ИУТЕ Македонија ги информира своите клиенти дека и за време на неработните денови ќе обезбедува поддршка преку дежурни експозитури и дигиталните канали.

Како што соопшти компанијата, денеска тимот на ИУТЕ ќе биде достапен за клиентите во периодот од 09:00 до 17:00 часот.

За време на празничниот ден ќе работат дежурните експозитури во Скопје – Парк, Скопје – Аеродром, Битола, Куманово и Тетово.

Од компанијата потсетуваат дека клиентите можат да користат поддршка и преку апликацијата MyIute, која е достапна 24 часа дневно, како и преку контакт центарот на бројот 13333.

Воедно, од ИУТЕ Македонија ги повикуваат корисниците да ги разгледаат и специјалните понуди подготвени за нив во пресрет на празничниот период.

Владата на Црна Гора подготви нова Уредба за слободни царински продавници, со која се утврдуваат условите за отворање и работење на „duty free“ објекти на аеродромите и во пристаништата отворени за меѓународен сообраќај.

Со предложените правила се регулираат постапките за отворање на слободни царински продавници, царинскиот надзор над стоката и начинот на водење евиденција за производите што се продаваат во овие објекти.

Според предлогот, „duty free“ продавниците ќе можат да се отвораат во простории кои се наоѓаат по местото каде што се врши царинска контрола на аеродромите и во пристаништата за меѓународен сообраќај. Тие ќе можат да располагаат со продажен простор и магацин.

Новите правила директно ќе влијаат врз работењето на аеродромите, пристаништата и марините во Црна Гора, како и врз потенцијалните концесионери и трговски оператори заинтересирани за „duty free“ пазарот.

Компаниите што сакаат да отворат ваква продавница ќе треба да поднесат барање до царинските органи, заедно со документација за регистрација на фирмата, потврди за подмирени даночни и царински обврски, доказ дека не е покрената стечајна или ликвидациска постапка и доказ дека подносителот располага со приватен царински магацин.

Предвидено е и формирање тричлена комисија составена од претставници на Министерството за финансии, царинската управа и полицијата, која ќе утврдува дали објектот ги исполнува условите за работа.

Уредбата детално го регулира и царинскиот надзор над стоката. За странската стока ќе се применуваат транзитни декларации и постапка на царинско складирање, додека за продадената стока ќе се поднесуваат декларации за повторен извоз. За домашните производи ќе биде потребна извозна царинска декларација.

Дополнително, се воведува обврска за детална евиденција на стоката и дневно известување до царинските органи за прометот. Надлежните служби ќе вршат контрола на евиденцијата најмалку двапати годишно.

Купувањето производи во слободните царински продавници ќе биде можно со приложување авионска или бродска карта за патување надвор од царинското подрачје на Црна Гора, а на фискалните сметки задолжително ќе се наведува и бројот на патната карта.

Акционерите на македонската шпедитерска компанија Фершпед АД одобрија исплата на бруто дивиденда од 920 денари по акција за 2025 година, што претставува зголемување во однос на ланските 720 денари по акција, објави SeeNews.

Според информациите, дивидендата изнесува околу 17,3 долари, односно 14,9 евра по акција.

Фершпед е една од најпознатите компании во Северна Македонија во секторот транспорт и логистика, а одлуката за повисока дивиденда доаѓа во услови на стабилно работење и позитивни финансиски резултати.

Компанијата е активна во областа на шпедицијата, транспортот и логистичките услуги на домашниот и регионалниот пазар.