Македонски Телеком го отвори првиот квартал од 2026 година со позитивни трендови во работењето, при што се забележува раст на корисничката база, зголемени вложувања во инфраструктурата и подобрување на финансиските резултати.

Капиталните инвестиции на компанијата достигнале 411 милиони денари, додека оперативната добивка (EBITDA) е повисока за 2,8 проценти во однос на лани. Нето добивката е зголемена за 0,6 проценти, а приходите од продажба бележат раст од 5,8 проценти.

Компанијата повторно ја доби наградата за најдобра мрежа во земјава од Ookla, врз основа на мерењата во втората половина на 2025 година. Според резултатите, мрежата се издвојува по брзината, стабилноста и квалитетот на корисничкото искуство во повеќе категории.

Покриеноста со 5G достигнува 97 проценти од населението, со високи интернет брзини достапни во најголем дел од градовите. Воедно, продолжуваат инвестициите во оптичката мрежа, при што бројот на оптички приклучоци достигнал 377 илјади, што е раст од 7,6 проценти на годишно ниво.

Раст е забележан и кај корисниците. Бројот на претплатници на широкопојасен интернет е зголемен за 3,5 проценти и изнесува 226,5 илјади, додека вкупниот број интернет пристапи е повисок за 3 проценти. Во мобилниот сегмент, бројот на корисници достигнал 1,284 милиони, што е раст од 1,9 проценти.

Компанијата ја задржува водечката позиција во фиксната телефонија со 239 илјади корисници, како и на ТВ пазарот со удел од 38,4 проценти. Дигиталната платформа MagentaTV продолжува да расте и достигнува 171 илјади корисници, што претставува зголемување од 6,1 проценти.

Во текот на кварталот се воведени нови пакети Magenta 1 Unlimited и Magenta 1 Business Unlimited, како и програмата за лојалност Magenta Moments, која брои 420 илјади корисници. Според TRI*M индексот, компанијата е рангирана како водечки телекомуникациски бренд според задоволството на корисниците.

Дополнително, приходите од системска ИТ интеграција се зголемени за 17,1 проценти.

Покрај деловните резултати, Македонски Телеком продолжува со активности насочени кон општествена одговорност, заштита на животната средина и унапредување на условите за вработените. Во првиот квартал од годината, компанијата ја доби и наградата за најпосакуван работодавач во телекомуникацискиот сектор на национално ниво.

Во Скопје се одржа бизнис конференција посветена на дигиталната безбедност, која ги собра на едно место претставници од деловниот сектор, институциите и експерти од областа на сајбер заштитата. Настанот, организиран од Македонски Телеком, беше насочен кон актуелните предизвици, новата регулатива и современите решенија за справување со сајбер заканите.

Во центарот на дискусиите беше новиот Закон за безбедност на мрежни и информациски системи, кој е усогласен со европската NIS2 директива и се смета за значаен чекор кон зајакнување на националната сајбер безбедност.

Главниот извршен директор на Македонски Телеком, Горан Марковиќ, порача дека сајбер безбедноста повеќе не е избор, туку неопходност, нагласувајќи дека компанијата ќе продолжи да делува како партнер во дигиталната трансформација преку сигурни и напредни решенија.

Министерот за дигитална трансформација, Стефан Андоновски, истакна дека новиот закон за првпат воспоставува сеопфатна и усогласена рамка која ќе обезбеди подобра заштита за институциите, бизнисите и граѓаните, како и усогласување со европските стандарди.

На конференцијата беа презентирани и глобалните трендови во сајбер безбедност од страна на експерти од Дојче Телеком, кои споделија практики и решенија за заштита од современите закани. Дополнително, претставници од надлежното министерство говореа за имплементацијата на NIS2 директивата, додека индустриските експерти дадоа осврт на најновите техники на сајбер напади.

Настанот привлече повеќе од 300 посетители, кои имаа можност да разменат искуства и да се информираат за актуелните регулативи и трендови во дигиталната безбедност.

Авио-компаниите ширум светот се соочуваат со зголемени трошоци за гориво, што веќе доведува до поскапување на билетите, нови доплати и ревидирање на бизнис стратегиите. Индустријата, која до неодамна очекуваше рекордна година, сега влегува во период на зголемена економска и геополитичка неизвесност.

Во последните денови, водечки луѓе од секторот предупредија дека ситуацијата е непредвидлива. Главниот комерцијален директор на United Airlines, Ендру Ночела, оцени дека индустријата се наоѓа во „неистражена територија“, додека од Alaska Air порачаа дека не треба да се очекува скоро намалување на цените на билетите.

Од друга страна, претседателот на Emirates, Тим Кларк, смета дека патниците релативно брзо се прилагодуваат и дека состојбата може да се стабилизира во пократок рок.

Сепак, реалноста покажува дека авио-компаниите веќе преземаат конкретни мерки: ги зголемуваат цените на картите, воведуваат дополнителни надоместоци за багаж и избор на седишта и ги намалуваат очекувањата за профит. Само American Airlines проценува дека ќе има дополнителни четири милијарди долари трошоци за гориво до крајот на годината, кои во голема мера ќе ги префрли на патниците.

Цените на билетите веќе пораснале за 15 до 20 проценти, а според раководството на United, малку е веројатно тие целосно да се вратат на претходното ниво дури и ако тензиите се намалат.

Дополнителен фактор на неизвесност е политичката ситуација, особено во САД, каде се разгледуваат државни интервенции и потенцијални спојувања меѓу големите авиопревозници. Истовремено, глобалните тензии влијаат врз снабдувањето со гориво, при што постојат предупредувања дека Европа би можела брзо да ги исцрпи резервите.

Поради ваквите притисоци, дел од компаниите веќе ги кратат летовите и ги оптимизираат мрежите. Германската Lufthansa, на пример, планира да укине околу 20.000 летови од летниот распоред и воведува модели типични за нискобуџетните компании.

И покрај тоа, побарувачката за патувања останува релативно силна пред летната сезона, иако се забележуваат први знаци на слабеење. Компаниите предупредуваат дека повисоките цени би можеле да ги обесхрабрат дел од патниците.

Во вакви услови, авио-индустријата се обидува да најде баланс меѓу зголемените трошоци и одржувањето на побарувачката, но јасно е дека периодот што следи ќе биде обележан со неизвесност и прилагодување на новите пазарни реалности.