Биткоинот во текот на вчерашниот ден падна на најниско ниво дури од декември 2020 година, бидејќи падот на берзите продолжува крајно негативно да влијае и на криптовалутите, чие тргување ги следи таканаречените поризични средства, како што се акциите на технолошките компании.

Биткоинот во еден момент падна под гранцата од 21.000 долари и се тргуваше по цена од 20.950 американски долари. Во утринското тргување во Азија, најпознатата криптовалута минимално ја стабилизираше својата вредност при што сега се тргува по цена од околу 21.095 американски долари. Ова е убедливо најниската вредност на биткоинот во тековната 2022 година.

Висок пад има и кај етериумот, втората најпозната криптовалута која се тргува по цена од околу 1.135 долари и бележи пад од високи 1,63%. Во текот на вчерашниот ден, етериумот забележа пад на вредноста од повеќе од 15 проценти.

Ситацијата на сите светски берзи кои бележат голем пад, се пресликува и на крипто берзите, а силно погодена од овој голем пад на вредноста беше и најголемата светска дигитална платформа за тргување со криптовалути „Binance”.