Друштвото Пелистерка АД Скопје заработи јавна опомена за непочитување на берзанските правила, бидејќи компанијата не ги објавила во определениот рок одлуките од акционерското собрание.

„На друштвото Пелистерка АД Скопје, котирано на Официјалниот пазар на Берзата на подсегментот Задолжителна котација, му е изречена мерката јавна опомена преку интернет страната на Берзата, поради необјавување на одлуките донесени од Собранието на акционери на друштвото во пропишаниот рок, со што не постапи согласно член 39, став 7 од Правилата за котација.“ – се вели во известувањето.

На 19.09.2024 година, во просториите на Македонска берза, во коорганизација на Берзата и PwC Македонија, се одржа нов редовен состанок со компаниите, членки на Клубот БУМ (Берзата и Успешните во Македонија). Покрај постојните членки во БУМ Клубот, на настанот беа поканети и присуствуваа основачи и/или наследници на основачите од редот на најуспешните семејни компании во Република Северна Македонија.

Пред присутните, специјална презентација имаше г-ѓа Ewelina Grzelak од PwC Полска, докажан експерт со над 15 години искуство во развивањето на семејни претпријатија, водечки авторитет во изработката на иновативни решенија за наследување на семејни бизниси и ко-основач на клубот Sukcesora на PwC. Г-ѓа Grzelak навлезе во клучни теми како што се планирање на сукцесијата кај семејните бизниси, усогласување на меѓугенерациските визии за иднината на бизнисот и вклучување на пошироки семејни групи во одлучувањето.

Во рамките на дисусијата Иван Мишев и Васко Соткароски од  PwC Македонија се фокусираа на правните механизми за планирање и имплементација на сукцесија на семејните бизниси во македонскиот правен систем. Илчо Лазарески од Македонска берза подетално говореше за тоа како излегувањето на берза би можело да ги реши прашањата на сукцесија во компаниите. Интересните дискусии и споделените искуства обезбедија корисни насоки за сите учесници во насока на градење на одржливи мултигенерациски семејни бизниси.

Во БУМ Клубот членуваат дваесетина домашни компании од различни сектори. Клубот официјално започна со работа минатата година. Целта на неговото формирање е стратешка поддршка на домашните компании за нивен одржлив раст на долг рок, обезбедување на специфичен know-how и комуникација со останати компании, организаторите и партнерите на клубот, како и со избрани релевантни регионални субјекти. Клубот примарно настојува да помогне во поврзувањето на инвеститорите и компаниите – членки на Клубот, со акцент на финансирање на бизнисите преку пазарот на капитал.

Состаноците на клубот се организираат квартално.

Компаниите кои сакаат да станат членки на овој Клуб може да поднесат апликација за членство во Клубот. Апликацијата е достапна на следниот линк: https://bum.mse.mk/

Агенцијата за супервизија на капитално финансирано пензиско осигурување учествуваше на 23-та годишна конференција на Македонска Берза. Еден од панелите на конференцијата беше за “Домашните институционални инвеститори и Берзата” на која од Агенцијата учествуваше Дарко Саздов, член на Советот на експерти на Агенцијата. На панелот се дискутираше за состојбите во пензискиот систем во Република Северна Македонија во споредба со регионот и пошироко во земјите од ОЕЦД.

Дарко Саздов, како позначајни информации наведе дека пензиските фондови со крајот на 2023 година во сите земји забележаа позитивен раст  на средствата на пензиските фондови со капитално финансирано пензиско осигурување.

Исто така, Саздов наведе дека, инвестициските стапки на принос со крајот на 2023 година ги надминаа стапките на инфлација во повеќето земји и се остварија позитивни номинални стапки на принос кај сите земји од ОЕЦД и регионот што најмногу ги одразуваат инвестициските добивки од вложувањата во обврзници и акции, при што цените на пазарите на капитал се зголемија поради намалувањето на каматните стапки или очекувањата за такви намалувања во пресрет на забавувањето на инфлацијата.