Надзорниот одбор на НЛБ Банка Скопје, на денешната седница, донесе одлуки за ре-именување на постоечки член и именување на тројца нови членови на Управниот одбор. Со ова, Надзорниот одбор го утврди предлогот за зголемување на бројот на членови на Управниот одбор на Банката од досегашните четири, на пет члена во одборот.

Согласно наведените одлуки, Надзорниот одбор ја ре-именуваше Катерина Јанковиќ која е член на Управниот одбор на Банката, со нов 4-годишен мандат, почнувајќи од јануари 2026. Јанковиќ е докажан финансиски експерт со повеќе од две децении банкарско искуство во областа на корпоративното и малопродажното банкарство.

На истата седница Надзорниот одбор на Банката, со мандат од 4 години, ги именуваше Бојан Стојаноски, Драгиша Тадиќ и Кирил Бухов за нови членови на Управниот одбор, почнувајќи од јануари 2026. Членовите на Управниот одбор на Банката, Петер Зелен и Игор Давчевски ќе продолжат да ги извршуваат своите функции до истекот на нивниот мандат, односно до крајот на 2025 година.

Новоименуваните лица официјално ќе ги преземат функциите, членови на Управниот одбор на Банката, по добивање на согласност од Народната банка за именување на членови на Управниот одбор на НЛБ Банка Скопје.

Кои се новоименуваните членови на Управниот одбор на НЛБ Банка Скопје

Бојан Стојаноски е банкарски експерт со над 20 години искуство на високо раководни позиции во банкарскиот сектор, во областа на корпоративното банкарство, управување со ризици, кредитирање, финансиски менаџмент и управување со средства. Во НЛБ Банка Скопје доаѓа од Стопанска банка АД Скопје, каде што од 2020 година е член на Управниот одбор и Генерален директор за управување со ризици. Во периодот од 2012 до 2019 година, работи во Халкбанк АД Скопје, најпрво како Заменик генерален директор задолжен за продажба, финансиски пазари и средства, а подоцна како Заменик генерален директор за кредитни ризици и финансии. Стојаноски е магистер по економски науки при Економскиот институт – Универзитет „Св. Кирил и Методиј“ во Скопје и има диплома по економија на истиот универзитет.

Драгиша Тадиќ доаѓа од НЛБ Комерцијална Банка, Белград, од позицијата Извршен директор за кредитни ризици, која ја извршуваше и во периодот помеѓу 2015 и 2020 година во НЛБ Банка, Белград. Од 2020 до 2022 година, тој е помошник на Управниот одбор на Комерцијална банка, Белград. Неговото искуство е поврзано и со лизинг операции. Тадиќ моментално е член на Надзорниот одбор на НЛБ Lease&Go, Белград, а до 2015 година работеше во ПроКредит Лизинг, Белград. Има диплома од универзитетот во Белград во областа на меѓународната економија и трговија, како и од универзитетот во Љубљана во областа на деловната администрација.

Кирил Бухов се приклучи на тимот на НЛБ Банка Скопје во јануари годинава како помошник на Управниот одбор. Професионалната кариера ја започнува во областа на телекомуникациите во 2001, а во банкарството преминува во 2006 година. До 2017 година работи во Халкбанк АД Скопје каде напредува до позицијата Директор на сектор за информациски системи. Бухов е дипломиран инженер на Факултетот за електротехника и информациски технологии при Универзитетот „Св. Кирил и Методиј“ во Скопје, каде завршува и  магистерски студии по проектен менаџмент. Поседува богато искуство од областа на дигиталната трансформација, кибер безбедноста, банкарските операции и информациските технологии.

Финансиски експерти од Центарот за советување за финансискиот сектор (ФИНСАК) при Светската банка остварија средба со гувернерот на Народната банка, д-р Трајко Славески и со надлежните тимови на Народната банка. На средбата се разговараше за досегашните и за идните активности во рамките на техничката поддршка којашто Центарот за советување за финансискиот сектор веќе подолг временски период ѝ ја дава на Народната банка.

Во фокусот на оваа техничка поддршка е операционализацијата на функцијата за решавање банки, во согласност со новиот Закон за решавање банки. Активностите во овој домен се насочени кон подготовка на упатства, работни процедури и алатки што ќе ѝ овозможат на Народната банка ефикасно и навремено да ги спроведува своите надлежности во оваа важна област. Станува збор за практична поддршка при градењето на капацитетите потребни за подготовка на плановите за решавање банки и при оценувањето на можноста за нивно решавање.

Покрај ова, како дел од пошироката соработка, се разгледаа и сегашните активности поврзани со управувањето со климатските ризици од страна на банките. Техничката поддршка од ФИНСАК во оваа област вклучува помош за подобрување на супервизорските пристапи преку вградување на климатските фактори во процената на ризиците на банките, како и за воспоставувањето на климатските стрес-тестови за банкарскиот систем.

Соработката на Народната банка со ФИНСАК е долгогодишна и од неа досега произлегоа значајни постигнувања, особено во делот на подготовката на подзаконските акти коишто произлегуваат од Законот за решавање банки. Решавањето банки претставува важен инструмент за заштита на финансиската стабилност, којшто овозможува контролирано справување со проблематични банки без нарушување на интересите на депонентите и на даночните обврзници. Народната банка и натаму активно ќе работи на зајакнување на регулативата и на институционалниот капацитет во согласност со најдобрите меѓународни практики, со цел да обезбеди сигурен и отпорен финансиски систем.

Финтек компанијата Revolut најави значително проширување на своето присуство во Европа преку отворање на нова регионална централа во Париз, креирање на 400 нови работни места и аплицирање за француска банкарска лиценца. Оваа стратегија е дел од планот на компанијата за инвестиции во вредност од над една милијарда евра во Франција во наредните три години.

Новата централа во Париз ќе служи како хаб за Западна Европа и ќе ги покрива операциите на Revolut во Франција, Германија, Шпанија, Италија, Португалија и Ирска. Одлуката за формирање на штаб во Франција е поткрепена со силниот раст на францускиот пазар, каде Revolut има повеќе од пет милиони корисници, и со поддршката од локалните институции.

Во рамки на проширувањето, компанијата планира да вработи најмалку 200 луѓе само во Франција, зголемувајќи го вкупниот број на вработени во земјата на над 500. Дополнително, се предвидува трансфер на околу 600 постојни вработени од други земји во Франција, со фокус на сектори како што се корисничка поддршка, развој на производи и кредитни услуги. Новите вработувања ќе бидат распределени и во останатите западноевропски пазари.

Revolut веќе поседува банкарска лиценца од Литванија, која ѝ овозможува да нуди основни банкарски услуги низ ЕУ. Меѓутоа, добивањето на француска банкарска лиценца би ѝ овозможило на компанијата да понуди поширок спектар на производи, како што се хипотекарни кредити, оврдрафт, инвестициски производи и мобилни услуги специфични за францускиот пазар.

Компанијата исто така најави назначување на Беатрис Коса-Думургиер, поранешен член на управни одбори на Сосиете Женерсл и БНП Парибас, за извршен директор на новата западноевропска централа. Таа ќе ја води експанзијата во регионот и ќе ја предводи комуникацијата со француските регулатори.

Со отворањето на регионална централа во Франција и поднесувањето апликација за локална банкарска лиценца, Revolut испраќа јасен сигнал за своите долгорочни намери на европскиот пазар и зајакнување на своето позиционирање како конкурентен играч во банкарскиот сектор. Оваа стратегија е исто така дел од поширокиот напор за подобро усогласување со регулаторните барања и за поддршка на растот на клиентската база, која само во Франција се очекува да достигне 10 милиони до 2026 година.

Останува да се види дали францускиот регулатор, ќе ја одобри лиценцата, но засега Revolut демонстрира решителност за продлабочување на своето присуство на еден од клучните европски пазари.