НЛБ Банка АД Скопје реализираше нова трансакција со Нова Љубљанска банка од Љубљана, врз основа на договор за субординиран заем во износ од 10 милиони евра.

Финансискиот инструмент се квалификува како додатен основен капитал, односно Additional Tier 1 capital, со што ќе придонесе за зајакнување на капиталната позиција на НЛБ Банка Скопје.

Нова Љубљанска банка е доминантен акционер во НЛБ Банка АД Скопје, со учество од 86,97 отсто во вкупниот број акции на банката.

Информацијата е објавена како ценовно чувствителна од Македонската берза, согласно Правилата за котација.

УНИ Банка во првите шест месеци од 2026 година остварила нето-добивка од 114,5 милиони денари, што е значително помалку во однос на 203 милиони денари во истиот период минатата година.

Според податоците објавени на Македонската берза, нето-приходите од камати се намалиле за 1,21 отсто, на 592,6 милиони денари.

Нето-приходите од провизии и надоместоци се намалиле за пет отсто и изнесувале 109,7 милиони денари.

Вкупната актива на банката на крајот од јуни изнесувала 30,5 милијарди денари, што претставува намалување од 2,5 отсто во споредба со крајот на минатата година.

Кредитите и побарувањата од клиенти, без банки, се зголемиле за 3,5 отсто и достигнале 21,5 милијарди денари. Депозитите, пак, се намалиле за 0,8 отсто, на 23,5 милијарди денари.

Акциите на УНИ Банка последен пат се тргувале по цена од 6.526 денари на Македонската берза.

Стопанска банка АД – Скопје информира дека исплатата на пензиите за јули ќе започне утре, 31 јули 2026 година.

Корисниците ќе можат да располагаат со средствата преку своите сметки во банката.