Цената на нафтата на лондонскиот пазар паѓаше и минатата недела, бидејќи трговците стравуваат дека зголемувањето на каматните стапки од страна на централните банки поради високата инфлација ќе го забави растот на светската економија, што би ја ослабело побарувачката на нафта.

Цената на барелот на лондонскиот пазар падна за 5,5 проценти на 101,16 американски долари, додека на американскиот барел за 6,9 проценти на 97,59 долари.

Најголемиот неделен пад на цената на нафтата во последниот месец е последица на зголемувањето на каматните стапки од страна на централните банки во светот со цел да се потисне високата инфлација, што ќе го забави растот на глобалната економија и со тоа ќе ја намали побарувачката за нафта.

Најголемиот дел од фокусот е ставен на американската централна банка, откако минатата недела беше објавено дека инфлацијата во Соединетите Американски Држави (САД) во јуни достигна 9,1 проценти, што е ново највисоко ниво во последните 40 години.

Затоа се очекува дека ФЕД ќе ги зголеми клучните каматни стапки за агресивни 0,75 процентни поени во јули, втор месец по ред. Некои дури шпекулираат за зголемување на каматните стапки за цел процентен поен.

Во моментов, пазарите проценуваат дека постои 75% се шансите ФЕД да ги зголеми каматните стапки за 0,75 процентни поени, а 25% се шансите каматните стапки да се зголемат за еден процентен поен.