Граѓаните веќе неколку дена се соочуваат со потешкотии при користењето на апликацијата „Мој ДДВ“, поради што дел од корисниците не можат да се најават и да скенираат фискални сметки.

Според бројни пријави, при внесување на ПИН-кодот се појавува пораката „Нема конекција од УЈП“, што го оневозможува пристапот до системот. Корисниците посочуваат дека проблемот трае повеќе од 72 часа, предизвикувајќи незадоволство кај граѓаните кои редовно ја користат апликацијата за остварување поврат на ДДВ.

Од Управата за јавни приходи информираа дека апликацијата моментално работи со повремени забавувања и дека стручните тимови активно работат на утврдување на причините и отстранување на техничките проблеми, со цел услугата што поскоро да биде целосно функционална.

Засега, од УЈП не е соопштен конкретен рок кога апликацијата „Мој ДДВ“ повторно ќе функционира без прекини и ограничувања.

По повеќе од две децении во кои бројот на акции на американскиот пазар на капитал се намалуваше, главно поради програмите за откуп на сопствени акции, се отвора ново поглавје за Волстрит. На берзата наскоро би можеле да се појават некои од најпознатите и најбрзорастечки технолошки компании во светот, меѓу кои SpaceX, OpenAI и Anthropic.

Според проценките, најголемото јавно понудување се очекува од деловната империја на Илон Маск, која ги вклучува SpaceX, сателитската мрежа Starlink, платформата за вештачка интелигенција xAI и социјалната мрежа X. Вкупната вредност на овие компании се проценува на околу 1,75 билиони долари.

Во октомври се очекуваат и берзанските дебитанти на Anthropic и OpenAI, чии заеднички вредности би можеле да бидат споредливи со онаа на SpaceX. Само овие нови компании би можеле да ја зголемат пазарната капитализација на американскиот пазар за околу 3,5 билиони долари, што претставува речиси пет проценти од сегашната вредност на индексот S&P 500.

SpaceX преку јавната понуда планира да обезбеди околу 86 милијарди долари свеж капитал, наменет првенствено за финансирање на развојни проекти и изградба на центри за податоци. Интересот кај инвеститорите е исклучително голем, а меѓу заинтересираните се наоѓаат големи инвестициски фондови како BlackRock и Fidelity, арапски државни фондови, како и инвеститори од Кина кои бараат алтернативни начини за вложување.

Во почетната фаза на берзата ќе бидат достапни околу пет проценти од акциите на овие компании. Сепак, по истекот на ограничувањата за дел од сегашните инвеститори следната година, се очекува значително зголемување на бројот на акции достапни за тргување.

Аналитичарите предупредуваат дека вреднувањата се исклучително високи. SpaceX моментално генерира околу 18 милијарди долари приходи, но бележи и речиси пет милијарди долари загуба. Односот меѓу пазарната вредност и приходите достигнува ниво од околу 100, што укажува на високи очекувања за идниот раст.

Според проценките, околу половина од вредноста на компанијата се должи на Starlink, една третина на xAI, додека остатокот се поврзува со ракетната програма и долгорочните планови за истражување и колонизација на Марс.

Инвестициската банка Goldman Sachs, која ја води јавната понуда, проценува дека SpaceX за пет години би можел да генерира слободен паричен тек од околу 72 милијарди долари. Но, поради високите очекувања, аналитичарите предупредуваат дека акциите би можеле да бидат изложени на значителни ценовни осцилации.

Покрај новите компании, вниманието на инвеститорите ќе биде насочено и кон технолошките гиганти од групата „Маг 7“. Во деновите пред најавените котации, овие компании заедно изгубија околу илјада милијарди долари пазарна вредност, делумно поради пренасочување на капиталот кон новите технолошки ѕвезди.

Аналитичарите оценуваат дека 2026 година би можела да остане запаметена како година во која новата генерација технолошки компании направи силен пробив на светските пазари на капитал. Доколку изминатата деценија беше обележана од компании како Apple, Microsoft, Nvidia и Amazon, следните години би можеле да донесат подем на нови имиња предводени од вештачката интелигенција и напредните технологии.

Министерството за финансии подготвува измени на Законот за финансиските друштва со кои се предвидува заострување на контролите и воведување нови правила за работа на овие компании.

Според најавите, една од клучните промени е укинувањето на можноста кредитните средства да се исплаќаат во готовина. Во иднина, исплатата на кредити ќе се врши исклучиво преку банкарска сметка, со цел да се обезбеди поголема транспарентност и следливост на финансиските трансакции.

Предложените измени предвидуваат и формирање задолжителни внатрешни тела во финансиските друштва, меѓу кои одбор за внатрешна ревизија, одбор за кредитен ризик и надзорен одбор. Дополнително, отворањето нови деловни простории ќе биде условено со претходна согласност од Министерството за финансии и исполнување на пропишани критериуми.

Министерката за финансии, Гордана Димитриеска-Кочоска, во интервју за Телма изјави дека потребата од законските измени произлегла од спроведените контроли, при кои биле утврдени слабости и недоречености во постојната регулатива.

Таа посочи дека дел од контролите откриле неправилности во работењето на одредени финансиски друштва, а во поединечни случаи биле преземени и санкции, вклучително и одземање лиценци. Како што нагласи, значаен придонес во откривањето на неправилностите имале и пријавите од граѓаните.

Со новите законски решенија, Министерството за финансии очекува да се зајакне надзорот врз секторот и да се воспостават повисоки стандарди за работење на финансиските друштва.