Во Скопје денеска официјално започна Самитот Macedonia2025, кој и оваа година собра претставници од бизнис-секторот, институциите, финансиската индустрија и технолошките компании од земјава и странство.

Настанот беше отворен со обраќања на претседателот на Управниот одбор Виктор Мизо и ко-основачот Мајк Зафировски, кои порачаа дека Северна Македонија има потенцијал да се позиционира како регионален центар за инвестиции, иновации и современо лидерство.

Извршната директорка Никица Мојсоска-Блажевски говореше за потребата од забрзани економски реформи, дигитална трансформација и посилна соработка меѓу институциите и приватниот сектор.

Особено внимание привлече разговорот со премиерот Христијан Мицкоски, кој се осврна на економските приоритети на Владата, енергетските предизвици и инфраструктурните инвестиции во Коридорите 8 и 10. Во дискусијата беше потенцирана и важноста од стабилна бизнис-клима и привлекување странски инвестиции.

Во рамки на панел-дискусијата „From Potential to Performance: Can the Region Scale?“ учествуваа повеќе регионални бизнис-лидери, меѓу кои Живко Мукаетов, Ана Драшковиќ и Огњен Лазиќ. Темите беа насочени кон конкурентноста на регионот, пристапот до капитал и улогата на дигитализацијата во економскиот развој.

Самитот продолжува и во наредните два дена, со повеќе панели, дискусии и обраќања посветени на економијата, технологијата и инвестициите.

Од ноќеска дизелот поевтинува за четири денари, соопшти Регулаторна комисија за енергетика по објавувањето на новата одлука за цените на горивата.

Според новиот ценовник, цената на Еуродизелот се намалува за 4 денари по литар, додека Еуросупер БС-98 поскапува за половина денар. Цената на Еуросупер БС-95 останува иста.

Пониска ќе биде и цената на Екстра лесното масло за домаќинство, кое поевтинува за 4,5 денари по литар, додека мазутот поскапува за 0,248 денари по килограм.

Од РКЕ наведуваат дека со последната одлука просечното намалување на цените на нафтените деривати изнесува 1,78 проценти.

Регулаторна комисија за енергетика денеска треба да ја донесе новата одлука за малопродажните цени на бензините и дизелот, која ќе стапи во сила од полноќ.

Граѓаните очекуваат дали ќе има ново поскапување на горивата или конечно стабилизирање на цените, по неколкуте последователни корекции во изминатиот период. Минатата недела бензините и дизелот повторно поскапеа, што дополнително влијаеше врз трошоците за транспорт и секојдневните расходи.

Одлуките за новите цени традиционално се објавуваат во понеделник, а промените почнуваат да важат од 00 часот.

Движењата на светските пазари и натаму имаат силно влијание врз домашниот пазар на горива. Осцилациите на цената на суровата нафта се поврзуваат со глобалната неизвесност и случувањата на Блискиот Исток, како и со стравувањата од можни проблеми во снабдувањето.

Од Владата посочуваат дека состојбата внимателно се следи и дека остануваат во сила мерките и договорените попусти со ОКТА, кои треба да важат до средината на месецот.

Премиерот Христијан Мицкоски неодамна изјави дека Македонија и понатаму има меѓу најниските цени на горивата во регионот, поради што дел од граѓаните од соседните земји доаѓаат во државава да точат гориво.