АЛТА банка понуди пакет наменет за вработените во јавната администрација, кој вклучува потрошувачки кредит, кредитна картичка, дозволено пречекорување по платежна сметка, СМС известување и електронско, односно мобилно банкарство преку платформата Bank2Go.

Според условите на пакетот, максималниот износ на кредитната изложеност достигнува до 2.500.000 денари, со рок на отплата до 95 месеци, а во одредени случаи и до 120 месеци.

Кредитот може да се користи како ненаменски, при што средствата се префрлаат директно на платежната сметка на корисникот, или како наменски за затворање на постоечки обврски во банката или во други банки.

Пакетот вклучува и кредитна картичка Visa или MasterCard Standard, како и дозволено пречекорување по платежна сметка.

Од банката информираат дека условите важат доколку клиентот ги користи сите производи кои се дел од пакетот.

Во делот на надоместоците, трошокот за аплицирање на кредит изнесува 700 денари, додека провизијата за одобрување е 1 процент за ненаменски кредити и 0 проценти за рефинансирање на обврски од истата или од други банки.

Дополнително, банката најави и промотивен период од 1 јануари до 30 јуни 2026 година, во кој нема да се наплатува надомест за одобрување на кредит.

За дозволеното пречекорување, административниот трошок изнесува 300 денари за лимити до 60.000 денари и 600 денари за лимити над 60.001 денар.

Пакетот овозможува и користење на СМС известувања, како и пристап до електронско и мобилно банкарство преку системот Bank2Go.

НЛБ Банка во соработка со своите партнери организира караван за финансиско советување за небанкарски финансиски продукти, кој ќе се одржува во периодот од 18 мај до 19 јуни.

Во рамки на караванот, пред повеќе експозитури на банката во Скопје и во други градови низ државата ќе се организираат промотивни настани, каде граѓаните ќе можат да се информираат за различните небанкарски услуги и продукти што се нудат преку банката.

Во активноста се вклучени и партнерските компании Сава осигурување, Кроација осигурување Живот, Сава пензиско друштво, Триглав осигурување Живот и НЛБ Фондови.

Клиентите ќе имаат можност да добијат детални информации за осигурителни, пензиски и инвестициски продукти, како и промотивни подароци.

Од НЛБ Банка посочуваат дека целта на караванот е граѓаните полесно да се запознаат со можностите за финансиско планирање и носење подобри финансиски одлуки за иднината.

ПроКредит Банка доби одобрение од Комисија за хартии од вредност за издавање трајна обврзница во вредност од 5 милиони евра преку приватна понуда.

Информацијата ја објави SeeNews, повикувајќи се на соопштение од регулаторот. Станува збор за таканаречена „perpetual bond“ обврзница, односно финансиски инструмент без рок на достасување, кој банките најчесто го користат за зајакнување на капиталната структура.

Издавањето на вакви инструменти е дел од пошироките напори на банките за обезбедување дополнителен капитал и усогласување со регулаторните барања за финансиска стабилност.