Во периодот од 01.01-31.12.2020 година Комерцијална банка од своето работење оствари нето добивка за финансиската година во износ од 1.912,0 милиони денари наспроти остварената нето добивка за претходната година во износ од 1.806,8 милиони денари, такашто истата е зголемена за 5,8%. Планираната бруто-добивка за 2020 година е остварена со 105,4%.

Одличниот финансиски резултат од претходната година придонесе Собранието на акционери на банката уште на почетокот на годината да донесе Одлука за употреба и распоредување на нераспределената добивка во износ од 1.911,9 милиони денари и ја утврдија дивидендата за обичните акции во висина од 60% од номиналната вредност на акцијата, односно по 600 денари бруто на една акција или 540 денари нето износ.

Но, поради големата неизвесност предизвикана од пандемијата на вирусот Ковид-19, Советот на Народната банка на Република Северна Македонија на 26-ти февруари донесе Одлука за привремено ограничување на распределбата и исплатата на дивиденда на акционерите на банките.

По стабилизирање на ситуацијата, драстичното намалување на бројот на заболени со коронавирусот, како и се поголемиот број на вакцинирани лица придонесе за раздвижување на економијата и целосно олабавување на рестриктивните мерки.

Една од нив беше и Одлуката на Народната банка за укинување на Одлуката за привремено ограничување на распределбата и исплатата на дивиденда на акционерите на банките.

Веднаш по добивањето на оваа информација, Комерцијална банка АД Скопје ги извести акционерите на Банката дека престанува да важи привременото ограничување на распределбата и исплатата на дивиденда на акционерите на банките.

Надзорниот одбор на Банката врз основа на член 7 од Одлуката за определување на износот на дивидендата и датуми на исплата на дивиденда за 2020 година бр.02-190-8/1, донесена од Собранието на Комерцијална банка АД Скопје на 29.03.2021 година, на 04.08.2021 година донесе Одлука за утврдување точни датуми на исплата на дивиденда за 2020 година, согласно која е утврден следниот ДИВИДЕНДЕН КАЛЕНДАР за датумите на исплата на дивиденда за 2020 година:

• Последен ден на тргување со право на дивиденда за 2020 година е 09.08.2021 година.
• Прв ден на тргување без право на дивиденда за 2020 година е  10.08.2021 година.
• Датумот на евиденција, според кој се определува листата на акционери кои имаат право да добијат дивиденда за 2020 година, е 11.08.2021 година.
• Исплатата на дивиденда за 2020 година ќе започне на 24.08.2021 година.

Во меѓувреме, Комерцијална банка продолжи да бележи одлични резултати и во периодот од 01.01-30.06.2021 година од своето работење Банката оствари позитивен финансиски резултат во износ од 828,3 милиони денари наспроти остварениот позитивен финансиски резултат во истиот период минатата година во износ од 743,3 милиони денари што претставува зголемување за 11,4%.

Одличното работење на Комерцијална банка е добредојдено за акционерите на Банката кои убаво ќе се „офајдат” од дивиденда на крајот на месецов. Банката има вкупно 5.207 акционери запишани во книгата за иматели на акции во ЦДХВ. Вкупниот број на издадени акции е 2.279.067.

Но, се поставува прашањето кој ќе го добие најголемиот колач од дивидендата која е предвидена да започне со исплата на 24.08.2021 година?

Најголем акционер во Комерцијлна банка е Адора Инженеринг. Градежната компанија во сопственост на Ванчо Чифлиганец заедно со поврзаните лица поседува вкупно 341.860 обични акции, односно има учество од 14,9999% во основната главнина на Комерцијална банка АД Скопје. Тоа значи дека доколку за една акција Банката ќе исплаќа 540 денари нето, Адора Инженеринг и Ванчо Чифлиганец ќе заработат неверојатни 3 милиони евра.

Преземањето на оваа содржина не е дозволена без согласност од Редакцијата на Банкарство.мк.