Американскиот претседател Доналд Трамп во период од една година реализирал повеќе од 21.000 трансакции со акции и други хартии од вредност, покажува анализата на германскиот магазин „Шпигел“, изработена врз основа на неговата 900-странична финансиска декларација.

Според анализата, трансакциите биле извршени преку осум инвестициски сметки. Вкупната вредност на купувањата се проценува на меѓу 461 милион и 1,4 милијарди американски долари, додека продажбите изнесуваат меѓу 138 милиони и 433 милиони долари.

За споредба, поранешниот американски претседател Џо Бајден во текот на целиот четиригодишен мандат пријавил само 13 трансакции со хартии од вредност.

Еден од најактивните денови бил 8 април 2025 година, кога биле реализирани 327 купувања, меѓу кои и акции на компаниите Apple и Nvidia, непосредно по најавата за нови американски царини што предизвикаа пад на берзанските индекси.

„Шпигел“ нагласува дека нема докази кои би укажале на поврзаност меѓу инвестиционите активности и политичките одлуки на Трамп. Од Белата куќа соопштија дека инвестициските сметки ги управуваат независни финансиски институции, без директно учество на претседателот.

Финансиската декларација покажува и дека Трамп остварил значителни приходи од криптовалути, дивиденди, недвижности и други инвестициски средства.

Швајцарскиот град Цуг бележи зголемен интерес од милијардери, инвеститори и мултинационални компании, особено по зголемената геополитичка неизвесност на Блискиот Исток, која го намали статусот на Дубаи како сигурна дестинација за капитал.

Иако има само околу 130.000 жители, Цуг е најбогатиот кантон во Швајцарија. Во него се регистрирани повеќе од 40.000 компании, а секој осми жител е милионер. Благодарение на поволниот даночен систем, политичката стабилност и предвидливата деловна средина, кантонот со децении привлекува глобални компании и инвеститори.

Покрај тоа што е седиште на големи меѓународни компании, Цуг е познат и како „Крипто Долина“, еден од водечките европски центри за блокчејн и крипто-индустријата. Посебно атрактивен е швајцарскиот модел на оданочување, кој во одредени кантони овозможува даночните обврски да се пресметуваат според животните трошоци, наместо според вкупниот приход или богатство.

Сепак, силниот прилив на капитал има и своја цена. Побарувачката за недвижности значително ги зголеми цените на становите и куќите, кои денес се меѓу највисоките во Европа, а сè повеќе локални жители се соочуваат со високи трошоци за домување.

И покрај тоа, финансиската состојба на кантонот останува исклучително стабилна. Буџетскиот суфицит овозможува пониски трошоци за јавни услуги и здравствено осигурување, што дополнително ја зголемува атрактивноста на Цуг.

Во услови на геополитички ризици, повисоки даноци во дел од европските земји и глобална економска неизвесност, Цуг продолжува да ја зацврстува својата позиција како една од најпосакуваните светски дестинации за инвеститори и мобилен капитал.

Одлуката на компанијата „Стратеџи“ да одобри дополнителна продажба на биткоини повторно го насочи вниманието кон компаниите што акумулираат криптовалути, чиј бизнис-модел е под силен притисок поради падот на цените на дигиталните средства.

Компанијата на Мајкл Сејлор годинава веќе продала биткоини во вредност од околу 218 милиони долари, со цел да исплати дивиденди и да ги зголеми резервите во американски долари. Со најновиот план е одобрена продажба на биткоини до 1,25 милијарди долари, како и програма за откуп на сопствени акции.

Овие потези отворија прашања за одржливоста на таканаречените компании за трезор на дигитални средства, кои минатата година доживеаја голем раст поради оптимизмот околу политиките наклонети кон криптовалутите во САД.

Нивниот модел се заснова на купување криптовалути преку капитал и задолжување, но станува многу ранлив кога цените на токените паѓаат. Во такви услови се намалува вредноста на нивните резерви, се отежнува прибирањето нов капитал и се намалува интересот на инвеститорите.

Биткоинот годинава во еден момент забележа пад од околу 33 проценти, под влијание на геополитичките тензии, растот на цените на нафтата и очекувањата за построга политика на американската централна банка.

Од крајот на минатата година, вкупната пазарна вредност на многу вакви компании падна под вредноста на криптовалутите што ги поседуваат. И акциите на „Стратеџи“ неодамна за првпат се тргуваа со попуст во однос на нето-вредноста на нејзините биткоин резерви.

И покрај продажбите, „Стратеџи“ и натаму е убедливо најголемиот корпоративен сопственик на криптовалути, додека „Битмајн имершн технолоџис“ го има второто најголемо портфолио, главно составено од етер.