Седма година по ред на Македонска берза успешно се одржа „Инвеститорски ден“ на којшто сите домашни физички лица имаа можност да тргуваат со акции на сите пазарни сегменти без да ги платат провизиите кон Берзата, Централниот депозитар на хартии од вредност и овластените пазарни учесници (банки и брокерски куќи), во износ на остварен промет до 10.000 евра.

На вчерашниот „Инвеститорски ден“ на Берзата се склучија вкупно 335 нормални трансакции, што претставува најголем број склучени трансакции во еден ден во 2026 година. Споредбено, просечниот број на склучени трансакации со акции во 2026 година изнесува 66 трансакции.  Дополнително, во БЕСТ системот на Берзата се внесени вкупно 497 налози за тргувањe, што претставува повторно најголем број на внесени налози во берзанскиот систем за тргување во текот на оваа година.

Вкупниот промет од тргување во БЕСТ системот со акции на „Инвеститорскиот ден“ на Берзата надмина 670 илјади евра, односно изнесува околу 41 милиони денари.  

Иницијативата „Инвеститорскиот ден“ ја прифатија и во неа активно се вклучија сите единаесет членки на Берзата (Еурохаус, Илирика Инвестментс, Иново Брокер, Инвестброкер, Комерцијална банка, НЛБ Банка, Стопанска банка Скопје, ТТК Банка, Фершпед брокер, Шпаркасе Банка Скопје и Халк Банка Скопје) и Централниот депозитар за хартии од вредност, а истата доби поддршка и од Комисијата за хартии од вредност.

Македонската берза ја заврши неделата од 7 до 11 септември со намалена активност и вкупен промет од 34,6 милиони денари, односно околу 564 илјади евра. Во споредба со претходната недела, прометот е намален за 32,25 проценти.

Во текот на неделата биле реализирани 176 трансакции, што е за 25 помалку од претходниот период, а биле истргувани вкупно 7.140 акции и обврзница.

Најголем промет оствариле акциите на Комерцијална банка Скопје со 18,4 милиони денари. Следуваат Алкалоид Скопје со 6,5 милиони денари и Македонски Телеком Скопје со 2,3 милиони денари. Акциите на Макпетрол оствариле промет од 1,17 милиони денари, а на НЛБ Банка 1,13 милиони денари.

Во текот на неделата раст на вредноста забележале две акции. Најголем раст имале акциите на НЛБ Банка од 1,03 проценти, додека акциите на Макпетрол пораснале за 0,85 проценти.

Од друга страна, најголем пад забележале акциите на Комерцијална банка, чија вредност се намалила за 1,21 процент. Акциите на Алкалоид паднале за 0,87 проценти, на Македонски Телеком за 0,8 проценти, а на Реплек за 0,69 проценти.

Според бројот на истргувани акции, најактивен бил Македонски Телеком со 4.765 акции, по што следуваат Комерцијална банка со 719 и Гранит со 678 истргувани акции.

Податоците покажуваат поумерена берзанска активност во текот на неделата, со значително понизок промет во однос на претходниот период и релативно ограничени ценовни движења кај најтргуваните акции.

Македонската берза најави Инвеститорски ден на 14 септември, кога домашните физички лица ќе можат да инвестираат и да тргуваат со акции без плаќање провизии.

Како што информираат од Берзата, целта на иницијативата е да им се овозможи на граѓаните полесен пристап до пазарот на капитал и можност за инвестирање во акции на македонски компании.

Заинтересираните инвеститори можат да се обратат до членките на Македонската берза: Еурохаус АД Скопје, Илирика Инвестментс АД Скопје, Инвестброкер АД Скопје, Иново Брокер АД Скопје, Комерцијална банка АД Скопје, НЛБ Банка Скопје, Стопанска банка АД – Скопје, ТТК Банка АД Скопје, Фершпед брокер АД Скопје, Халкбанк АД Скопје и Шпаркасе банка АД Скопје.

Од Македонската берза ги повикуваат граѓаните да ја искористат можноста и да се запознаат со инвестирањето во домашни акции во рамки на Инвеститорски ден 2026.