Регулаторната комисија за енергетика донесе нова одлука за цените на горивата, со која од полноќ ќе важат коригирани износи на малопродажниот пазар.

Според одлуката, дизелот поевтинува за 2,5 денари по литар, додека цените на бензините се зголемуваат за 2 денари. Во просек, цените на нафтените деривати бележат раст од 0,40 проценти.

Покрај тоа, екстра лесното масло за домаќинство поевтинува за 1 денар, додека мазутот има мало поскапување.

Новите максимални цени ќе изнесуваат:

• Еуросупер БС-95: 82,50 денари за литар
• Еуросупер БС-98: 84,50 денари за литар
• Еуродизел: 91,50 денари за литар
• Екстра лесно масло: 96,00 денари за литар
• Мазут: 46,656 денари за килограм

Од РКЕ информираат дека промените се резултат на движењата на светските пазари. Според нивните податоци, референтните цени кај бензините се зголемени за 4,268 проценти, додека кај дизелот има пад од 3,760 проценти. Намалување има и кај екстра лесното масло за 1,528 проценти, додека мазутот бележи раст од 1,117 проценти.

Дополнително, курсот на денарот во однос на доларот е благо намален за 0,0452 проценти во споредба со претходниот период.

Од Комисијата потсетуваат дека станува збор за максимално дозволени цени, што им остава простор на трговците да понудат и пониски износи.

Триглав пензиско друштво АД Скопје успешно ја реализираше петтата емисија на хартии од вредност по пат на приватна понуда, со која се изврши зголемување на основната главнина на Друштвото.

Емисијата, одобрена од Комисијата за хартии од вредност, опфати издавање на 20.000 обични акции со номинална вредност од 50 евра по акција во денарска противвредност по средниот курс на Народната банка, односно вкупна вредност од 1 милион евра.

По реализацијата, вкупниот капитал на Друштвото изнесува 8,356 милиони евра, додека бројот на акции се зголеми на 167.120 обични акции.

Сите акции од емисијата се запишани од институционалниот инвеститор и единствен акционер – Заваровалница Триглав д.д. Љубљана, кој останува сопственик на 100% од акционерскиот капитал.

Со оваа транскација се потврдува континуираната финансиска поддршка и стратешката определба за развој на друштвото во рамки на групацијата.

Лизингот на возила станува сè почест избор кај физичките и правните лица кои сакаат брзо и флексибилно решение за набавка на ново или користено возило. Овој финансиски модел нуди едноставен процес, прилагодени услови и разновидни опции за финансирање.

Од НЛБ посочуваат дека постапката за одобрување е брза и едноставна – клиентите избираат возило, поднесуваат барање и добиваат понуда во краток рок. Во понудата се вклучени различни типови возила, од патнички автомобили до комерцијални возила, камиони, автобуси и трактори.

Лизингот нуди можност за избор помеѓу финансиски и оперативен модел. Кај финансискиот лизинг, корисникот по истекот на договорот може да стане сопственик на возилото, додека кај оперативниот лизинг возилото се користи за одреден период, по што се враќа на давателот.

Флексибилноста на месечните рати и можноста за прилагодување според финансиските можности го прават овој модел атрактивен и за поединци и за компании. Дополнително, ваквиот начин на финансирање им овозможува на бизнисите полесно да го обноват својот возен парк без големи почетни инвестиции.

Со ваквите поволности, лизингот се позиционира како практично решение за оние кои сакаат пристап до возило со помал финансиски товар и поголема флексибилност.