Проектот „Грантова шема за поддршка на претпријатијата за зелено работење“ обезбедува финансиска поддршка од вкупно 25 милиони евра за мали, микро и средни компании во Македонија во периодот 2026–2030 година. Преку оваа шема се очекува директна поддршка за најмалку 300 компании, со цел забрзување на зелената транзиција и зајакнување на конкурентноста на домашната економија.

Од вкупниот износ, 22 милиони евра се наменети за грантови, додека компаниите ќе учествуваат со сопствено кофинансирање од 20 до 50 проценти, во зависност од инструментот. Поединечните грантови ќе се движат од 5.000 до 300.000 евра и ќе опфатат техничка и советодавна поддршка, воведување меѓународни стандарди, набавка на опрема, имплементација на нови технологии и развој на зелени и иновативни производи.

Првите јавни повици се очекуваат во средината на 2026 година. Проектот предвидува и организирање инфо-карван во соработка со општините, стопанските комори, регионалните центри и секторските здруженија, со цел навремено информирање и поголема вклученост на компаниите.

Директорката на ИНОВА, Даниела Димовска, истакна дека проектот претставува важен чекор кон трансформација на македонската економија.

„Ова е можност компаниите да инвестираат со поддршка и да се подготват за новите барања на пазарот. Зелената трансформација не е трошок, туку инвестиција во иднината и конкурентноста на македонските компании на европскиот пазар“, нагласи Димовска.

Проектот е насочен првенствено кон компании од производствениот сектор, но и кон други дејности кои придонесуваат за намалување на отпадот, енергетска ефикасност и зголемена употреба на обновливи извори на енергија.

Од вкупната вредност на проектот, 18 милиони евра се обезбедени од Европската Унија, додека седум милиони евра се национални средства.

Премиерот Христијан Мицкоски оцени дека проектот претставува стратешка инвестиција во долгорочниот развој на економијата.

„Оваа поддршка ќе им овозможи на околу 200 компании подготовка и имплементација на меѓународни еколошки и одржливи стандарди, со што ќе се зголеми нивното учество во европските и глобалните синџири на добавувачи“, изјави Премиерот Мицкоски.

Со проектот се очекува забрзано воведување зелени практики, отворање нови работни места и создавање поодржлив и конкурентен бизнис-екосистем во Македонија.

Триглав Осигурување ја заврши 2025 година со нето добивка од 106,5 милиони денари, што претставува раст од 103 проценти во однос на 2024 година и дури 83 проценти над планираното ниво. Силниот резултат е остварен како резултат на подобрениот технички резултат, повисоките финансиски приходи и ефикасната контрола на штетите.

Нето приходите од премии во 2025 година изнесуваат 1.153 милиони денари, што е за 6 проценти повеќе во споредба со претходната година. Растот главно се должи на зголемената бруто-премија за 88 милиони денари, при што најголем придонес имаат здравственото осигурување со раст од 28 милиони денари и осигурувањето на кредити со зголемување од 27 милиони денари. Дел од позитивниот ефект е ублажен од повисоката премија предадена во реосигурување, како и од влијанието на резервите за преносна премија.

Приходите од провизии од реосигурување остануваат стабилни и изнесуваат 104 милиони денари, додека останатите осигурителни приходи бележат минимално намалување поради пониски приходи од асистенција.

Финансиските приходи достигнаа 81 милион денари, што е раст од 23 проценти на годишно ниво, главно како резултат на проширеното инвестициско портфолио. Најголем дел од овие приходи се остварени од камати (74 проценти), реализирани капитални добивки (21 процент), како и од наемнини и курсни разлики.

Нето-расходите за штети изнесуваат 531 милион денари и се за 11 проценти пониски во однос на 2024 година, што произлегува од пониските ликвидирани штети, зголеменото учество на реосигурување и стабилните резерви за штети.

Истовремено, нето-трошоците за спроведување на осигурувањето изнесуваат 589 милиони денари, што е зголемување од 14 проценти, најмногу поради повисоките провизии за продажната мрежа, зголемените трошоци за маркетинг и еднократни трошоци за наем. Останатите технички трошоци и вредносното усогласување на побарувањата бележат умерен раст.

Билансната сума на Друштвото на крајот од 2025 година достигна 3.539 милиони денари, што претставува раст од 12 проценти во однос на претходната година. Најголемо учество во активата имаат финансиските средства со 48 проценти, како и побарувањата од реосигурување со 20 проценти. Намалувањето кај дел од финансиските средства е резултат на пренасочување на капитал за купување сопствен деловен простор.

Во текот на 2025 година, Триглав Осигурување ја надмина и планираната бруто-премија, која изнесува 1.706 милиони денари наспроти планираните 1.690 милиони. Ликвидираните штети се значително пониски од планираното, финансиските приходи се за 19 проценти над планот, а и покрај повисоките трошоци, остварениот резултат е значително подобар од очекувањата.

За 2026 година, Друштвото планира бруто-премија од 1.960 милиони денари, што претставува раст од околу 15 проценти, со очекувана нето добивка од приближно 75 милиони денари. Со тоа, Триглав Осигурување продолжува со фокус на профитабилно, безбедно и одржливо работење, поткрепено со стабилна финансиска позиција и внимателно управување со ризиците.

На 02.02.2026 година, во просториите на Македонската банкарска асоцијација, беше одржан работен состанок инициран од Централниот регистар, во својство на администратор на Регистарот на вистински сопственици.

На состанокот, претставниците на Централниот регистар, предводени од директорката д-р Анита Стамнова, и претставниците на Комисијата за СПП и усогласеност со прописи при Македонската банкарска асоцијација, предводени од претседавачот г-дин Глигор Пандиловски, дискутираа за можностите за воспоставување решение што ќе вклучува верификација на податоците во Регистарот на вистински сопственици.

Имајќи ја предвид улогата на банките како верификатори на податоците, на состанокот беше презентиран процесот, беа разменети искуства, како и утврдени насоки за соодветна обука и понатамошна соработка.

Како заклучок, беше договорено да се организира заедничка работна средба со претставници од Народната банка, Управата за финансиско разузнавање, Министерството за финансии, Македонската банкарска асоцијација и Централниот регистар, со цел сеопфатно разгледување на проблематиката и постигнување заедничка усогласеност меѓу институциите.