На 16.12.2022 година, во просториите на НЛБ Галерија, Европската Бизнис Асоцијација одржа настан каде претставниците на Асоцијацијата, заедно со претставниците на компаниите членки и поддржувачите на иницијативата се осврнаа на остварените успеси и реализираните активности во изминатата 2022 година.

Со цел вмрежување на присутните и чевствување на постигнатото, на настанот се обрати Д-р Катерина Бошевска, претседател на Европската Бизнис Асоцијација којашто ги истакна клучните постигнувања во изминатата година. „Оваа година Европската Бизнис Асоцијација имплементираше важни структурни промени. Воспоставиме нови принципи на работа и целосно се реорганизиравме“ – истакна Претседателката д-р Бошевска.

Една од најважните промени која ја имплементираше ЕБА оваа година е назначувањето на новиот извршен директор Иван Дургутов. „Иван Дургутов е магистер по правни науки. Тој е и млад европски амбасадор, тој е активно вклучен во бројни проекти во граѓанскиот и бизнис секторот, а кои се насочени кон подобрување на законските решенија, бизнис климата и можностите за развој. Прогресивен, амбициозен, го претставува она што Европската бизнис асоцијација во суштината е, нејзините вредности и стил“ – се обрати кон присутните д-р Бошевска.

Зголемениот број на членки ѝ донесе на Европската Бизнис Асоцијација нови можности за соработка и нова енергија со која Асоцијацијата продолжува да работи фокусирано на својата цел. Раководството на Асоцијацијата, благодарение на заложбата на компаниите членки постигна голем исчекор во 2022 година.

Осврнувајќи се на еден од најуспешните проекти, Претседателката д-р Бошевска им се обрати на присутните: „Отварајќи нови хоризонти, создаваме средина којашто ги промовира и ги поддржува интересите на компаниите членки и бизнисот во земјата. Одличен пример за тоа е проектот за усогласување на постапките за инсолвентност со ЕУ регулативата, попрецизно придонесот кој како ЕБА го дадовме на Проектната Единица при Министерството за економија, Проект финансиран од SECO-Секретаријат за економски прашања на Швајцарија и IFC – Меѓународната финансиска корпорација која е дел од Групацијата Светска Банка“. Остварента соработка и заедничката работа на Асоцијацијата, компаниите членки и поддржувачите на оваа деловна унија, директно придонесува кон приближувањето на европските бизнис практики и овозможувањето на потребните услови за нивна имплементација на домашниот терен.

Во однос на плановите за годината којашто претстои, Претседателката истакна: „Нашата мисија за годината која претстои е да работиме уште поактивно, да организираме и спроведеме повеќе средби со и меѓу членовите и да ги застапуваме интересите на компаниите членки на нови хоризонти. Со ова на ум целиме кон нови успеси кои ќе го поттикнат заедничкиот напредок. На повидок се нови проекти, нови работни групи во кои ќе учествува Асоцијацијата и нови активности кои директно ќе придонесат кон реализација на нашата цел. Но најнапред, годината ќе ја започнеме со ново собрание, и формализирање на новиот Управен одбор кој ќе ја води асоцијацијата во реализација на нејзините проекти.“

Европската Бизнис Асоцијација во оваа пригода ги истакна и успешните приказни на своите компании членки. Признание и посебна благодарност беше доделена до компаниите кои се истакнаа за долгогодишна соработка и заедничка реализација на проекти, Шпаркасе АД Скопје и Везе Шари. Како нејзини премиум членки посебна благодарност за придонесот кон развојот на ЕБА беа доделени на компаниите НЛБ Банка АД Скопје, Макстил АД Скопје и ЕОЅ Матрих Македонија. Европската Бизнис Асоцијација ги истакна и компаниите основачи на ЕБА, доделувајќи плакета за благодарност за долгогодишниот придонес и особен развој како основачи и премиум членки на Алкалоид АД Скопје и Пивара АД Скопје.