Преработувачката индустрија во еврозоната продолжи да се опоравува во јули, при што производството достигна највисоко ниво во последните речиси четири и пол години. Сепак, слабата побарувачка и намалените нови нарачки создаваат неизвесност околу одржливоста на овој тренд, покажува најновиот извештај на „S&P Global“.

Вредноста на индексот на менаџерите за набавка (PMI) за преработувачката индустрија се зголеми од 51,4 поени во јуни на 51,9 поени во јули, што е највисоко ниво од април 2022 година. Индексот на производство, пак, порасна на 52,9 поени, достигнувајќи најсилна вредност од март 2022 година.

Вредност над 50 поени сигнализира раст на активноста, но аналитичарите предупредуваат дека подобрувањето главно се должи на реализација на претходно натрупани нарачки, додека новата побарувачка останува слаба.

Извозните нарачки повторно се намалиле, особено во Франција, Шпанија, Италија и Австрија, а компаниите продолжиле со намалување на бројот на вработени поради неизвесните економски изгледи.

Позитивен сигнал е забавувањето на растот на цените на суровините и производствените трошоци, кои се зголемиле со најбавно темпо од март.

Главниот економист на „S&P Global“, Крис Вилијамсон, оцени дека европската индустрија моментално бележи подобрување, но предупреди дека трендот може да ослаби во наредните месеци доколку не се врати растот на новите нарачки.

Војната на Блискиот Исток значително ја намали довербата на потрошувачите во еврозоната и го забави економското закрепнување, предупредува Европската централна банка (ЕЦБ) во најновата анализа.

Според извештајот, индексот на доверба на потрошувачите во периодот од февруари до април се намалил за околу 12 поени, пад речиси споредлив со оној по почетокот на војната во Украина. Истовремено, годишниот раст на номиналната потрошувачка на домаќинствата се забавил од 3–4 проценти на околу 2,5 проценти во април 2026 година.

Најголемото намалување е забележано кај дискреционите трошоци, при што домаќинствата ги одложуваат купувањата на луксузна облека, обувки, спортска опрема, патувања и рекреативни услуги. Домаќинствата со повисоки приходи најмногу ја намалиле ваквата потрошувачка поради зголемената неизвесност, додека оние со пониски примања ги крателе трошоците за трајни добра, ресторани и кафулиња.

Единствената категорија со раст на трошоците останува енергијата, како резултат на повисоките цени на горивата и транспортот.

Дополнителна загриженост предизвикува фактот што околу 40 проценти од анкетираните граѓани сметаат дека нивните приходи нема целосно да ја надоместат изгубената куповна моќ поради инфлацијата. Според ЕЦБ, доколку овие очекувања се задржат, домаќинствата би можеле да продолжат да штедат наместо да трошат, што дополнително би го забавило економскиот раст во еврозоната.

Цената на бакарот продолжува да расте поради нарушувањата во рударското производство во Чиле, предизвикани од обилни снежни врнежи, поплави и силни ветрови.

Екстремното време во изминатата недела однесе 13 животи и го отежна работењето на неколку големи рударски компании, меѓу кои „Англо Американ“, „Антофагаста“, „Лундин мајнинг“ и државната компанија „Коделко“.

„Антофагаста“ привремено ги запре ископувањето и преработката во рудникот Лос Пеламбрес, додека компанијата „Барик“ евакуираше дел од вработените. Во рудникот Касеронес, кој го управува „Лундин мајнинг“, повторното започнување на производството би можело да трае две до три недели поради оштетени далноводи.

Чиле произведува повеќе од една петтина од бакарот во светот, поради што секое подолготрајно нарушување може дополнително да ја намали понудата и да ги зголеми цените.

Бакарот минатиот месец достигна рекордни 6,70 долари за фунта, односно 13.643 долари за метрички тон. Аналитичарите предупредуваат дека глобалниот пазар веќе се соочува со ограничена понуда, неизвесност околу американските царини и намалена достапност на отпаден бакар во Кина.

Побарувачката, пак, расте поради употребата на бакарот во електричните мрежи, паметните телефони, електричните возила, апаратите за домаќинство и центрите за податоци за вештачка интелигенција.

Според експертите, последиците од бурите засега се ограничени и привремени, но нови прекини во производството би можеле да предизвикаат дополнителен раст на цените. Околу 64 отсто од видливите светски залихи на бакар во моментов се наоѓаат во САД.

Извор: CNBC