Извршниот директор на американската банка, „Morgan Stanley“, рече дека очекува вработените да се вратат во своите канцеларии во Њујорк, поради солидното ниво на вакцинирани во САД.

„Ако можете да одите во ресторан во Њујорк, тогаш можете да дојдете во канцеларијата. И ние ве сакаме во канцеларија“, рече Џејмс Горман, пренесе Денар.

„Би бил многу разочаран ако вработените не го најдат патот до канцеларијата до Денот на трудот (6-ти септември), а потоа ќе имаме многу поинаков разговор“, рече Горман.

„Ако сакате да бидете платени како во Њујорк, ќе работите во Њујорк. Нема да се случи: Јас сум во Колорадо и работам во Њујорк и добивам плата како во Њујорк. Жал ми е, но тоа нема да биде така“, вели Горман.

Тој додаде дека компанијата нема да дејствува „диктаторски“ и ќе понуди одредена флексибилност во поделбата на работното време помеѓу канцеларијата и домот. Тој исто така спомена дека повеќе од 90% од вработените во „Morgan Stanley“ се вакцинирани против Ковид-19.

Оваа недела, Њујорк ја достигна целта да вакцинира 70% од возрасните во државата. Како резултат на тоа, локалните власти објавија дека ги укинуваат ограничувањата наметнати поради коронавирусот.