Биткоинот се стабилизира околу 66.500 долари, откако за време на викендот американските и израелските напади врз Иран, во кои беше убиен врховниот лидер ајатолахот Али Хамнеи, предизвикаа силни турбуленции на глобалните пазари и ликвидации во вредност од околу 300 милиони долари на пазарот на криптовалути.

Најголемата криптовалута по пазарна капитализација од почетокот на денот порасна за 1,1%, а од најниското ниво за викендот од 63.000 долари бележи раст од над 5%. Пазарот повторно се наоѓа во средината на опсегот на тргување што трае од почетокот на февруари, по нестабилната недела во која биткоинот се движеше меѓу 70.000 долари на горната и 62.500 долари на долната граница.

Ескалацијата на конфликтот, како и стравувањата за можни нарушувања на поморскиот сообраќај низ Ормутскиот Теснец, ги насочи инвеститорите кон традиционалните сигурни засолништа. Златото и среброто достигнаа највисоки нивоа во повеќе од еден месец, додека цената на нафтата скокна за 13% на 82 долари за барел, што е највисоко ниво од јули 2024 година.

Во исто време, терминските договори на американските берзански индекси забележаа пад, индексот „Стандард енд Пурс 500“ за 1,1%, а „Насдак 100“ за 1,5%. Сепак, биткоинот покажа поголема отпорност во споредба со традиционалните пазари, при што најголемиот дел од загубите беа регистрирани во саботата, кога американските берзи не работеа.

Според податоци од трговска компанија, викенд-настаните предизвикале околу 300 милиони долари затворање на долги позиции со загуба, но обемот на принудна продажба бил релативно ограничен, што укажува дека пазарите веќе биле подготвени за зголемена нестабилност.

Вкупната вредност на отворените договори за идно купување и продажба на криптовалути се намалила за 2% на 93,78 милијарди долари, но и понатаму е над неодамнешното најниско ниво од 92,40 милијарди. Во последните 24 часа биле затворени позиции во вредност од над 300 милиони долари, при што најголем дел од нив се однесувале на обложувања за раст.

И покрај тензиите, пазарот не покажува знаци на паника. Показателот за очекувана нестабилност на биткоинот за период од 30 дена останува стабилен околу 58,8%, во рамки на опсегот од минатата недела. Слична состојба се забележува и кај етерот.

На пазарот на други криптовалути, движењата главно го следеа биткоинот. Токенот за позајмување „Морфо“ порасна за 5% во последните 24 часа, продолжувајќи го двонеделниот позитивен тренд. Позитивни движења забележаа и „Јуп“, „Ааве“ и „Лидо“, што укажува дека апетитот за ризик останува релативно силен и покрај глобалното насочување кон посигурни вложувања.

Токенот „Хајперликвид“ во саботата скокна за повеќе од 29%, прекинувајќи го негативниот тренд од февруари, а и покрај понеделничкиот пад, останува над клучното ниво од 30 долари.

Од друга страна, токенот поврзан со семејството на поранешниот американски претседател Доналд Трамп продолжи да слабее, губејќи 2,5% од вредноста од почетокот на денот и повеќе од 44% од средината на јануари.

Индексот што ги следи избраните децентрализирани финансиски токени е единствениот што бележи раст во изминатите 24 часа, додека индексите поврзани со пресметковна моќ и платформи за паметни договори забележаа пад.

Оваа нова 2026 година носи комбинација од можности и ризици – каматните стапки се сè уште релативно високи, инфлацијата постепено се стабилизира, но глобалните пазари остануваат чувствителни на геополитички тензии и економски неизвесности.

Во ваков амбиент, клучното прашање е: каде е најпаметното место за инвестирање пари денес? Одговорот зависи од три фактори – колку инвестирате односно износот на инвестицијата, временскиот хоризонт и колкав ризик сте подготвени да преземете.

1. Штедење во банка: сигурност со ограничен принос

Ороченото штедење нуди највисока безбедност и гарантирана камата, но реалниот принос често е минимален. Погодно е за краткорочни цели и финансиска резерва, но не и за значително зголемување на капиталот. Каматните стапки се повисоки отколку пред неколку години, но реалните приноси вклучувајќи ја инфлацијата, често се скромни.

Предности:

• Минимален ризик
• Парите се осигурани до законски пропишаниот износ (30.000 евра во денарска противвредност)
• Погодно за краткорочни цели

Недостатоци:

• Ограничен раст на капиталот
• Инфлацијата може да го „изеде“ профитот
• Добра опција за безбедна резерва, но не и за сериозно зголемување на капиталот.

2. Злато – заштита во неизвесни времиња

Златото традиционално се смета за „безбедно засолниште“ во неизвесни времиња. Обезбедува заштита од инфлација, но не носи камата и е изложено на ценовни флуктуации. Во време на геополитички тензии, често бележи раст.

Предности:

• Заштита од инфлација
• Глобално ликвидни средства

Недостатоци:

• Не носи камата или дивиденда
• Цената може да флуктуира
• Погодно како дел од портфолио, но не како единствена инвестиција.

3. Акции и инвестициски фондови: повисок ризик, повисок потенцијал

Инвестирањето во акции и инвестициски фондови на долг рок носи високи приноси. Инвестициските фондови што ги следат глобалните пазари се особено привлечни. Сепак, бара трпение, дисциплина и прифаќање на краткорочните осцилации на пазарите.

Предности:

• Високи приноси на долг рок
• Можност за пасивно инвестирање

Недостатоци:

• Краткорочни осцилации
• Потребно знаење или советник
• Идеално за инвестиции за подолг период (над 5 години).

4. Обврзници – рамнотежа на безбедност и принос

Државните и корпоративните обврзници нудат умерен, но посигурен и постабилен принос од акциите, со значително помал ризик и помала волатилност. Сепак, носат и значително помал принос во однос на акциите и инвестициските акциски фондови.

Предности:

• Предвидлив приход
• Помала волатилност

Недостатоци:

• Помал потенцијал за раст од акциите
• Добра опција за поконзервативни инвеститори.

5. Недвижности: долгорочна инвестиција

Недвижностите обезбедуваат стабилна вредност и потенцијален приход од кирија, но бараат висок почетен капитал и имаат пониска ликвидност. Ова е еден од најтрадиционалните стратегии за инвестирање на капиталот и долгорочно складирање на вредност на Балканот, но со моменталните цени на пазарот повеќе не е толку исплатлив како порано.

Предности:

• Стабилна побарувачка
• Можен приход од кирија

Недостатоци:

• Огромен почетен капитал
• Ниска ликвидност
• Трошоци за одржување
• Плаќање на долг рок, кое бара сериозен буџет.

6. Криптовалути: огромен ризик, најголем потенцијал за раст

Инвестирањето во криптовалути е многу ризично и бара големо познавање и многу трпение. Но, на долг рок носи највисоки приноси. Сепак, високата волатилност на пазарот кој е премногу сензитивен на надворешните влијанија и геополитичките тензии го прават екстремно ризична инвестиција.

Предности:

• Највисоки приноси на долг рок
• Можност за пасивно инвестирање
• Висока ликвидност

Недостатоци:

• Екстремно висока волатилност
• Потребно големо познавање или советник
• Идеално за инвестиции за над 5 години.

Заклучок: Диверзификацијата е клучот!

Не постои една „најдобра“ инвестиција. Во 2026 година, најразумната стратегија е диверзификација на инвестициите, односно распределба на средствата на повеќе инструменти за балансирање на ризикот и приносот.

Пример за избалансирано портфолио:

• 20% штедење;
• 20% злато или фондови поврзани со злато;
• 20% акции или ETF фондови;
• 20% обврзници;
• 20% криптовалути.

Правилната распределба зависи од возраста, финансиските можности и целите. Најголемата грешка останува чувањето пари без принос – дури и умерена, но паметно распределена инвестиција може да донесе значителни резултати на долг рок.

Цената на Биткоин денеска накратко се спушти под психолошката граница од 65.000 долари, предизвикувајќи зголемена нервоза кај инвеститорите.

Пазарот реагираше на глобалните економски тензии и неизвесноста околу трговските политики во САД, што резултираше со продажба на поризични средства и ликвидации на голем број „long“ позиции.

Аналитичарите посочуваат дека нивото од 65.000 долари е клучна техничка поддршка. Доколку цената се стабилизира над оваа граница, постои можност за нов раст. Во спротивно, следната важна зона на поддршка се очекува околу 60.000 долари.

Движењата на криптовалутата остануваат под силно влијание на глобалните економски и политички настани, иако големата волатилност е вообичаена за пазарот на криптовалути.