Двата меѓународни аеродроми во Северна Македонија, скопскиот и охридскиот, во периодот јануари–март опслужиле вкупно 841.577 патници, што претставува зголемување од 33,2 проценти во споредба со истиот период минатата година.

Според податоците објавени од Aéroports de Paris (ADP), растот на патничкиот сообраќај укажува на значително закрепнување и зголемена побарувачка за авионски превоз во земјава на почетокот од годината.

Иако не се објавени подетални информации за распределбата на патниците по аеродроми, традиционално најголемиот дел од сообраќајот се одвива преку Меѓународниот аеродром Скопје, додека охридскиот аеродром има поизразена сезонска динамика, особено во летниот период.

Зголемувањето на бројот на патници се поврзува со проширувањето на авиолиниите, зголемената фреквенција на летови, како и постепеното зајакнување на туристичкиот и бизнис-сообраќајот.

Очекувањата се дека позитивниот тренд ќе продолжи и во текот на остатокот од годината, особено со приближувањето на летната сезона.

Министерката за финансии Гордана Димитриеска-Кочоска во рамки на Пролетните средби на ММФ и Светска банка во Вашингтон, учествуваше на тркалезна маса на која беше претставена петгодишна програма за развој на капацитетите на нов Регионалниот центар за техничка помош на Меѓународниот монетарен фонд за Југоисточна Европа (SEETAC).

Центарот, чие започнување со работа е предвидено најдоцна до јануари 2027 година, како што се наведува во соопштението од Министерството за финансии, ќе биде дел од глобалната мрежа на ММФ за развој на капацитети и ќе обезбедува поддршка за шесте земји од Западен Балкан и Молдавија во зајакнување на институциите, креирање политики и спроведување реформи во согласност со европските стандарди.

Министерката Димитриеска-Кочоска на состанокот истакнала дека воспоставувањето на SEETAC претставува значаен чекор за продлабочување на соработката со ММФ за унапредување на економското управување во регионот.

„Како земја даваме јасна и силна поддршка за формирањето на овој регионален центар, кој ќе биде важен инструмент за забрзување на реформите и зајакнување на институциите. Преку SEETAC ќе се обезбеди пристап до врвна експертиза и практична техничка помош, што директно ќе придонесе за поефикасни политики, стабилни јавни финансии и поголема економска отпорност. Ова е значајна инвестиција во капацитетите на регионот и во нашата европска перспектива“, посочи министерката.

Во рамки на дискусијата била нагласена потребата од понатамошно зајакнување на институционалните капацитети, унапредување на управувањето со јавните финансии, како предуслов за одржлив економски раст и побрза интеграција во Европската Унија.

Овој ангажман, како што истакнуваат од Министерството за финансии, е силен и во континуиран раст, особено во контекст на реформите поврзани со пристапувањето во Европската Унија.

Во рамки на првата фаза од работењето, SEETAC ќе се фокусира на зголемување на фискалниот простор, подобрување на прибирањето приходи, зголемување на ефикасноста на јавната потрошувачка, зајакнување на монетарните и финансиските политики, како и унапредување на статистиката и аналитичките капацитети.

Центарот ќе обезбедува континуирана поддршка преку резидентни советници, експерти, обуки, работилници и регионални иницијативи, со цел поефикасна имплементација на реформите и засилена регионална соработка.
На состанокот беше истакната и важноста од партнерството меѓу земјите членки, ММФ и донаторите, при што беше посочено дека вкупниот буџет за првите пет години изнесува 70,4 милиони долари.

Во рамки на Пролетните средби, министерката за финансии учествуваше на состанокот на Холандската конституенца, во чии рамки членува нашата земја, заедно со уште 15 земји – Кнежевството Андора, Ерменија, Белгија, Босна и Херцеговина, Бугарија, Република Хрватска, Кипар, Грузија, Израел, Луксембург, Република Молдавија, Црна Гора, Романија, Холандија и Украина.

На состанокот, како што е наведено во соопштението, станало збор за предизвиците со кои се соочува светската економија, геополитичките тензии и зголемената неизвесност. Притоа било истакнато влијанието од конфликтот во Украина, како и воените операции на Блискиот Исток, особено преку директното влијание врз цените на нафтата и гасот и преку нарушување на важните трговски рути, како и за мерките и политиките за справување со влијанието.

Димитриеска-Кочоска во Вашинтон остварила средби и со претставници на повеќе меѓународни финансиски институции и корпорации.

Во време на засилена глобална неизвесност и брзи економски промени, финансиската писменост станува сè поважна, особено за оние кои управуваат со капитал. На Економски факултет – Скопје при УКИМ се одржа гостинско предавање посветено на врската меѓу геополитиката и финансиските пазари.

Предавач беше Иван Ивановски, основач на Prime Capital и креатор на едукативната платформа primeclass.mk. Настанот се реализираше во рамки на Quant Talks, во организација на Катедрата за математика и статистика, а присуствуваа професори, научни работници и студенти.

Во центарот на дискусијата беше влијанието на глобалните политички и економски случувања врз финансиските пазари. Беа анализирани актуелни теми како воени конфликти, политички тензии и економски политики, и нивниот ефект врз движењата на берзите и инвестициските стратегии.

Дополнително, предавањето се осврна и на финансиските контракти, нивната структура и практична примена. Преку конкретни примери беше објаснето како овие инструменти се користат за управување со ризик, оптимизација на портфолио и носење одлуки во услови на нестабилни пазари. Дел од дискусијата беше посветен и на инвестирањето преку индексни фондови како современ пристап на пазарите.

На настанот активно учествуваа и професорите Драган Тевдовски, Игор Ивановски, Леонид Наков и Борче Треновски, со што дискусијата доби дополнителна стручна тежина.

„Нашата цел не е да предвидиме што точно ќе се случи на пазарите, туку да изградиме начин на размислување. Во услови на неизвесност, најголемата грешка е импулсивната реакција. Клучно е да се остане доследен на стратегијата и да се препознаат можностите за инвестирање“, истакна Ивановски.

Од факултетот посочија дека ваквите настани се значајни за поврзување на академската заедница со практичниот сектор и за подобра подготовка на младите кадри.

Активностите на Prime Capital и Prime Class продолжуваат со цел подигнување на финансиската писменост и приближување на финансиските пазари до пошироката јавност.