Занаетчиската комора Скопје предупредува дека наглото покачување на минималната плата на 600 евра може да предизвика сериозни последици за занаетчискиот сектор и малите семејни бизниси. Според Комората, таквиот потег ризикува затворање на дуќаните, отпуштања и дополнително осиромашување на локалните заедници.

Претседателот Горан Ристовски посочува дека покачувањето на платите мора да биде реално, законски утврдено и темелно анализирано. Наглото зголемување би значело драстично зголемување на трошоците за придонеси, особено за занаетчиите кои плаќаат паушален данок или се оданочуваат според остварен приход. Во услови на растечки трошоци за струја, репроматеријали и закупнини, дополнителниот притисок врз платите може да биде пресуден за опстанокот на илјадници мали бизниси.

Ристовски додава дека најранливи се занаетчиите во помалите градови и руралните средини, каде што куповната моќ е ниска, а миграцијата ја празни работната сила и клиентите. Покачувањето на минималната плата, според Занаетчиската комора, може да предизвика зголемување на цените на производите и услугите, намалување на побарувачката и брзо затворање на дуќаните.

Во Скопје работат над 2.300 занаетчии, а на ниво на држава нивниот број изнесува околу 8.000. Комората нагласува дека без внимателно балансирање меѓу социјалните цели и економската реалност, ризикот е работните места во занаетчискиот сектор да не опстанат.

Премиерот Христијан Мицкоски денеска попладне ќе оствари средба со претставниците на Синдикатот на УПОЗ, закажана за 16:45 часот. Средбата следи по изјавата на УПОЗ дека понудата на Владата за раст на платите е прифатлива и дека дополнително ќе се разгледува во рамките на синдикалните органи.

Претходно, владината понуда беше прифатена и од Конфедерацијата на слободни синдикати (КСС), предводена од Благоја Ралповски, што укажува на поширока синдикална согласност околу предложениот модел.

Во изјава за медиумите, Мицкоски посочи дека понудата е на маса повеќе од една година и дека Владата е подготвена за финализирање и потпишување на колективен договор за државните службеници.

Говорејќи за разговорите околу минималната плата и зголемувањето на платите во јавната администрација, премиерот истакна дека Владата има јасно дефинирана формула за пресметка на платите, која предвидува етапно зголемување на примањата.

„Најголем дел од претставниците на синдикатите, и репрезентативните и од гранковите, се согласни со таа позиција на Владата, со неколку исклучоци. Формулата што ја нуди Владата во врска со тоа како ќе следи покачувањето на платите на административците етапно ќе значи повисоки примања за нив, а не само за онолку средства колку што ќе расте минималната плата“, изјави Мицкоски.

Разговорите продолжуваат со цел постигнување конечен договор и обезбедување одржливо решение за платите во јавниот сектор.

Проектот „Грантова шема за поддршка на претпријатијата за зелено работење“ обезбедува финансиска поддршка од вкупно 25 милиони евра за мали, микро и средни компании во Македонија во периодот 2026–2030 година. Преку оваа шема се очекува директна поддршка за најмалку 300 компании, со цел забрзување на зелената транзиција и зајакнување на конкурентноста на домашната економија.

Од вкупниот износ, 22 милиони евра се наменети за грантови, додека компаниите ќе учествуваат со сопствено кофинансирање од 20 до 50 проценти, во зависност од инструментот. Поединечните грантови ќе се движат од 5.000 до 300.000 евра и ќе опфатат техничка и советодавна поддршка, воведување меѓународни стандарди, набавка на опрема, имплементација на нови технологии и развој на зелени и иновативни производи.

Првите јавни повици се очекуваат во средината на 2026 година. Проектот предвидува и организирање инфо-карван во соработка со општините, стопанските комори, регионалните центри и секторските здруженија, со цел навремено информирање и поголема вклученост на компаниите.

Директорката на ИНОВА, Даниела Димовска, истакна дека проектот претставува важен чекор кон трансформација на македонската економија.

„Ова е можност компаниите да инвестираат со поддршка и да се подготват за новите барања на пазарот. Зелената трансформација не е трошок, туку инвестиција во иднината и конкурентноста на македонските компании на европскиот пазар“, нагласи Димовска.

Проектот е насочен првенствено кон компании од производствениот сектор, но и кон други дејности кои придонесуваат за намалување на отпадот, енергетска ефикасност и зголемена употреба на обновливи извори на енергија.

Од вкупната вредност на проектот, 18 милиони евра се обезбедени од Европската Унија, додека седум милиони евра се национални средства.

Премиерот Христијан Мицкоски оцени дека проектот претставува стратешка инвестиција во долгорочниот развој на економијата.

„Оваа поддршка ќе им овозможи на околу 200 компании подготовка и имплементација на меѓународни еколошки и одржливи стандарди, со што ќе се зголеми нивното учество во европските и глобалните синџири на добавувачи“, изјави Премиерот Мицкоски.

Со проектот се очекува забрзано воведување зелени практики, отворање нови работни места и создавање поодржлив и конкурентен бизнис-екосистем во Македонија.