Берзанските индекси на Волстрит забележаа пад на почетокот на неделата, предводени од слабеењето на технолошкиот сектор, додека инвеститорите внимателно ги следеа вестите за мировните разговори меѓу САД и Иран што се одржуваат во Швајцарија.

Индексот Dow Jones се намали за 0,29 отсто и затвори на 51.712 поени. S&P 500 загуби 0,37 отсто, спуштајќи се на 7.472 поени, додека Nasdaq падна за 1,32 отсто на 26.166 поени.

Најголем притисок врз пазарот извршија технолошките компании. Акциите на Amazon потонаа за речиси пет отсто, а Meta Platforms изгуби два отсто. Alphabet забележа пад од пет отсто, што е негов најлош дневен резултат во повеќе од една година, поради загриженоста од заминувањето на двајца познати истражувачи во областа на вештачката интелигенција кај конкурентски компании.

Под притисок се најде и SpaceX на Илон Маск, чии акции ослабеа за 16 отсто, бележејќи трет последователен ден на загуби.

Според Лиз Ен Сондерс, главна инвестициска стратегистка во Charles Schwab, интересот на малите инвеститори за секторот на вештачката интелигенција и технологијата останува силен, но се забележува промена во начинот на вложување.

„Не станува збор за намален интерес за технологијата или вештачката интелигенција, туку за промена на инструментите за инвестирање. Сè повеќе инвеститори се насочуваат кон ЕТФ-фондови наместо кон поединечни акции“, изјави Сондерс за CNBC.

Цените на суровата нафта бележат благ раст во денешното тргување, откако претходно беа под силен притисок и достигнаа препродадени нивоа, покажува најновата анализа на Economies.com.

Според аналитичарите, растот претставува обид за делумно закрепнување на загубите, поттикнат од подобрување на техничките индикатори. Сепак, пошироката слика останува негативна бидејќи нафтата и натаму се тргува под 50-дневниот експоненцијален подвижен просек (EMA50), што го потврдува краткорочниот надолен тренд.

Во меѓувреме, златото и среброто продолжуваат да се соочуваат со притисок на пазарите. Среброто го продолжува падот во услови на доминантен надолен тренд и засилен продажен притисок, додека техничките индикатори сигнализираат слабеење на позитивниот моментум.

Слична е состојбата и кај златото, кое се движи во нестабилен опсег без да успее да изгради посилен нагорен импулс. Аналитичарите посочуваат дека металот останува под влијание на негативни технички сигнали и продолжува да се тргува под EMA50, што ја одржува веројатноста за натамошен притисок врз цената.

На девизниот пазар, еврото продолжи да слабее во однос на американскиот долар. Валутниот пар EUR/USD падна под нивото на поддршка од 1,1430, што според анализата ја потврдува преовладувачката надолна тенденција. Иако индикаторите покажуваат дека пазарот влегува во препродадена зона, што може да донесе краткорочни корекции, генералниот тренд засега останува во корист на доларот.

Фјучерсите на американските берзански индекси во понеделникот се движеа без поголеми промени додека инвеститорите ги следат најновите случувања околу преговорите меѓу САД и Иран, како и претстојните податоци за инфлацијата што внимателно ги следи Федералните резерви.

Фјучерсите на индексот S&P 500 беа во благ минус од 0,2 отсто, додека Nasdaq-100 се движеше околу нивото од претходното затворање. Фјучерсите на Dow Jones загубија околу 29 поени.

На азиските пазари беше забележана мешана слика. Јапонскиот индекс Nikkei 225 достигна ново рекордно ниво со раст од 1,55 отсто, додека јужнокорејскиот Kospi напредуваше за 0,7 проценти. Истовремено, хонгконшкиот Hang Seng забележа пад од 0,7 проценти, а кинескиот CSI 300 порасна за повеќе од два отсто.

Цената на нафтата се намали откако посредниците Катар и Пакистан соопштија дека американските и иранските претставници постигнале договор за патоказ што би требало да доведе до конечен договор во рок од 60 дена. Северноморската нафта Брент по првичниот раст падна за 1,6 проценти на 79,30 долари за барел, додека американската WTI се тргуваше околу 77 долари за барел.

Инвеститорите оваа недела се фокусирани на објавувањето на индексот на лична потрошувачка (PCE) за мај, кој е омилената мерка за инфлација на Федералните резерви. Економистите очекуваат основната инфлација да покаже забрзување во однос на април, што дополнително ги зголемува шпекулациите за можно зголемување на каматните стапки во САД веќе во октомври.

Минатата недела американските берзи ја завршија трговската недела во позитивна територија. Индексот S&P 500 порасна за речиси еден процент, Dow Jones исто така доби околу еден процент, додека Nasdaq Composite напредуваше за повеќе од два проценти, поттикнат од растот на акциите во технолошкиот сектор.

И покрај неизвесностите поврзани со монетарната политика и геополитичките ризици, аналитичарите оценуваат дека условите за раст на акциите засега остануваат поволни. Сепак, предупредуваат дека подоцна во годината може да дојде до нагла промена на пазарните услови и зголемена нестабилност.