Добивката на банкарскиот гигант „HSBC” повеќе од двојно се зголеми во првата половина од годината, благодарение на економското закрепнување во Британија и Хонг Конг, пренесуваат британските медиуми.

Најголемата европска банка во однос на имотот оствари профит пред оданочување од 10,8 милијарди долари (7,8 милијарди фунти) во првите шест месеци од годинава, додека нејзиниот профит во истиот период минатата година изнесуваше 4,3 милијарди долари.

Банката, со седиште во Велика Британија, објави дека сите региони во кои работи се профитабилни, пренесува „BBC”.

Според финансиските извештаи на „HSBC”, банкарскиот бизнис во Велика Британија оствари повеќе од 2,1 милијарди долари профит пред оданочување во првото полугодие.

Водена од економското закрепнување на двата најголеми пазари, Велика Британија и Хонг Конг, „HSBC” ќе им исплати дивиденда на акционерите. Откако Банката на Англија минатиот месец ги укина ограничувањата за исплата на дивиденда на банките, „HSBC” одлучи за привремена исплата на дивиденда на акционерите за првата половина од годината во износ од седум центи по акција.

„HSBC” соопшти дека ќе се држи до својата програма за реструктуирање, откако во февруари минатата година објави дека ќе отпушти 35.000 работници како дел од планот за намалување на трошоците од 4,5 милијарди долари до 2022 година.