Основачот на „Amazon” Џеф Безос ќе се повлече од местото извршен директор на компанијата во третиот квартал оваа година и ќе премине на функцијата извршен претседател.

Како што соопшти компанијата, на негово место ќе дојде Енди Џеси, претседателот на веб сервисот на „Amazon”.

Во соопштение испратено до вработените Безос наведува дека планира во иднина да го насочи своето внимание кон нови производи и иницијативи кои ги развива „Amazon”. Според него, тоа ќе му даде повеќе време за споредни проекти, како што се компанијата за вселенски истражувања „Blue Origin“, весникот „The Washington Post” и неговите хуманитарни фондации.

„Возбуден сум што можам да објавам дека Енди Џеси ќе стане новиот извршен директор. Планирам да ја фокусирам енергијата и вниманието на новите производи и иницијативи“, напиша Безос во емеилот до вработените.

Енди Џеси е во Амазон од 1997 година.

Безос е извршен директор на „Amazon” од неговото формирање во 1994 година. Компанијата „Amazon” стана пионер во брза и бесплатна испорака, привлекувајќи милиони потрошувачи да купуваат секакви производи преку Интернет. Под раководство на Безос, „Amazon” го лансираше својот прв читач на е-книги, кој беше широко прифатен, а неговиот гласовен асистент Ехо, ја популаризира технологијата во домовите.

„Amazon” е еден од последните големи технолошки гиганти во светот, чиј основач сè уште е извршен директор. Ко-основачите на „Google”, Лери Пејџ и Сергеј Брин, поднесоа оставки од директорските функции во компанијата-мајка на холдингот „Alphabet” во 2019 година. Основачот на „Oracle”, Лари Елисон се повлече од функцијата извршен директор во 2014 година, а Бил Гејтс беше на чело на оперативниот тим на „Microsoft” до 2000 година, а минатата година тој целосно се повлече од Управниот одбор на софтверскиот гигант и се посвети на хуманитарни цели.

Од тогаш компанијата, од сервис за онлајн продавање книги, стана еден од најголемите интернет продавачи на разни видови производи, а вредноста на „Amazon” се проценува на повеќе од 1,6 билиони долари.