Швајцарската централна банка и регулаторното тело на финансиските пазари (Finma) денеска соопштија дека “Credit Suisse”, чија вредност на акциите падна за речиси една четвртина, ги исполнува барањата за капитал и ликвидност и може да пристапи до капитал за ликвидност „во случај на потреба“.

„Credit Suisse ги исполнува барањата во однос на прашањето за капитал и ликвидност воведени за банкарските гиганти. Во случај на потреба, швајцарската национална банка ќе стави капитал за одржување на ликвидноста на Credit Suisse“, се вели во заедничката изјава на швајцарската централна банка и регулаторното тело (Финма).

Ова го соопштија по целодневен молк во кој вредноста на акциите на швајцарската банка “Credit Suisse” забележа најголем пад во својата историја и трговскиот ден го завршија со губење на 24,24 проценти од вредноста.

Паника настана кога најголемиот акционер на “Credit Suisse”, Саудиската национална банка изјави дека не може да и обезбеди на банката поголема финансиска помош и да го зголеми својот удел кој во моментов изнесува 10 отсто.

Финансиските пазари и пазарите на капитал се вознемирени по колапсот на американската банка СВБ и стравуваат дека тој може да се прошири и во други банки и земји.