Цените на нафтата денеска забележаа раст откако беше соопштено дека се одложени разговорите меѓу Соединетите Американски Држави и Иран, кои требаше да се одржат во швајцарското планинско одморалиште Бургеншток.

Според податоците на „Трејдинг економикс“, цената на американската сурова нафта WTI достигна 77,3 долари за барел, додека северноморската нафта Брент се тргува по цена од 80,1 долари за барел.

Во меѓувреме, цената на природниот гас на европската берза TTF изнесува околу 41,5 евра за мегават-час, односно 427,45 евра за 1.000 кубни метри.

Пазарите внимателно ги следат случувањата поврзани со односите меѓу САД и Иран, бидејќи евентуалните промени во геополитичката ситуација можат директно да влијаат врз глобалното снабдување и цените на енергенсите.

Банкарскиот сектор продолжува со стабилен раст и кај штедењето и кај кредитирањето, покажуваат најновите податоци на Народната банка за мај 2026 година.

Според објавените податоци, паричната маса (М3) во мај е зголемена за 0,8 проценти во однос на претходниот месец, додека на годишно ниво е регистриран раст од 8,6 проценти. Најголем придонес за ова зголемување имаат готовите пари во оптек, депозитните средства и долгорочните депозити.

Вкупните депозити во банкарскиот систем се зголемени за 0,8 проценти на месечно ниво, пред сè поради повисоките депозити на корпоративниот сектор. Во споредба со истиот период лани, депозитите бележат раст од 8,6 проценти, при што најголем придонес имаат домаќинствата.

Истовремено, кредитната активност останува силна. Вкупните кредити во мај се повисоки за 1,2 проценти во однос на април, а на годишна основа растот достигнува 13,4 проценти. Пораст е забележан и кај кредитите одобрени на компаниите и кај оние наменети за граѓаните.

Кај компаниите, депозитите се зголемени за 2,5 проценти на месечно ниво и за 5,8 проценти на годишно ниво. Кредитите на корпоративниот сектор, пак, бележат раст од 0,9 проценти во однос на претходниот месец и 15 проценти во споредба со мај минатата година.

Депозитите на домаќинствата во текот на мај останале речиси непроменети, но на годишно ниво се повисоки за 9,7 проценти. Во истиот период, кредитите на населението пораснале за 1,3 проценти на месечно ниво и за 12 проценти во споредба со лани.

Најизразен раст и понатаму има кај станбените кредити, кои се зголемени за 1,4 проценти на месечно и за 16,3 проценти на годишно ниво. Потрошувачките кредити бележат раст од 1,1 процент во однос на април и 11,2 проценти во споредба со мај минатата година.

Позитивни движења се забележани и кај автомобилските кредити, додека кредитирањето преку кредитни картички покажува благ месечен раст, иако останува под нивото од истиот период лани.

Податоците на Народната банка укажуваат дека и граѓаните и компаниите продолжуваат активно да ги користат банкарските производи, а кредитната активност останува значаен фактор за одржување на економските текови.

Цената на златото продолжи да слабее во текот на вчерашното тргување, пробивајќи го нивото на поддршка од 4.200 долари, кое аналитичарите го посочуваа како последна проектирана цел на надолниот тренд.

Според анализата на Economies.com, ваквото движење ја потврдува доминацијата на продавачите на пазарот и укажува дека краткорочниот мечкин тренд останува на сила.

Дополнителен притисок врз цената создава и фактот што златото се движи под 50-дневниот експоненцијален подвижен просек (EMA50), што ги намалува шансите за посериозно закрепнување во блиска иднина.

Техничките индикатори и понатаму сигнализираат негативен моментум, иако пазарот веќе се наоѓа во зона на препродаденост. Аналитичарите оценуваат дека тоа ја одразува силата на тековниот пад, додека движењето на цената долж опаѓачката тренд-линија остава простор за дополнителни загуби во наредниот период.

Пазарните учесници сега внимателно ќе следат дали ќе се појават нови фактори што би можеле да го запрат падот или да поттикнат корекција на цената на благородниот метал.