Надзорниот одбор на НЛБ Банка АД Скопје на седницата одржана на ден 10.06.2024 година го именуваше Тони Стојановски за нов Претседател на Управниот одбор. Тони Стојановски ќе ја преземе функцијата Претседател на Управниот одбор на НЛБ Банка Скопје откако ќе ја добие потребната согласност од Народната банка на Република Северна Македонија. Во меѓувреме ќе ја преземе функцијата Помошник на Управниот одбор на НЛБ Банка Скопје.

До добивање согласност од Народната банка за нов Претседател на Управниот одбор на НЛБ Банка АД Скопје, функцијата ќе ја извршува актуелниот Претседател на Управниот одбор, Бранко Грегановиќ.

Сепак според сознанијата на Банкарство, освен промената на највисоката позиција во менаџментот на НЛБ Банка АД Скопје ќе има и дополнителни промени во Управниот одбор на Банката. Нашите сознанија говорат дека нов член на Управниот одбор на НЛБ Банка АД Скопје ќе биде Катерина Јанковиќ, која во моментов ја извршува функцијата Директор на Сектор население во Шпаркасе Банка АД Скопје. Освен оваа функција, Катерина Јанковиќ е дел и од Надзорниот одбор на Винер Лајф како независен член.

Катерина Јанковиќ е дипломиран економист на Економскиот факултет при Универзитетот Св. Кирил и Методиј – Скопје на департманот финансиски менаџмент, а поседува и МБА диплома со заслуги на Шефилд Универзитетот. Јанковиќ е повеќе од 20 години во финансискиот сектор, каде успешно ја градеше својата кариера на различни позиции во Охридска банка, вклучително и Раководител на Секторот за големи и меѓународни клиенти и Директор за продажба.

НЛБ Банка преку информација објавена на Македонска берза го објави Материјалот за Собрание на акционери на Банката, кое ќе се одржи на 5ти септември. Од Предлог одлуките може да се забележи дека е планирано да се менува Статутот на НЛБ Банка АД Скопје во член 61.

Во Статутот на НЛБ Банка АД Скопје се вршат следните измени и дополнувања: „Во член 61, во став 2 бројот и зборот „3 (три)“ се менуваат и гласат „4 (четири)“. Во истиот член 61, ставот 3 се менува и сега гласи: „Секој од членовите на Управниот одбор е законски застапник на Банката и Банката во кое било време ја застапуваат двајца членови на Управниот одбор од кои еден задолжително треба да биде претседателот на Управниот одбор. Во случај на негово отсуство, тој може да го пренесе ова право само на друг член на Управниот одбор.““, се вели во Предлог одлуката за измени и дополнувања на Статутот на НЛБ Банка АД Скопје.

Во самото образложение на оваа Предлог одлука се вели дека измените на Статутот се вршат поради промена на начинот на застапување на Банката од страна на членовите на Управниот одбор, поради зголемување на бројот на членови на Управниот одбор на Банката и промена во составот на Одборот за управување со ризици и Кредитниот одбор на Банката.

Во моментов Управниот одбор на НЛБ Банка АД Скопје брои три членови:

• Бранко Грегановиќ – Претседател на Управен одбор;
• Петер Зелен – Член на Управен одбор;
• Игор Давчевски – Член на Управен одбор;