Секогаш е задоволство да се прославуваат успесите, особено кога тоа се прави на искрен начин, кој јавноста го препознава. Но, за секој успех е потребен труд, многу работа и квалитетен и посветен тим кој е подготвен да ги реализира дури и најамбициозните замисли. Токму таков е тимот на Публицис Груп, кој ја освои наградата за Најдобар корпоративен настан на овогодинешниот BEAM Festival, за организирање на прославата за 40-от роденден на НЛБ Банка Скопје.

Одделот за организација на настани на Публицис Груп, заедно со креативниот тим на Saatchi & Saatchi и во соработка со тимот на НЛБ Банка Скопје организираа спектакуларен гала концерт со нашиот најголем виртуоз на пијано, маестро Симон Трпчевски, кој настапи во придружба на квинтетот Македонисимо и Камерниот ансамбл – солисти од Факултетот за музичка уметност во Скопје, како и поп-дивата Каролина Гочева.

„Со огромна чест и задоволство ја примаме оваа награда и притоа сакаме да се заблагодариме на НЛБ Банка Скопје за укажаната доверба да организираме еден вака важен настан, кој одбележува јубилеј со кој малку компании во земјава можат да се пофалат. Честитки до целата екипа која беше вклучена во процесот и која помогна да го направиме невозможното – возможно“, изјавија од Публицис Груп.

Настанот кој се одржа на 26 ноември 2025 година во Националната опера и балет на едно место ги собра претставниците на институциите, партнерите и соработниците, клиентите, важните и истакнати поединци на Банката, како и вработените, кои ја имаа можност да уживаат во спектакуларна прослава која уште долго ќе се памети.

Претходно истиот ден беше организирана и конференцијата „NLBNext“ на тема „Иднината на банкарството“ која понуди интересни панел дискусии и го задржа вниманието на присутните. Беше креирана и интензивна ПР комуникација која неколку дена ги исполни економските рубрики на најрелевантните медиуми во земјава.

„Нашата прослава инспирирана од јубилејниот слоган Што ако можеш сѐ? и четирите децении посветеност, иновации и раст е доказ дека кога ќе се спојат луѓето, визијата и храброста, само небото е граница. Море од идеи, неколку креативни концепти и стотици часови тимска работа за да се создаде искуство што се памети.

Јубилејот на Банката беше повеќе од само настан. Тој беше живописно патување низ историјата, сегашноста и иднината, прослава посветена на извонредност и партнерства“, изјавија од НЛБ Банка.

Наградата од BEAM Festival уште еднаш ги потврдува високите стандарди кон кои се придржува Публицис Груп, особено кога е во прашање реализацијата на идеите на своите клиенти. Но, исто така претставува мотивација за енергичниот и креативен тим на Агенцијата да продолжи да ги тестира своите можности и да ја поместува границата на она што го дефинираме како успех.

ПР објава

Владата на Србија на утринската вонредна седница донесе одлука за забрана на извоз на нафта и сите нафтени деривати за погон на мотори, со цел да се заштити домашниот пазар од можни недостиг и раст на цените.

Одлуката се однесува на извозот на дизел, бензин и сурова нафта преку сите видови транспорт, а мерката ќе важи до 19 март, по што ќе бидат донесени дополнителни одлуки.

„Суштината на оваа забрана е заштита на домашниот пазар од недостиг и раст на цените, како последица на глобалните нарушувања на светскиот пазар“, изјави министерката за рударство и енергетика на Србија, Дубравка Ѓедовиќ Хандановиќ, пренесува РТС.

Министерката потсети дека Србија е меѓу земјите во кои граѓаните плаќаат нафтени деривати по пониски цени во споредба со нивната реална берзанска вредност, додавајќи дека државата презема мерки за заштита на граѓаните и економијата.

Министерството за дигитална трансформација е во завршна фаза на усогласување на домашната регулатива со европските правила за воведување на моделот „Роаминг како дома“ со Европската Унија, а паралелно се отвора и прашањето за појасна законска рамка за инфлуенсерите и креаторите на дигитални содржини.

Министерот за дигитална трансформација, Стефан Андоновски, информираше дека Европската комисија пред две недели официјално го започнала процесот за сите земји од Западен Балкан, вклучително и Северна Македонија. Според него, секоја држава ќе мора поединечно да ги исполни условите пред да започнат билатералните преговори.

Тој посочи дека државата веќе ги доставила измените и дополнувањата на Законот за електронски комуникации до Европската комисија, со кои се врши целосно усогласување со европските барања во делот на безбедноста, фер користењето на роаминг услугите, како и утврдувањето на прекуграничните цени. По добивањето на коментарите од Европската комисија, предлог-законот ќе биде испратен во Собранието.

Андоновски изрази очекување дека Северна Македонија ќе биде првата земја од регионот што ќе ги исполни сите критериуми за воведување на „роаминг како дома“. Потоа, како што појасни, ќе следуваат преговори со Европската комисија, која ќе биде посредник меѓу земјата и европските телекомуникациски оператори. Според неговите очекувања, договорите би можеле да се постигнат во текот на 2026 година, но динамиката ќе зависи од Европската комисија.

Во меѓувреме, институциите разгледуваат и можности за регулирање на статусот на инфлуенсерите и креаторите на содржини. Министерот соопшти дека веќе се одржала средба со претставници на Здружението на инфлуенсери, а планиран е и состанок со директорот на Агенцијата за аудио-визуелни медиумски услуги.

Според него, во постојната законска рамка постои недореченост, бидејќи Законот за аудио-визуелни медиумски услуги не прави јасна разлика меѓу платформите и креаторите на содржина. Во Европската Унија, како што нагласи, јасно се прави дистинкција меѓу платформи како Инстаграм, Фејсбук или Јутјуб и поединечните креатори кои ги користат тие платформи за објавување содржини.

Во наредниот период ќе се разгледува дали ова прашање ќе се решава со измени на правилниците или ќе биде потребна законска измена за целосно усогласување со европските стандарди.