Народната банка на Република Северна Македонија издаде Решение со кое е издава претходна согласност г-дин Тони Стојановски повторно да биде именуван за претседател на Управниот одбор на НЛБ Банка АД Скопје.

Согласно решението издадено на 27 јули 2026 година, Стојановски ќе добие нов четиригодишен мандат, кој започнува на 4 септември 2026 година. Тони Стојановски ја презема функцијата претседател на Управниот одбор на НЛБ Банка Скопје од 3 септември 2024 година.

Со оваа одлука се обезбедува континуитет во раководењето со една од најголемите банки во земјата. Стојановски и во претстојниот период ќе продолжи да ја предводи НЛБ Банка во реализацијата на нејзините стратешки цели, дигиталната трансформација, унапредувањето на банкарските услуги и зајакнувањето на пазарната позиција.

НЛБ Банка е дел од НЛБ Групацијата, една од водечките банкарски групации во Југоисточна Европа, со значајно присуство на регионалните пазари и фокус на иновации, одржлив раст и поддршка на клиентите и бизнис-заедницата.

Повторното именување на Стојановски претставува потврда на довербата во неговото досегашно раководење и визијата за понатамошен развој на Банката во услови на динамични промени во банкарскиот сектор.

Народната банка одлучи да ја задржи основната каматна стапка на нивото од 4,25 отсто, по нејзиното зголемување во јуни. Одлуката беше донесена на редовната седница на Извршниот одбор за монетарна политика, одржана на 28 јули, врз основа на најновите макроекономски показатели и процените за ризиците во домашното и меѓународното окружување.

Од централната банка оценуваат дека тековната поставеност на монетарната политика е соодветна, имајќи ја предвид и натаму високата неизвесност, особено поради геополитичките тензии, растот на цените на енергентите и можните ефекти врз девизниот пазар и домашната инфлација.

Девизниот пазар од почетокот на мај е стабилен, иако се забележува повисока побарувачка на девизи од компаниите, делумно поради поскапувањето на енергентите. Девизните резерви на крајот на јуни изнесувале 4,94 милијарди евра и, според Народната банка, се одржуваат во сигурната зона.

Годишната инфлација во јуни забавила на 3,4 отсто, што е пониско од очекувањата во априлската проекција. Забавувањето главно се должи на поумерениот раст на цените на храната, сезонските фактори и намалувањето на базичната инфлација.

Сепак, од Народната банка посочуваат дека инфлацијата и натаму е на релативно високо ниво, додека увозните цени остануваат нестабилни. Дополнителен ризик претставуваат ескалацијата на конфликтите на Блискиот Исток и продолжувањето на војната меѓу Русија и Украина, кои создаваат притисоци врз цените на енергентите и другите примарни производи, како и нарушувања во синџирите на снабдување.

Домашната економија, според оцените на централната банка, продолжува да покажува отпорност. Во првиот квартал од 2026 година, реалниот раст на бруто-домашниот производ изнесувал 3,1 отсто, а податоците за вториот квартал укажуваат на можно дополнително забрзување на економската активност.

Кредитната поддршка во економијата останува посилна од проектираната, при истовремен раст на депозитната база.

Народната банка најави дека ќе продолжи внимателно да ги следи домашните и меѓународните економски движења и дека е подготвена да ги употреби сите расположливи инструменти за одржување на стабилноста на денарот, инфлацијата и финансискиот систем.

Халкбанк започна нов едукативен видеосеријал со кој на корисниците им ги приближува најчесто користените банкарски услуги достапни преку мобилен телефон.

Серијалот „Халк Финфлуенсер“ содржи 12 кратки видео упатства во кои актерката Дарја Ризова на едноставен начин ги прикажува чекорите за користење на различни функционалности во мобилната апликација на банката.

Целта е корисниците полесно да извршуваат трансакции и други банкарски активности без посета на филијала и без чекање на шалтер. Од Халкбанк посочуваат дека во изминатиот период континуирано го проширувале бројот на достапни дигитални услуги во апликацијата.

Досега се објавени видеа за отворање платежна сметка преку мобилен телефон, префрлање пари со услугата Smart Send и подигнување готовина од банкомат без користење картичка.

Во следните недели се најавени уште девет видеа посветени на банкарски постапки и услуги што можат да се завршат онлајн.

Од банката велат дека преку ваквите содржини сакаат не само да ги информираат корисниците, туку и да придонесат за подобрување на нивните финансиски и дигитални знаења.

Иако онлајн банкарството почесто го користат помладите, Халкбанк со серијалот планира да ги охрабри и повозрасните корисници да ги искористат предностите на дигиталните услуги. Содржините ќе бидат достапни преку социјалните мрежи, како и директно преку филијалите на банката.