АД МЕПСО поднесе жалба на одлуката на предарбитражното тело за спорови, кое пресуди во корист на сараевската компанија „Енергоинвест“ во спорот поврзан со изградбата на интерконекторот кон Албанија.

Од компанијата велат дека очекуваат постапката да заврши во нивна корист, оценувајќи дека располагаат со силна правна основа. За случајот, како што информираат, биле консултирани и две адвокатски компании од САД.

Според МЕПСО, одлуката за раскинување на договорот во декември 2024 година била донесена по детална анализа на проектот и договорните обврски. Од компанијата посочуваат дека реализацијата на проектот на терен изнесувала околу четири проценти, при што биле поставени 24 од вкупно 269 предвидени темели.

Воедно, наведуваат дека во текот на 2023 година биле понудени два анекса на договорот, во вредност од 2,8 и 4,5 милиони евра, но тие не биле прифатени.

Од МЕПСО тврдат дека поради неисполнувањето на обврските од страна на изведувачот досега се евидентирани загуби од 19,8 милиони евра.

Согласно одлуката на предарбитражното тело, МЕПСО треба да исплати шест милиони евра отштета поради едностраното раскинување на договорот со „Енергоинвест“.

Од компанијата велат дека ќе продолжат со правните постапки и дека очекуваат конечна разрешница во нивна корист.

Иуте Македонија активно се вклучи во националната еколошка акција Generalka Weekend, каде компанијата го предводеше тимот за финансии и заедно со бројни волонтери придонесе кон почиста и поздрава животна средина.

Од компанијата истакнуваат дека акцијата не значела само расчистување на јавни површини, туку и поттикнување на тимски дух, заедништво и општествена одговорност. Во активностите учествувале вработени од различни градови, млади волонтери, институции, компании и организации, обединети околу заедничка цел – создавање подобра иднина.

„Заедно со нашите пријатели од Man And Mountain, колеги од различни градови, илјадници волонтери, институции, компании, училишта и луѓе со иста визија, уште еднаш си потврдивме дека најубавите промени се случуваат кога добрата енергија се споделува и кога сите придонесуваат со мал дел од себе“, велат од Иуте Македонија.

Посебен акцент беше ставен на вклучувањето на младите и средношколците, кои, според Иуте Македонија, се двигатели на идните позитивни промени и носители на еколошката свест.

„Посебно нè радува што нѝ се приклучија многу средношколци и млади луѓе, затоа што токму таму почнуваат најважните промени, а тие се генерацијата која ќе ја наследи иднината што денес ја создаваме“, додаваат од Иуте Македонија.

Од Иуте посочуваат дека преку иницијативата „Растеме заедно“, започната пред две години, компанијата продолжува да ја развива својата стратегија за општествена одговорност и поддршка на проекти поврзани со заштита на животната средина и локалната заедница.

„Приказната што ја започнавме пред две години со „Растеме заедно“ денес добива нова сила, нова димензија и уште поголемо значење“, заклучи за крај компанијата.

Американскиот претседател Доналд Трамп се закани дека на Европската Унија ќе ѝ воведе „значително повисоки“ царини до 4 јули, доколку Брисел не ги укине тарифите за американската стока.

По телефонскиот разговор со претседателката на Европската комисија Урсула фон дер Лајен, Трамп изјави дека се согласил да ѝ даде рок до „250-от роденден на нашата држава, или нивните царини веднаш ќе скокнат на многу повисоко ниво“.

Сепак, фон дер Лајен изјави дека Унијата остварува „добар напредок кон намалување на царините“ пред истекот на рокот поставен од Трамп.

Само неколку часа по заканата, американски трговски суд пресуди дека најновите глобални царини од 10 проценти воведени од Трамп не се оправдани според американскиот трговски закон, што би можело да отвори простор за идни судски оспорувања.

Трговскиот договор меѓу Европската Унија и САД беше постигнат во јули минатата година, но неговата имплементација заглави во средата, откако преговорите меѓу претставниците на ЕУ и земјите-членки завршија без договор.

„И натаму сме целосно посветени на неговата имплементација, од двете страни“, напиша фон дер Лајен на платформата X.

Според договорот, американските царини за извозот од Европската Унија би изнесувале 15 проценти. Трамп претходно се закануваше со царини од 30 проценти за европската стока.

Договорот во март доби условно одобрување од Европскиот парламент, откако мнозинството европратеници го поддржаа законодавството потребно за негово спроведување, но со неколку заштитни механизми со кои се бара и САД да го исполни својот дел од договорот.

Европратениците гласаа да прифатат нулти царини за американската стока само доколку европските производи изработени од челик и алуминиум бидат изземени од глобалните американски царини од 50 проценти за овие метални производи.

И покрај напредокот во Европскиот парламент, договорот сè уште треба да биде одобрен од сите 27 земји-членки на Европската Унија.