Триглав Осигурување ја заврши 2025 година со нето добивка од 106,5 милиони денари, што претставува раст од 103 проценти во однос на 2024 година и дури 83 проценти над планираното ниво. Силниот резултат е остварен како резултат на подобрениот технички резултат, повисоките финансиски приходи и ефикасната контрола на штетите.

Нето приходите од премии во 2025 година изнесуваат 1.153 милиони денари, што е за 6 проценти повеќе во споредба со претходната година. Растот главно се должи на зголемената бруто-премија за 88 милиони денари, при што најголем придонес имаат здравственото осигурување со раст од 28 милиони денари и осигурувањето на кредити со зголемување од 27 милиони денари. Дел од позитивниот ефект е ублажен од повисоката премија предадена во реосигурување, како и од влијанието на резервите за преносна премија.

Приходите од провизии од реосигурување остануваат стабилни и изнесуваат 104 милиони денари, додека останатите осигурителни приходи бележат минимално намалување поради пониски приходи од асистенција.

Финансиските приходи достигнаа 81 милион денари, што е раст од 23 проценти на годишно ниво, главно како резултат на проширеното инвестициско портфолио. Најголем дел од овие приходи се остварени од камати (74 проценти), реализирани капитални добивки (21 процент), како и од наемнини и курсни разлики.

Нето-расходите за штети изнесуваат 531 милион денари и се за 11 проценти пониски во однос на 2024 година, што произлегува од пониските ликвидирани штети, зголеменото учество на реосигурување и стабилните резерви за штети.

Истовремено, нето-трошоците за спроведување на осигурувањето изнесуваат 589 милиони денари, што е зголемување од 14 проценти, најмногу поради повисоките провизии за продажната мрежа, зголемените трошоци за маркетинг и еднократни трошоци за наем. Останатите технички трошоци и вредносното усогласување на побарувањата бележат умерен раст.

Билансната сума на Друштвото на крајот од 2025 година достигна 3.539 милиони денари, што претставува раст од 12 проценти во однос на претходната година. Најголемо учество во активата имаат финансиските средства со 48 проценти, како и побарувањата од реосигурување со 20 проценти. Намалувањето кај дел од финансиските средства е резултат на пренасочување на капитал за купување сопствен деловен простор.

Во текот на 2025 година, Триглав Осигурување ја надмина и планираната бруто-премија, која изнесува 1.706 милиони денари наспроти планираните 1.690 милиони. Ликвидираните штети се значително пониски од планираното, финансиските приходи се за 19 проценти над планот, а и покрај повисоките трошоци, остварениот резултат е значително подобар од очекувањата.

За 2026 година, Друштвото планира бруто-премија од 1.960 милиони денари, што претставува раст од околу 15 проценти, со очекувана нето добивка од приближно 75 милиони денари. Со тоа, Триглав Осигурување продолжува со фокус на профитабилно, безбедно и одржливо работење, поткрепено со стабилна финансиска позиција и внимателно управување со ризиците.

Надзорниот одбор на Vienna Insurance Group (VIG) донесе одлука за именување на Кристоф Рат за член на Управниот одбор на групацијата, со стапување на функцијата од јануари 2026 година.

Кристоф Рат од септември 2024 година ја извршуваше функцијата заменик-член на Управниот одбор, а со новото именување неговата улога се зацврстува на највисоко управувачко ниво во рамки на VIG.

Во рамки на своите надлежности, Рат е одговорен за компанијата за управување со ризици Risk Consult, како и за надзор на работењето на VIG на повеќе пазари во Централна и Југоисточна Европа.

Тој ќе биде член на Управниот одбор за следните земји: Албанија, Босна и Херцеговина, Хрватска, Косово, Црна Гора, Северна Македонија и Србија.

Од VIG упатуваат честитки за новото именување, изразувајќи уверување дека искуството и експертизата на Кристоф Рат ќе придонесат за понатамошен стабилен развој и зајакнување на позицијата на групацијата на регионалните пазари.

Комисијата за одлучување по прекршок при Комисијата за заштита на конкуренцијата (КЗК) донесе решение со кое утврди постоење на картелско однесување меѓу десет осигурителни компании на пазарот на задолжителното осигурување од автомобилска одговорност (АО).

Според КЗК, во усогласеното однесување учествувале: Евроинс Осигурување, Триглав Осигурување, Македонија – Виена Иншуренс Груп, Сава Осигурување, Еуролинк, Граве, Уника, Осигурителна Полиса, Халк Осигурување и Кроација Осигурување.

Во постапката било утврдено дека компаниите во периодот од 1 март до 7 мај 2024 година разменувале чувствителни информации, координирале активности и речиси истовремено донеле идентични одлуки за зголемување на режискиот додаток, односно делот од премијата што се однесува на вршење на дејност.

КЗК оценува дека ваквото однесување претставува ограничување на конкуренцијата „по своја цел“, што е најтешка форма на повреда согласно член 7 од Законот за заштита на конкуренцијата. Со размената на информации и паралелното носење ценовни одлуки, независната деловна политика била заменета со колективно дејствување на пазарот, што е строго забрането.

Врз основа на утврдените факти, КЗК изрече прекршочни санкции во вкупен износ од околу 280.000 евра. Ова значи дека секоја од десетте осигурителни компании би платила просечно по околу 28.000 евра казна.

Од Комисијата нагласуваат дека остануваат посветени на заштита на фер пазарни услови, спречување на картели и обезбедување конкурентна средина во интерес на потрошувачите и стопанството.