште се опоравуваат од последиците од пандемијата.

Според аналитичари и инвеститори, продолжениот конфликт на Блискиот Исток ги зголемил оперативните трошоци и ја открил финансиската ранливост на дел од европските авиопревозници. Некои од нив веќе разгледуваат реструктурирање, продажба или барање заштита од банкрот, пренесува Ројтерс.

Британската нискобуџетна авиокомпанија EasyJet, според информациите, се приближува кон преземање од американски инвеститори по вредност значително пониска од онаа пред пандемијата. Летонски AirBaltic, пак, бара краткорочно финансирање за да избегне неисполнување на финансиските обврски, додека норвешкиот Norse Atlantic спроведува стратешка ревизија на работењето.

Директорот за Европа, Блискиот Исток и Африка во консултантската компанија Interpath, Барема Бокум, изјави дека неговата компанија во моментов работи на реструктурирање на четири или пет големи европски авиокомпании.

Меѓународното здружение за воздушен транспорт, IATA, минатиот месец речиси ја преполови проценката за профитот на глобалната авиоиндустрија во 2026 година. Како главни причини беа наведени повисоките цени на горивата, нарушувањата во воздушниот сообраќај и зголемената неизвесност поради конфликтот на Блискиот Исток.

Производителот на авиони Airbus, исто така, ја намали долгорочната прогноза за побарувачката на патнички авиони. Истовремено, авиокомпаниите ги одложуваат плановите за проширување на капацитетите и повнимателно го планираат растот поради геополитичките ризици и трговските тензии.

Аналитичарите предупредуваат дека најпогодени би можеле да бидат помалите авиопревозници. Послабите приходи во текот на летната туристичка сезона би можеле дополнително да го отежнат нивното работење во зимскиот период, кога авиокомпаниите традиционално остваруваат најниски приходи.

Компаниите до петок, 24 јули, можат да аплицираат за финансиска поддршка за вработување млади лица, долгорочно невработени и лица од ранливи категории.

Станува збор за мерката „Поддршка за креирање нови работни места“, односно подмерката „Вработување и раст на правни субјекти“, која е дел од Оперативниот план за вработување за 2026 година.

Според заменик-министерот за економија и труд Марјан Ристески, со мерката е предвидено да бидат опфатени 1.385 активни баратели на работа, а вкупниот буџет изнесува 5,4 милиони евра.

Право на учество имаат микро, малите и средните претпријатија, социјалните фирми и здруженијата на граѓани. Работодавачите треба да ги поднесат пријавите во подрачните единици на Агенцијата за вработување во местото каде што е регистрирана нивната фирма.

За вработување лице до 29 години, компаниите можат да добијат грант од 250.000 денари по лице. За вработување корисници на гарантирана минимална помош и припадници на ранливи категории, меѓу кои Роми, лица со попреченост, жени, долгорочно невработени и жени Ромки со завршено средно или високо образование, поддршката изнесува 220.000 денари.

За вработување невработено лице постаро од 29 години е предвиден грант од 160.000 денари.

Работодавачите што ќе вработат лице до 29 години се обврзани да склучат договор на неопределено време, со полно работно време, и да го задржат работникот најмалку 15 месеци. Лицата од ранливите категории треба да останат во работен однос најмалку 12 месеци, додека за вработените над 29 години минималниот период е девет месеци.

Ристески истакна дека целта на мерката не е само намалување на невработеноста, туку и задржување на работоспособните лица во земјата. Според неговите очекувања, реализацијата на Оперативниот план ќе достигне 93 проценти.

Претставниците на бизнис-заедницата ја поддржаа мерката, но посочија дека компаниите и натаму тешко пронаоѓаат работници со потребните квалификации.

Претседателот на Стопанската комора на северозападна Македонија, Нухи Алиу, изјави дека и покрај големиот број регистрирани невработени, на пазарот недостига соодветен кадар. Тој предложи да се обезбедат посебни средства за преквалификација и обука на невработените лица.

Претседателот на Сојузот на стопанските комори, Горан Ѓорѓиевски, оцени дека мерката е позитивна и дека во иднина се потребни дополнителни програми за отворање нови работни места. Тој побара и ажурирање на евиденцијата на Агенцијата за вработување, оценувајќи дека официјалната бројка од речиси 91.000 невработени не ја прикажува целосно реалната состојба.

Американскиот претседател Доналд Трамп во период од една година реализирал повеќе од 21.000 трансакции со акции и други хартии од вредност, покажува анализата на германскиот магазин „Шпигел“, изработена врз основа на неговата 900-странична финансиска декларација.

Според анализата, трансакциите биле извршени преку осум инвестициски сметки. Вкупната вредност на купувањата се проценува на меѓу 461 милион и 1,4 милијарди американски долари, додека продажбите изнесуваат меѓу 138 милиони и 433 милиони долари.

За споредба, поранешниот американски претседател Џо Бајден во текот на целиот четиригодишен мандат пријавил само 13 трансакции со хартии од вредност.

Еден од најактивните денови бил 8 април 2025 година, кога биле реализирани 327 купувања, меѓу кои и акции на компаниите Apple и Nvidia, непосредно по најавата за нови американски царини што предизвикаа пад на берзанските индекси.

„Шпигел“ нагласува дека нема докази кои би укажале на поврзаност меѓу инвестиционите активности и политичките одлуки на Трамп. Од Белата куќа соопштија дека инвестициските сметки ги управуваат независни финансиски институции, без директно учество на претседателот.

Финансиската декларација покажува и дека Трамп остварил значителни приходи од криптовалути, дивиденди, недвижности и други инвестициски средства.